سحاب شقراء -سواليف الاولين ايام بيوت الطين والحياه الطيبه

[سحاب شقراء]

السلام عليكم ورحمه الله وبركاته

يالله تحيي الغالين كلن بسمه وتوسع صدورهم وتوفقهم امين

اذكر ونا في نخلي يعني مزرعتي في شقراء ليله من الليالي كان السماء كله سحاب وبروق وصواعق ومطر يالله لك الحمد والشكر
وجلست في نخلي مادخلت للديره لاني كنت اتحرا الشعيب يجي ماشي ولازم اصير في المزرعه اخاف يخرب علي شي ولا يدخل على حوش الغنم المهم ونا جالس على ذاك الرمل بالحالي وناضر البروق والسحاب وتفكر بقدره رب العالمين سبحانه وشوي ادعي ربي وشوي ابكي ومثل كذا انتم خابرين الواحد الا جلس بالحاله
وقلت لي كم بيت من الشعر ذيك الليله الماطره وقلت

الـمــعـجزه بــعـيـونـنـا شــانــهــا شــــآن


و حـنــا نــدرعـــم مــا نــعــرف الــركـاده


سبـحان مـن يـنـشي مـن الـغــيــم بركـان


و يــنزل عـلـيـنا مـن اللـواهـــب بــــراده


إلى أبـرقـت شفــنـا اللــواهــب و نيـــران


وإلى أرعـــــدت تــرتـــــج دار الـعــبـاده*


ثـنـتــيـن وجـتـمعـوا نـقـيـضـن و نقـضـان


مــاعــونهــن واحــد وحـــلــون شــرابــه


سـبـحــان ربــي عــد كــل كـايـنـــن كــان


سـبحـان مـنـشـي الـكـون معـطـي عـبـاده


أكـتــب و دمـعــي فـوق الأوجــان هــتــان


يــاالله طـلـبتــــك رحـمـتــــك و السعــــاده




*دار العــبــاده هـي الأرض

سحاب شقراء

-----------

هذي سالفه صايره معلمتني بها جدتي الله يرحمها وميمتي وبيي وخيي
وجدي ونا ونتم وكل مسلم تقولي جدتي وذا الكلام من مووووبطي مره ان فيه رجال متزوج وعنده بيت الله منزين الحكي اكيد متزوج بيصير عنده بيت بس يالله لا تدققون هههههههههههه المهم ويوم جا ذاك اليوم لبيته وهو يدخل وهو يقول لا حولا ولا قوه الابالله لا حولا ولا قوه الا بالله انا لله وانا اليه راجعون وهو ماسك راسه ويومي براسه قالت حرمته عسى ما شر يبو فلان عسى ماشر وشفيك تراك روعتني قال وش اقول وش اخلي يم فلان انتي ماتدرين وش الي حاصل بها الدنيا قالت وشو قال منحنب واشين بس اسمعي ذا الخبر يقولون ان العصمه او الطلاق صارت بيد الحرمه معادهي بيد الرجال قالت حرمته وشو انت صادق قال ايه صادق وهذا الي مظيق صدري وش السوات يامره - الا يوم اسفهلت العجوز ونبسطت قالت وش السوات انا اعلمك عن السوات اسمع يالرجال مدام العصمه صارت بيدي خذ العلم وقم يالله وكنس البيت كله ولا والله تراك ط وط يعني طالق ويقوم الرجال ويكنس الدار كلها ويوم قضى وجلس يرتاح وتجيه العجوز وتقوله وراك قاعد هلحين قال كنست وقضيت قالت له لا ما قضيتا قم غسل الثياب ولا تراك ط ويقوم ويغسل الثياب وينشرهن على الحبل والعجوز قاعده تراقبه ويوم قضا قالت تراي جايعه زيين الغدى ولا تراك ط ويقوم ويزين الغدى ويوم تغدت وشبعت وهي تمد عصاقيلها وقالت لرجلها تعال همزني وطقق بصابع رجلي ولا تراك ط ههههههههههههههههههههه الا يوم قال رجلها الا هذي والله لانيب بمهمزك ولا مطقق بصابع رجليك قالت تراك ط قال لو تطاطين الين يوم القيامه قالت تراك ط قال انا الي ابي اقولك ط مهوب انتي ياعجوز ابليس ما صدقتي على الله تسمعين الخبرمني الا كلش ط ويقول الشايب توي عرفت حكمه الله سبحانه وتعالى في جعل العصمه بيد الرجل مهوب بيد الحرمه ولا كان ماتلقا احد الا مطلق هههههههههههه وسلامتكم
الله يوسع صدوركم بالعافيه

وسبحان الله وبي حمده سبحان الله العظيم عدد خلقه وزنه عرشه ومداد كلماته

[سحاب شقراء]

