سحاب شقراء -سواليف الاولين ايام بيوت الطين والحياه الطيبه

[سحاب شقراء]

وينكم وشذا الي ملهيكم عني

[أبو سيرين]

يا عم سحاب
والله اني متابعك كل يوم ولكن كل ما جيت ابي أرد وانشغل عنك وصدقني أن موضوعك هذا بالنسبة لي أهم موضوع اتابعه وأحرص على المشاركة فيه أنت يا عم سحاب كالمصباح القديم الذي يضيء لنا تاريخ وتراث افتقدناه وأصبح حتى من عايشه ينسى الكثير منه فأنت بارك الله فيك أدخلتنا الأجواء بكل ما فيها الله يعطيك العافية ولا يحرمنا منك .

ولي عودة لطرح بعض التساؤلات التي تبادرت في ذهني

تحيتي وتقديري

[سحاب شقراء]

المشاركة الأصلية كتبت بواسطة أبو سيرين

يا عم سحاب
والله اني متابعك كل يوم ولكن كل ما جيت ابي أرد وانشغل عنك وصدقني أن موضوعك هذا بالنسبة لي أهم موضوع اتابعه وأحرص على المشاركة فيه أنت يا عم سحاب كالمصباح القديم الذي يضيء لنا تاريخ وتراث افتقدناه وأصبح حتى من عايشه ينسى الكثير منه فأنت بارك الله فيك أدخلتنا الأجواء بكل ما فيها الله يعطيك العافية ولا يحرمنا منك .

ولي عودة لطرح بعض التساؤلات التي تبادرت في ذهني

تحيتي وتقديري

ياجعل ربي يجعلك من اسعد خلقه امين يارب العالمين

وجعل عينك يبو سيرين ماتدمع الا من خشيه ربك

اشوا رديتا علي ويشهد ربي انه مستاسع صدري جعل ربي يوسع صدرك دنيا ودين

يكفيني كلامك الطيب ياوجه الطيب

وعلشانك ابي احط سولافه ونت ضيف الشرف فيها تستاهل

شرفتني شرف الله قدرك ومقدارك

[سحاب شقراء]

السلام عليكم ورحمه الله وبركاته

الا بذكر الله تطمئن القلوب لااله الا الله وحده لا شريك له

يالله تحييهم جميع كبيركم وصغيركم ذكركم ونثاكم ولياحيا كثر وتنثر

فيه هكا الواحد والواحد الله في سماه العالي وكل ابليس مخزيه الله

يقولنها العجيزات منول الا بدن بالسباحين

يالله اني ادعيك ونت المجيب لمن دعاك انك ترحم عجيزاتنا كلهن الحي والميت فيهن ونك تدخلهن الفردوس الاعلى من الجنه بعزتك وقدرتك ياارحم الراحمين
ونك بعد ترحم العويد كلهم حيهم وميتهم ولو نفوسهم شينه وش نسوي بهم

هذي السالفه على شرف الغالي ابو سيرين الي شار علي اني اكتب عندكم ونا لي الشرف انه يكون ضيف شرف

وهذي سالفه قد حصلت لي من زمان ايام الشباب ونا منيب صغير بعد شوفوا الشجاعه شوفوا القوه شوفوا الحكمه في التصرف في المواقف المحرجه تمعنوا بس وددقو شوفو الاعصاب الفولاذيه والقوه الي عندي ما تطلع الا ساعه الصدق


كنت مره نايم في البر لحالي في صندوق السياره وكانت ليله بلا قمر يعني ظلام شديد وكنت

متعمق في البر اقرب سفلت يمكن 15 كيلو عني وشوله مبعد والله العظيم اني مدري هل هو شعور بالنقص وبا اثبت لنفسي اني شجاع ونا والله من يمها المهم وشوله اتعمق واجد في البر ونا اذرق ما خلق ربي المهم دخلني النوم ونمت نوم عميق وذكر بعد معي رادو صغير وفيه برنامج كان تذكرونه يجي الساعه 12 ونص في الليل عنوان البرنامج سكن الليل اعداد وتقديم شوشه فرحه الغامدي وتلا خبري بعمري الا قال سكن الليل كنها منوم المهم نمت ويوم صرت في سابع نومه على قوله الناس ومظت

ساعات حسيت السياره بتنقلب على جنبها من شده الاهتزاز وكنت متغطي كلي تقول احدن يخض له لبن وابعدالبطانيه عن عيوني ولا فيه راس لازق في وجهي لونه اسود كبر ابليس ولو ماشفت ابليس

ومن شدة الظلام ولا فيها قمر مدري هو اول الشهر ولا اخره ويوم صار ت السياره تهتز بشده وخر البطانيه عن وجهي ما ترى الا اشكال اوجهام وفيه شي ما علمتكم فيه قبل ما اخر البطانيه عن

