ياسعود تكفـى لايفكـون الاطنـاب

[ام العنود]

ياسعود تكفـى لايفكـون الاطنـاب
ياسعود تكفـى قلهـم بـس ليلـه

ياسعود شفي من هوى البر ماطـاب
خلوا حبيـس الـدار يبـرد غليلـه

يكفيه من طول السنه صكت البـاب
ويكفيه من طول السنيـن المحيلـه

خلوه يسلى عن همومـه والاتعـاب
ويسج رجلـه بالفيـاض الظليلـه

والصبح يشرف له على راس مرقاب
ويشم ريح الشيح وسـط الخميلـه

خميلةٍ خضرا تقـل مابهـا تـراب
فيها الزبيـدي مثـل روس النثيلـه

وريح البختري والنفل حلو الاطياب
يشفـي قلـوبٍ بالحنايـا عليـلـه

وبالليل حول النار تلتـم الاصحـاب
وتبدا السوالـف والعلـوم الجميلـه

وكن الكواكب فوقنا والقمـر غـاب
جمرٍ تنثـر فـي مهـب المسيلـه

بالبر نسلى عن هوى تلع الارقـاب
اللي على شوفـه نسـوق الجليلـه

ونسلى عن هموم المدينه والانشاب
ونرتاح من بعض النفوس الرزيلـه

نفسي تشلع كـل ماشلـع منسـاب
طـواري الفرقـا علينـا ثقيـلـه

يومٍ طويتـوا فرشكـم خافقـي ذاب
كن الضماير وسـط حـر المليلـه

يالله طلبتـك يالولـي رب الاربـاب
تديـم انـعـامٍ عليـنـا جزيـلـه

وتغفر ذنوب اللي من الذنب قد تاب
يـارب وفقنـا لـدرب الفضيـلـه

والخاتمه صلوا على سيد الاحبـاب
رسول رب البيت راعـي الوسيلـه
وسلامتكم
************************************************** *********************
والقصيده مع التعديل و المناسبه على لسان شاعرها الرائع
المناسبه:


اثناء رحلتنا في اجازة الربيع1431هـ الى فياض شعيب الخشيبيه (50 كم شرق لينه) ورغم التوسلات للاستاذ / سعود بن عبدالرحمن الكردي (قائد الرحله) الا انه رفض تمديد الرحلـه . وانا بدوري رفضت المساعده في طي الخيام والتجهيز للرحيل علما بأنني وشقيقي عبدالله وبندر القحطاني-من لينه- الذين جهزنا المخيم حيث وصلنا قبلهم بيوم كامل(من حبنا للبر) قادمين من المنطقه الشرقيه(865كم) وسعود ومجموعته قادمين من عرعر(470كم).

ذهبت إلى احد الرجوم المطله على الفيضه اشاهدهم وهم يطوون الخيام والفرش فهاجت قريحتي بهذه الابيات التي آمـل ان تنـال استحسانكـم :

ياسـعــود تكـفى لايـفـكـون الاطــنــاب = ياسـعــود تـكـفى قـلهـم بس لـيـلـه

نـفـسي تـشـلع كـل ماشــلـع مـنـســاب = طــواري الـفـرقـا عــلـيـنا ثــقـيـلـه

يـومٍ طـويـتـوا فـرشـكــم خـافـقي ذاب = كـن الـضـمـاير وسـط حـر الملـيلـه
ياسعـود شفي من هـوى البر ماطــاب = خـلـوا حـبـيـس الـدار يبرد غـلـيـله
يكـفـيه من طـول السنه صكـت الـبـاب = ويكـفـيـه من طـول السنين المحيله
خـلوه يسـلى عـن هـمـومه والاتـعـاب = ويسج رجـله بالـفـياض الـظـلـيـلـه
والصبح يشرف له على راس مرقـاب = ويشم ريح الشيح وسط الخـمـيـلـه
خـمـيـلــةٍ خـضـرا تـقـل مابهــا تــراب = فـيها الزبـيـدي مثل روس الـنـثيله
وريح البختري والنفل مثل الاطـيـــاب = تـنعـش قـلوبٍ بالحـنايا عـلـيـلـــــه
وباللـيـل حـول الـنـار تلـتـم الاصحـاب = وتبدا السوالف والعـلوم الجـمـيلـه
وكـن الكـواكـب فـوقـنا والقـمـر غــاب = جـمـرٍ تـنـثـر في مهـب المـسـيـلــه
وماحلى الصبا لجت مع الصبح تنساب = يحـوشها ضوح الفجـر في شليـلـه
بالـبـر نـسـلى عن هـوى تلع الارقــاب = اللي عـلى شـوفه نسوق الجـليـلـه
ونسلى عن هـمـوم المدينه والانـشـاب = ونرتاح من بعض النفوس الرزيله
يالله طـلـبـتـك يالــولـي رب الاربـــــاب = تـديـم انـعــامٍ عـلـيـنـا جــزيـــلــــه
وتغفر ذنـوب اللي من الـذنب قـد تــاب = يارب وفـقـنا لـدرب الـفــضـيــلـــه
والخاتمه صلوا عـلى سـيد الاحـبــــاب = رسول رب البيت راعي الوسـيـلـه
احمد بن عبدالرحمن العريفي
(نديم المجره)