♡♢ هواجيس ~~ شطر ♢♡

[شطر]

بسم الله الرحمن الرحيم..

اسعد الله اوقاتكم جميعا..
زاويه خاصه لأبياتي المتواضعه ارجو ان تنال الاستحسان..

[شطر]

بين ترتيب الحروف وحسها المتناغم
المشاعر كنها في ليلة(ن) شتويه
هاجسي ياهاجسي لرضاه جيتك راغم
جفت عروق الغلا وعدودها المطويه

[شطر]

لو تفارقنا جسد ..أشواقنا تجمعنا
كل بيت(ن ) فيه شطر وفيه شطر(ن) ثاني
لو يضيق الكون كله.. بيتنا يآسعنا
ان تباطيت الغياب بمجلسه تلقاني

[شطر]

غدير الغرام اللي جلسنا على جاله
أمره وأصد وكن ماعاد له ذكرى
تجيه السحايب بين فترات هماله
تصب الشغايا فيه والجرح مايبرى

[شطر]

《على جال ضو الشوق لي دله وبراد
وهاجوس شعرن بين الاضلاع وقادي
لأجل كامل الاوصاف اجيب البيوت جداد
وادون بها التاريخ هجري وميلادي》

[شطر]

شموع الغلا اللي تشتعل من لهيب الشوق
هبوب الفراق البارده جات واطفتها
مع ان الفتايل في ذرى القلب والمعلوق
ولكن ماجتها من رياح كفتها

[شطر]

تلوح البروق بغيمة الشوق طول الليل
ويطحن حنين رعودها صدري البالي
الا جر قلبي جر غصن يجره سيل
لحته الصخور وطشه السيل من عالي

[شطر]

تبل العروق ابيات شعرك ليا من جات
وهي قبل شفقانه على الحرف والحبكه
عسى الله يجيرك من عنا الوقت والصكات
تجرعت حبك لين سببت لي ربكه

[شطر]

تموت الحروف من العطش والضلوع حطام
وصحراء غرامك خاليه مابها مرعى
لو ان الضمير المستتر عاش بالاحلام
كان اكثر قلوب الناس في سكته صرعى

[شطر]

♡حبيبي فمان الله مشكور ماقصرت
تخيرت دربي وانت دربك تخيرته
وقلبن فتحته لك انا اليوم له سكرت
وعن جملة الحلوين شلته وكسرته♡