عيوني سحبت المسدس وولمته يعنني قوي خل اعلمكم بعد قسم بالله ان المسدس ماعمري رميت فيه ابد ابد الا الطلقتين هذي ويوم اخرت البطانيه وشفت ذا الاسود الي لازق بوجهي

اطلقت طلقتين في الهوا واطمر بسم الله علي والاي برا الصندوق مع الجهه الاخرى كني

زمبرك ما شاء الله علي مهوب كله نشاط ورياضه لا والله بس ياروح ما بعدك روح
واروح جهة ابوراس والاه مبعد يجي خمسه امتار وانا مصوب المسدس واقول انسي والا جني انسي

والا جني تراي ابطلق النار ولا تكلم انسي ولا جني ولا تكلم بحرف ولا كلمه وفجأة سمعت خرير الماء وانا مصوب المسدس

عليه تدرون ذا المعركه والمناورات وطلقتين في الهوا مع مين

صار ت مع ناقــه وخرير الماء الي سمعته تكرمون كانت تبول واتضح لي ان السياره يوم

تهتز كانت الناقه تحكك فيها والراس الاسود راسها تطل علي بصراحه يعني وش رايكم في المناورات واقول ما طاع يتكلم ليش؟؟
اشوا انها ماتكلمت كان تقول ناقه يا وليدي ناقه ثم

ينغرف عقلي

وبعلمكم بشي بصراحه ماينقال بس بقوله ياكلني لساني وش اسوي تراي سويت شي على روحي بس مهوب الكايد لا اللي اهون منه دائما تظهر الشجاعه فيني اذا احتجتها بس هاه وش رايكم مهوب اني صنديد ماانهبلت بعد ترا ما ورا مني ان عقلي معي الا هلحين ونا والله احيان اني اشك ان ذا السواليف ماجت الا من بعد ذا الموقف كلش ممكن في الدنيا

فيه واحد من ربعي يوم علمته بالسالفه قال شجاع ياسحسح شجاع وترا سحسح اسم الدلع ياملا الماحق

شرفتوني يالغالين كلكم شرف الله مقامكم وجمعنا بالفردوس الاعلى من الجنه مع النبيين والصديقين والشهداء امين يارب العالمين

لااله الا انت سبحانك اني كنت من الظالمين

[أبو سيرين]

هههههههه

يعني بغيت تذبح الناقة هههههههه

يا قو قلبك .... عموما شاعر مثلك لابد قابله جن لأن الشاعر احساسه مرهف ههههه ويشوفون الجن مثل بقية الشعراء السابقين اللي شافوا جنهم

من قصصك يظهر لي أن أهالي شقرا كانوا يعانون من الفقر في الماضي وهذا ينافي ما وصل لنا من قصص تثبت أنهم أهل مال وتجارة !! أو انها كانت محدودة في أشخاص معينين ؟

وبعدين ليش كل اللي حولك عجيز ما فيه بنات وشباب والا أنت ما تحصل معك قصص إلا مع العجيز هههههه

والا عشان الكليجا والجريش هههههه الجوع وما يسوي هههههه

وما قلت لنا عن دراستك لا بد كان لك قصص فيها ومواقف وهل لحقت الكتاتيب والا ما درست خير شر ههههههه

ياليت ما تبخل علينا بأي موقف حصل معك أو قصة وتسردها كما هي من دون حذف أو تعديل

والله لا يحرمنا منك يا عم سحاب

والله يعطيك العافية

[سحاب شقراء]

ياهلا يبو سيرين الغالي

والجن انت عندك علوم عنهم هماك شاعر علمنا عن مواقفك معهم هههههههههه

والاولين يقولون كل شاعر معه جني شاعر لانهم يستنكرون بعض القصيد

تقول انك خابر اهل شقراء تجار وهذي حقيقه مايبي لها شهود وثرهم باقي الا هلحين يعني لو تشوف طريق الملك عبدالله ياملا الجنه الي في شمال الرياض كله لهل شقراء
عندك صحارى للرقيب من شقراء وعندك السدحان الملابس وسواق السدحان للمواد الغذائيه من اهل شقراء

وعندك الجميح وعندك الفاضل وعندك البواريد والشويعر كلهم من شقراء وهل شقراء واجد جعلها للسيل

صحيح تجار اهل شقراء بس يفركون الريال فرك وياكوده يطلع ويقولون لولا دقاق المال ماجا جلاله

