فيه واحد اسمه خويلد انسان محترم في دراسته ما يتابع الا القناة الثانيه على باله انه مثقف عنجليزي .. طموح هالانسان انه يكون نظام المدارس مختلط ودايم يفكر اذا تبطح على السرير ويتخيل انه جمبه بنتين على يساره مضاوي وعلى يمينه ضي وانهن يتهاوشن عليه ويغارون من بعض عليه وهو مرة منبطح ويتابع هوايته ( يناظر القناة الثانيه) سمع في الاخبار ان المدرسه احترقت وان البنات ماتن وطقته العبره مسيكين .. وقال في نفسه الحين بدال مايخلونهن لحالهن ورا مايخلونا معهن عشان حنا ننقذهن ونكون معهن اما البنات مايعرفن يتصرفن ... يعني بين قوسين كلن ينقذ خويته ولا صار اللي صار المهم ذا المسيكين جالس يتذكرهن ويدعي لهن ويناظر القناة الثانيه الاخبار .. وسمع انهم اقالوا المرشد وحطوا الرئاسه حقت البنات مع المعارف حقت العيال الولد قام يطامر ويناقز على السرير ومن الوناسه يسوي حركه يرقا للسطح وينزل على المواصير حقت المجاري متاثر ببرنامج ( 911 ) اللي على القناة الثانيه ذاك اليوم ماجاه نوم يطامر ويناقز وخربها وراح واشترى شورما بـ 3 ريال ومعها ببسي .. مع انه بالعاده يشتري مطبق بريالين ويشرب مويه من برادة المسجد .. _( يقالكم الحين انه مسوي احتفال ) خلص بلع وراح للحلاق وخذ ياتنعيم وقصات وغسيل بستم وحلق شعر اباطه اللي كنهن نخل يابسات ونظفوا وجهه بستوب ( Stop) ولمعوه الين دلا يلق تقول مرايه .. بعدها مر المكتبه اللي جمبهم وشراله قلم خطاط عريض حق سبوره ورسم الشنب وحبك السكسوكه وحدد الحواجب بالقلم وضبط وضعه . المهم راح للبيت انسدح على السرير يقول متى يجي بكرا يتحرى يقابل مضاوي وضي ويدعي ربه يقول ( يارب ان دحيم ذا المخيس ذا اللي ريحت اثمه تقول صنان انه مايجي الا متأخر عشان تجلس بنت محله ) ويفكر لبعيد وجاب كتاب تعليم كارتيه ( هالكتاب قبل ما يفرشونه عيال جيرانهم راح يقراه واذا نزل يضاربهم نسا كل اللي قراه ورفّسوه الين يتفل العافيه ) المهم انه جلس يقرا هالكتاب علشان إذا دحيم قوم البنت يفرشه المهم قام وناظر الجدول لقاه رياضيات - جولوجيا- رياضه - فسحه - احياء - توحيد - كيمياء - طلعه ( ياعمري على العلمي ) جلس يفكر انه دخل المدرسه الساعه 5 <-- مستعجل يبي يحجز له بنت ... ولقا هالبنات مجتمعات والعيال مابعد جو لانه هو الوحيد اللي يفهم انجليزي ويناظر الاخبار ودرا ان البنات يبي يجون معهم .. وجلس يحوس بينهن ويدور الاحلى ( طبعا جالس يتخيل ) وانه راح صف في الطابور حق فصله وكانت فيه وحده قدامه موت بالنسبه له اسمها مضاوي. قال هيه انتي تصدقين ان فصلنا احسن فصل وان ماصتي احسن مدرسه في الماصه ( تلعثم الولد ) قالت له وانت بعد احسن واحد شفته .. انهبل خويلد وضاع منه الكلام ( المهم سوو الاذاعه ودخلوا الفصول وجرها الين جلسها على ماصة دحيم خويه وقال ان قالك قومي قولي لا .. من حظه ان دحيم غاب هاليوم المهم اول حصه رياضيات .. طبعا هو مايجيب دفاتر ولا شي ماجاب الا الرياضه حقت وزارة المعارف ويتمنى ان لونها يعجب مضاوي المهم طلعت مضاوي دفترها تبي تكتب اسم الموضوع والتاريخ .. ويجي وياخذ الدفتر منها وجلست تناظره بعيون حاقده : : وهو ارتاع قال ابكتب عنك انتي ارتاحي انا وش شغلتي هنا مسوي يبي يكسب رضاها .. وتقوم وتاخذ منه الدفتر وتقول ماطلبتك ياملقووف ضاق صدره خويلدوخلصت حصة الرياضيات وماصدق على الله لانه دايم يتشائم بها ... جت حصة الجولوجيا دخل المدرس وكتب الموضوع وقامت مضاوي دخلت دفتر الرياضيات وطلعت الجولوجيا جا يبي يسوي نفس الحركه ويكتب عنها وتذكر نظراتها قال مابدهاش اسكت لاتخرب العلاقه .. المهم المدرس بدا يشرح وبدا يسال الطلاب والطالبات طبعا الطلاب متنحين كلن يناظر اللي جمبه ... المهم المدرس سال مضاوي ( اللي هي جمب خويلد) وش اكثر الجبال فيها صخور بازلت ..( خويلد فهم خطا بازلت يحسبها ازفلت توهم مزفلتين شوارعهم وحاطين باقي الزفلت فوق جبل) المهم دنق تحت الماصه يبي يغششها وقالها الجبل اللي عند بيتنا متاكد انا .. جاوبي وما عليك البنت من ثقتهابخويلد جاوبت وقالت الجبل اللي عند بيت خويلد وجلس المدرس يضحك وهزأها وسكتت .. ومضاوي حقدت عليه غير الحقد الاول خلصت حصة الجولوجيا وجت الرياضه خويلد قام يشخص وطق رياضة وزراة المعارف وقال وش رايك فيني لو خيروك بيني وبي وائل كعفوري من تاخذين؟؟!! مضاوي ماردت عليه المهم مضاوي بدلت في الحمام وشافها خويلد وانهبل على لبسها وناظر رجليها ولقاها لابسه صندل ويقوم مسوي راعي فزعه ويسدحها وياخذ الصندل من رجلينها وينطلهن في الحمام ويسحب السيفون عليهن عشان ماترجع تاخذهن .. ويجي ياخذ كنادر الاديداس حقته اللي اذا لبسها طلعت اصابعه من قدام ويلبسها مضاوي ويربط الحبال على رجولها عشرطعشر عقده عشان ماتعرف تفكها مضاوي وعلشان تنجبرتناديه يفك الي ربط . شافت مضاوي العقد وش كثرها وانها مهيب قادرة تفكها .. قالت خلني اسكت بدال ما احاول واتفشل.. وسكتت المهم نزلواصار خويلد كابتن و واحد ثاني صار كبتن المهم قال خويلدانا اول اختياره واختار مضاوي واختاروا ووزرعوا اللعب ... المهم خويلدمسك مضاوي وقال انتي راس حربه وش رايك مضاوي بلمت ماتدري وش راس حربة المهم خويلد يصلح لها وهي ان جت تشوت فنست على خشتها وطلعت الشلحه من عند عصاقيلها وطاحت .. بعدها جت هجمه مرتده بقيادة خويلدويرفع الكوره وكانت مضاوي لاهيه تفكر وتجي الكوره وتصقع في دمجتها وتجيب هدف ويجي يرككككككككض ويخخممممممممممهههاااا وتبويس واحلا انتي قويه وانتي محترفه ومادرى الا وذاك الكف جايه يمشي مليون خويلد تحطم وطلع بداعي الاصابه واول هزيمه له وهو كابتن تجي بسبتها .. المهم جلس يتعبر وتررررررن (جرس حصة الرياضة) خلصت الرياضه ولبسوا وراح يشتري لها سن توب وتويكس من المقصف وعطاها وقال هذا عشان المجهود اللي سويتيه كنتي مبدعه ودي تعلميني وشلون وتدربيني المهم مضاوي صدقت وابتسمت له وخويلد ضاااع مايدري وش يسوي من الفرحه قام من اللخمه وحط يديه على سيقانها يبي يهمّزها يقالك يبي يريحها وبوز بكنادر الاديداس حقته اللي عطاها على خشته خويلد من اللي صار انقطع خياله وصحا .. وخاف وضاق صدره ومن الضيقه نام وقام الصبح من بكرا وراح للمدرسه ومالقا الا اشناب وشلة اخوياه الشيون وحمد ربه وقال اشوا ان مافيه بنات صدقوني لو في المدارس والجامعات بنات كان العالم يجرجرونهم للامنيه والعسكريه ذا اللي تتهاوشون عليها الحين
والسلام عليكم....ودمت بكم هانئاَ
2007-10-22, 04:06 PM
الاندماج بين الاولاد والبنات في مدرسه
العرض العادي
