كشتة صباحية فيها ما لذ وطاب

[ابو فراس]

السلام عليكم ورحمة الله وبركاته
بعد صلاة الفجر يوم شفت ان الجو براد قلت يابو فراس لا يفوتك الغضا هالحين تبي تلقاه فاضي كل الناس اللي بالمدرسة او بالعمل وخذ راحتك مع اني اتصلت على واحد ولا رد (قلعته)
المهم قررت ان ازين خبزي بيدي وحيث اني عجل مريت على الخباز واخذت منه عجين مقدار قرص واحد يبي يكفين انا والضيف ان سير علي احد
ويوم وصلت والا هاك الغيوم والجو الزين
1

2
على طول شبيت الضو حتى احكر القهوة والشاهي ويجمر حتى نسوي خبزنا

3
ابكثر الصور علشان واحد ببالي يحب كثرتهن واقترح على حتى يطول وهو يقرا الموضوع ويمخمخ عليه واستجبنا لغربته

4واول مازان فنجال قهوة يطرد ازعاج المدينة وتبدا بالهواجيس

5وقدوع وصى عليه الخبراء

6
وفنجال شاهي صافي لحد يقول خفيف ترا ما اعزمه بعدين

7
واثناء انتظار الخبز خذ كم صورة وجرب واشغل روح يامال الغنيمة وهذي صورة لحبيبة اهالي عنيزة شجرة الغضاء

8
والان نعود لخبزنا واعذرون لاني لحالي (يعني بمفردي) ما قدرت اصور الخطوة الاولى لفرد العجينة تخبرون الايد مليانة عجين والكمرة غالية
بعد ان فردنا العجين بصحن الكنافة (اسفين يا ام فراس)احتجناه المرة وان شاء الله نشري ليتس واحد بداله (ايه كثر منهن) غطيناه بالغطا حتى تنتشر الحرارة وحماية له من الحشرات او رمل او اي شي مزعج

9
وبعد خمس دقائق حسب قوة دافورك يكون القرص استوى من الاسفل

10
بعد ان استوى القرص وتكون الجميرات جاهزات نقلب الصحن بعد ان نرفع الغطاء عنه لكي يتقمر وجه القرص ويستوي اكثر

11
وكذلك حسب قوة جمرك وحرارته انت قدر له الوقت المناسب وهذي النتيجة قرص يحبه قلبك مقمر على مزاجك

12
وهذا الوجة الاخر للقرص المقرمش

13
ومع الحليب والشاهي ما ينتفوت تغميس به

14
ايضا نبي نكثر من الصور
اماهن ببلاش

15
وانت تاكل وموسعن صدرك خذ لك كم صورة يامال الغنيمة ترا الربع يستاهلون

16
مثل ما قلت لكم ترا الصور ببلاش
اصبروا لا تروحن باقي صورة مهمة

17
وهذي النتيجة الفتاكة ولا تعلم احد يبلشك بعدين ويقول سو لي معك قرص لين اودي العيال والبنات للمدارس واجيك


18
وهذي القرص ما ادرس وش يسمونه تحطه بين الدافور والخبز حتى يتم توزيع الحرارة على القرص كله ولا يحترق

19
وهذي صورة اخرى له

20
وهذي صورة النهائية قبل الرحيل الحزين حيث اني تلقيت اتصالا من طبيب الزراعة لعلاج بعض الاغنام عندنا بالمزرعة ولابد ان اكون متواجدا هناك ولكن ان شاء الله نعوضكم بكشتة ثانية تكون اوسع وقت

وفي النهاية اتمنى ان تحوز على رضاكم