قصدهم اجمع القرش والقرشين هذا دقاق المال الي جمع كثيره هههههههههههههه




علا فكره ترا اهل شقراء هلحين اعادو بناء شقراء القديمه بيوت الطين ندعوكم لزيارتنا ونتشرف بقدومكم -تذكرون هذي العباره ياظيفنا لو زرتنا لوجدتنا نحنو الضيوف وانت رب المنزلي -

المهم الي يحرج بعدمايذكر الله و الصلاه على النبي صلى الله عليه وسلم يقول
من يبي الذهب مثل مابعنا
من يبي الفرانسي مثل مابعنا
من يبي العربي مثل مابعنا
من يبي القهوه مثل مابعنا
من يبي الهيل مثل مابعنا
من يبي سحاب مثل مابعنا امزح معكم
ثمن يبدون البيع والشرا -

وكانت جنيهات الذهب مصوبه صوب او شحن محطوطه على حصير خوص هي والفرانسي والعربي
ودك انه هلحين كان تشوف الغارات عليهن والطق والطقيق اجل جنيهات ذهب عيني عينك هههههههههه

انا هلحين وشوله اعلمكم بذا السالفه مالها سنع

والجن حدث ولا حرج يبو سيرين
وشقراء مليانه منهم بس مايوذون ومسلمين وعلى فكره ترا كل بيت فيه سكانه يعني مايخلا بيت منهم هلحين
ومنول وهذي حقيقه بس خذ العلم مني ونا ابو هندي هههههههههه الجني الي يطلع ويخوف الناس يصير في قانونهم مهدر دمه الا كانه وحيد امه ههههههههههههه هماهم يقولون وهم يدعون ياملا الجني الي مال امه الا هو هههههههههههههههههههههه

ونا اقول ورا الشيخ العمري الي يقرا بالرياض يوم رحت يمه قالي انت بالذات انتضرني الين يروحون الناس كلهم ابا اجلس انا وياك ابيك وخفت منه وش يبي مني وبالحالي انت خابر يبو سيرين الواحد يحرص على نفسه ولوي اكبر منه عمر ههههههههههههههه
قالي الشيخ انا احبك في الله قلت له انا لله وانا اليه راجعون انت وش فيك وقام يضحك جعل ربي يسعده من كلامي
وقلت له الله يحبك وملائكته امين يالعمري وصارت صحبه بينا

الاولين سمعوهم قصدي الجن في بعض الاماكن وهم يشعرون وهم يقولون

زارنا عمرن بليل ليت لوه بنهار

تنبت الارض والكلالي زعفران

وبيتنا بيتن جديد ومنقطن بالزعفران

مابها كونن يصلي كود صفات الحمام

الشاعر الجني هههههههه مااعرف اسمه

ونا سمعت في ليله من الليالي ونا رايح لنخلي على رجلي سمعتهم يشعرون ويقولون

اضحيت انا في حب سلطانه

وكل الغلا زايدن من حب راعيها

والجن مايقولون اصبحنا يقولون اضحينا

ههههههههههههه ورديت عليه تبي تصدق هذا الي حاصل بس منيب اعلم علشان محد يصدق

ورديت وقلت

ونشدت انا القلب منهو من شانه

وقالت جحودن وتجحد من يبكيها

ولا عاد سمعت شي بس خلني اعلمك انا لو اجي في مكان فيه سحر ولا جن ادر ي عنه وهذا من فضل ربي سبحانه ولو اشوف شي مستنكر عن البشر تلقاني اروح يمه مايدخلني الخوف
ونا اعرف نفسي اخوف ماخلق ربي انا بس مدري وشو هذا
من سنين وبنين كلمني رفيق لي وقالي تعال ابيك ضروري ورحت يمه وحنا عند الباب لقيته ضايق صدره وقالي طلقت الحرمه ونا احبها ونا هلحين بالحالي في البيت وبي من الضيقه ماالله به عليم وبيك توسع صدري لياني اسوي بنفسي شي قلت ابشر
ودخلت وهو ساكن في الدور الاول ويوم جيت عند الدرج ابا ارقا انا وياه
ومسكه ورجعه ورا وقلت له فرشه الدرج يبو فلان فيها بلا قال وشلون قلت اعلمك وشلون وجيب كشاف معي بالسياره يعني بجلي بس قوي الامريكي الي يستخدمونه عصا للضرب
المهم يوم نورت على الفرشه ولا فيها نقط ومليانه من النقط والفرشه بيج على رصاصي غامق شوي ومكبوب عليها سحر مثل غريف السيل وشافه وتعجب ابن الحلال من الامور الخارقه فيني هههههههههههه الله لا يتكل بس
المهم طلعنا للشارع وجيب عامل وخليته يقشع الفرشه كلها من تحت الين فوق وجدعناها في الحاويه الله يكرمك وخليته يطلق على الدرج بالماء والصابون وغسله العامل وعرقته 100 ريال
وطلع محطوط له مسكين شين يخليه مايواطن شوفه حرمته يعني تفريق جعل ربي يفرق اجسادهم عن روسهم الي متسببين وكل من يظر مسلم
بس ابشرك بعد فتره زانت اموره ورجع حرمته ولله الحمد من قبل ومن بعد

