♡♢ هواجيس ~~ شطر ♢♡

[شطر]

بين القصايد والحبر طرس واقلام
واحساس مايقفاه شك وملامه
عطر حروفك يا ابيض الوجه قدام
يجيك يوم(ن) ماش بعده سلامه

[شطر]

على المشتحن ليل الشتاء حمسة(ن) واحراق
يجاذب لحون القاف وتزود احراقه
يحده على المنكوس من داخل الاعماق
فراق الوليف اللي له الروح تواقه

[شطر]

وياهاجسي من قبل ﻻتطفي الاشواق
تجمل معي طالبك مع ناس ذواقه
وخلك رديفي وازهل الدرب والسواق
مع اول حلول الليل الى وقت مشراقه

[شطر]

دروب المحبه عسرتن حيل ماتنطاق
وكم ناس فيها ردها الحظ منعاقه
اباخذك معيه دامني للغضي مشتاق
ودام ان قلبي داخل الصدر معلاقه

[شطر]

اﻻ ياوجودي وجد عودن كسير الساق
يجر الونين وطيب الزاد ماذاقه
واﻻ ياوجودي كل مالاح لي براق
وهلت هماليل السحايب على فاقه

[شطر]

واﻻ ياوجودي من ظروف الزمان الشاق
ليا حدت الرجال وانحلت أخلاقه
على واحدن سبحانه الواحد الخلاق
عطاه الولي مصنع هل الزين واسواقه

[شطر]

يلج الضلوع اليا على الصدر طل وواق
ويشلع ستار القلب والطنب ورواقه
وصوفه على غيره خطيره وﻻ تنلاق
ليا شافها راع الهوى يبست ارياقه

[شطر]

لاهنت ياقاف(ن) من الجاش جبناك
ولاهان من هو بالوصايف محليك
مايستوي وزنك ولا يرفع بناك
الا هنوف(ن) حبها دون تشكيك

[شطر]

حب(ن) على وضح النقا ماهو بذاك
اللي دروبه تودعك للمهاليك
يافاتنه لو كان مافيه شرواك
ماينفعك زينك وكثرة تغليك

[شطر]

يارب عفوك يابديع السموات
اخطي وتكرمني بجزل العطايا
عبدك فقير ويطلبك كل مافات
اغفر لي الزلات وادمح خطايا