يالله تحيي الغالين كلن بسمه وعلى قوله العجيزات منول وليا حيا كثر ولاكثر تنثر ههههههههه والله ياجماعه الخير ان انحن منول يجينا خوف مايعلم به الا الله سبحانه وخص الا جتنا الامطارالقويه والرعد والصواعق ونتم خابرين بيوتنا منول كلها طين وينخاف منها تطيح وخص الا ديمت بعد اذكر سنه من السنين جانا مطرقوي وطول علينا المطر ودلا البيت يخرخر وترانا مانقول منول يخرخر لا نقول ياكف او ياسف ماعرفت اكتبها لانها تنطق ولا تكتب هههههههههه وكلن عليه من زمانه واكف شفتو انها مهيب تكتب وش اسوي خلونا في تخرخر احسن هههههههه المهم ذا الكلام كان عقب العصر وبوي مهوب فيه وهلي كلهم مهمب فيه ونا توي بزر ورقا للطايه يعني السطح يقالك ابا اسدد الشقوق والله العظيم ونا رايح ابا اسد الشق ان رجلي داخله لنص ساقي وجيك راجع وحفر السطح تحفيربرجلي وحول ولا البيت صاير شلالات كل المجبب يصبصب ويوم خفت ورقا ثانيه تدرون وش سويت دليت احبي على يدي ورجلي وسدد الشقوق ورجع لاخر السطح اخذ لبنه الطين وكسرها نصين مار مايبي من يكسرها ذايبه من المطر وحطها في شقي يعني في ثوبي وزحف على يدي ورجلي الين سديت كلش وطلعت انا وثوبي كني طالع من القبر ههههههه ترانا مانسميه منول ثوب لا نسميه مقطع هههههههه مانعرف ثوب ابد مقطع وبس ههههههه ويوم جا ابوي ويرقا يبي يسد الفتحات وهوالي يشوف الحوسه وثري عازق الصطح عزق يعني حايسه وهو الي ينزل ويمسكني مع اذاني ويدودلني ههههههههههه هذا الي مخلي اذاني شتار هههههههه انا ودي ادري من الي يقول الي اذانه كبار يصير تاجر والله ماعنده سالفه شوفوني حول ما اصير ارنب من كبر اذاني وفقر من ظب الصفا الي عايش بين حصاتين هههههههههههههه

يقولون لي ناس ترانا ملينا من سواليفك عن العجز ونا اقول من الي بس يمل منهن هن الملح والقبله الله لا يخلينا منهن ويرحم الميت منهن ويطول بعمر الحي فيهن وش الدنيا بدونهن وش يدريكم كانهن مهنب الي دافعات البلا عنا الله يرحمنا برحمته

انتم تدرون ان بيوت اهل شقراء كلهن مفتوحات على بعض مع السطوح يعني كل بيت له فتحه للسطح الثاني يعني تنطلق من اول بيت مايردك الا اخر بيت في شقراء هههههههههه وذكرالحريم الا جا عقب العصر يعني مسيان ايام الصيف نصير مفرشين في السطح مراقدنا ثمن تقعد امي جعلها للجنه وكل مسلم تقعد تسولف مع ام الجيران مع الفتحه الي بينا ولاجا ابوي يرقا الدرج لازم يتنحنح ههههههههههه ثمن تقول امي يالله يخيتي تمسي على خيرهذا حس ابونا جا ثمن تقول ام الجيران حافظك الله وكلن يروح لمرقده او لفراشه يازينا ويازين علاقاتنا مع جيرانا منول - اصبرو ودي اصيح بس مهوب هلحين والله انها غرقت عيوني يوم تذكرت ولوي عود جن لا تشرهون علي هههههه - وذكر امي ترقا بسحله يعني بغظاره مليانه ماء وتغطيها بشيلتها عن الواحيس وذكر مره نست امي ترقا بالغظاره او السحله وذكراني اقول يمه ابي ماء وهي تقول طيب طيب اصبر وتجي الغزيل وتسقيك وقعد احتري ذا الغزيل تجي وتسقيني ولا ادري بعمري الا الصبح الله يرحمهم انتم خابرين منول بيوت الطين فيهن وحشه يعني خوف ومحد يجسر ينزل في الليل يجيب شي والدنيا ظلما -