ابوسيرين والله العظيم ان فيه نخله من نخلي بشقراء ساكنها جني خال بلمعه وعيونه جمر حمررررا بس مسلم وراعي صلات وقبله يخوف العامل وخلاني اوصل راتب العامل الا الفين وخمس ميه علشان مايروح ويخلي نخلي
ونت خابر انا هلحين من اهل الرياض وقول ميدي وءانا انت ميدي يبو سيرين

وقلت له مره

ياساكنن عندنا وتسكن بعالي الجنا

الله محييك كانك راغبم عندنا

الله من زين القصيد هههههههه ولا رد علي ولوه راد كان اتناقص عقله

ونا في استراحه المزرعه الا اذن الفجر تسمع الباب يطق ثلاث طقات
وذكر اخوي الكبير يعنني صغير انا ههههههههه كان معي ومعلمه عنه ويوم سمع الباب ثلاث طقات قالي جو الهيئه ياسحاب قم نصلي
ولا فتحت الباب ماتلقا احد

يقولي واحد انت تصلح رفيق سفر وكشتات بر قلت مع كل الناس الا انت هههههههههههههه امزح معه

وسلامه قلبك يبو سيرين


وخير الكلام ماقل ودل هههههههههههههههههههه قل وش خليتا ههههههههههههههههه

ترا كل هذا اكتبه بصيبعي جعله يسلم

[أبو سيرين]

ههههههه عزا الله ان علومك تنومس يا عم سحاب ولا تمل أبداً

الجن وانا اخوك ما عمري سمعتهم ولا شفتهم ولا حتى حسيت فيهم ربما لأني دائم التحصين وأقرى أذكار الصباح والمساء باستمرار ... الله أعلم

وعلى طاري الجن ترى يموت الشاعر ..... وجنيه ما مات لأنهم يعيشون الآف السنين ... فأنت بما أنك تحس فيهم وتتكلم معهم انصحك تلحق على جني ( رشيد الزلامي ) الله يرحمه مات رشيد وخلاه وحيد فرصه تصاحبه وتصير شاعر مثله ههههههه

ايه .... الله يرزقنا من واسع فضله يعني ما شاء الله صاروا راعين الدجاج والبقر هههههه أصحاب اسواق وملايين ....... الله يزيدهم من فضله يستاهلون من تواضع لله رفعه ومن حفظ نعمة الله أدامها عليه وبعدين حسب ما عرفت أن لهم أيادي بيضاء في بداية قيام الدولة وكانوا سند للملك عبد العزيز رحمه الله

وبالنسبة لإحساسك بالسحر والجن ... الله سبحانه وتعالى يقول في الحديث القدسي ( عن أبي هريرة – رضي الله عنه – قال : قال رسول الله صلى الله عليه وسلم - إن الله تعالى قال : من عادي لي وليا فقد آذنته بالحرب ، وما تقرب إلي عبدي بشيء أحب إلي مما افترضت عليه ، و لا يزال عبدي يتقرب إلي بالنوافل حتى أحبه ، فإذا أحببته كنت سمعه الذي سمع به و بصره الذي يبصر به ، و يده التي يبطش بها ورجله التي يمشي بها و لئن سألني لأعطينه ، و لئن استعاذني لأعيذنه -رواه البخاري . )

وانت والعلم عند الله انك من هؤلاء لأن قلبك أخضر وتحب الخير للناس وما تنصحنا إلا بالخير لذلك انت تحس بالسحر والجن وهذا من نعمة الله فاستخدمها فيما يرضي الله

وقد سمعت الناس من قبل الجن وهي تقول الشعر فعندما وجدوا الصحابي سعد ابن عبادة ميت سمعوا الجن تقول

قتلنا سيد الخزرج سعد ابن عباده .... رميناه بسهمين فلم نخطئ فؤاده


وهذا يثبت أن فيهم شعراء وأن الناس تسمعهم وتسمع شعرائهم ولكن متى ما أرادوا ذلك

والأماكن اللي يكثر فيها النخل وبيوت الطين تكثر فيها الجن مثل شقرا

والله يا عم سحاب ما حنا مخلينك لين تقولنا كل اللي شفته وعايشته في الماضي
وموضوعك هذا سيبقى في ذاكرتنا

واصل في سرد قصصك يا عمر سحاب وكلنا في شوق لسماعها

تحيتي وتقديري