على طاري النوم في السطح انا مدري انا معلمكم ولا لا يومني ارقد عند العجوز الي شايبها رايح للرياض خل اعلمكم وبس المهم جت ذاالعجوز وهي مارزقها الله عيال جت لبيتنا ودخلت عند امي عقب العصر ونا كنت جالس على ذاك الحصير الي من الخوص وقالت لمي تكفين يم فلان تعاني امي ودي تخلين وليدك سحاب يروح معي ويرقد عندي انتي خابره ابونا رايح للرياض ونا والله استاحش اقعد لحالي فيذاك البيت الي وش كبره قالت امي وراك ما تجين وترقدين عندنا قالت انتي خابره ما اقدر اخلي بيتي كان يفظح بي رجلي لو يدري اني مخليه بيته قالت امي سحاب ياسحاب قلت سمي قالت ماودك تروح مع ام فلان تجسرها ظعيفه لحيلتها في بييتها وسكت ههههههه ثمن قالت العجيز تعال معي وبا اسبحن عليك وبا اعطيك الصبح قريض وحلاو والله وغرتني وهي كلها نومه وروح معها وذكرها ماسكه يدي مع ذا السكيك لان بيتها مهوب قريب مره وندخل بيتها ونرقا للسطح وتفرش لها فراش وتفرش لي جنبها فريش وكانت راقيه معها بسحله او غظاره فيها ماء وحطتها على جدار الباحه والباحه هي الفتحه الي يحطونها في المجبب منول علشان تنور البيت المهم حطت الماء على الجدار الصغير فوق روسنا علشان لو ابي ماء يصير قريب المهم وتقعد تسبحن علي ونتم خابرين منول الناس يقومون من الصبح بدري مره ولا يجي المغرب او عقب العصر الا كلن يبي فراشه دايخ مره والحرمه تسبحن وكل ماسكتت انهزها يعني ادفها بيدي يعني كملي اجل تسبحن علي بالنباقات سبع بنيات وتقول يوم راحن ينبقن يعني يجيبن عبري قالو ارقي يم نعيلات قالت اخاف تنقطع نعيلاتي وتطقني امي قالو ارقي يم فنيله قالت اخاف تنشق فنيلتي وتطقني امي وما دريت الا يوم قلب الشريط وصارت تقول ويجي الذيب ويدخل يده ثمن قلت وشذا وشذا مهيب هي اثر العجوزدخلها النوم ونا مبسوط على السباحين وهزها قلت مهيب هي هذي ثانيه الا قظت النباقات سبحني علي حقه الذيب قالت لي رح لمك بس مهنا الا النباقات وبس ثمن قالت لي ياوليدي ارقد والله العظيم اني لملي مخابيك بالقريض والحلاويعني تشرط لي شرط نسميه منول شرط وغرتني بصراحه ونوم نوم عميق جدا ومادرينا الا بالسحله او الغظاره تنكب علي وهي جاها شوي بس انا الي سبحت سباحه ونا الي اقوم اشاهق مشاهق الله لا يلومني نايم وبزر وينكب علي ماء هههههههههههه ونا الي افتح اثمي على مصراعيه وطول بطني اصيح صياح الظاهر مابقا احد من اهل شقراء ماسمعني وذكرها خمتني وقامت تسمي علي والناس كلهم منول نايمين في السطوح ولا حس ام جيرانها تقول يم فلان يم فلان وش فيكم عسا مافيكم شي قالت ابد والله جن قطاوه يتطاردن وكبن الماء على الوليد قالت ام الجيران ماشاء الله جاك عيال ونحن ماندري قالت لا هذيا سحاب ولد فلانه جايبته يجسرني انتي خابره ابونا رايح للرياض جعله للريح ولا بعد جا وجبت سحاب يجسرني ثمن قالت لي العجوز قوه انا وياك ياسحاب اجيبلك شي تلبسه ونزلت انا وياها وهي ماسكه يدي ونا اشاهق كلي اتقاطر من الماء وتجيب لي ثوب من ثياب رجلها ونرقا فوق ثاني مره وتقوم وتفصخني ياخزياه بس توني بزر المهم فصخت مقطعي او ثوبي ونشرته على الجداروهي تقول علشان الا اصبحنا يصير يابس هههههههه وتلبسني ثوب رجلها هههههههههههه ماودكم الا تشوفوني ونا لابسه ماعرفت امشي فيه مترين اسحبهن وراي كني من جزيره الاقزام ونرقد ويوم جانا الصبح وتسوي لي مرق طماط ونغط عليه بقرصان وناكل ثمن تملا مخباتي قريض وحلاو برميت ثمن رحت لبيتنا وبس

والله العظيم لو اجلس اسولف عليكم عن الماظي اني مقظي ابد - بصراحه مااوجعتكم روسكم هلحين من كثر كلامي ههههههههههههههه

وفي النهايه اقول لكم الله يسعد قلوبكم والله يصلح لكم ذرياتكم والله يجمعنا مع والدينا وذرياتنا وحبايبنا وكل مسلم بالفردوس الاعلى من الجنه قولو امين - اللهم امين يارب العالمين

وسبحان الله وبحمده وسبحان الله العظيم عدد خلقه وزنه عرشه ومداد كلماته