السلام عليكم ورحمه الله وبركاته
في سنة 1426 هـ شهر 2 الجو زين والربيع حلو بالذات في شعيب المحارق وانا ماقد جيتها
دبرت اجازه اسبوع , دورت اخويا لقيت اثنين شقرديه ( وليد وسلطان )
يوم الثلاثاء بدت الرحله
طبعا الشعيب ما ادله سألت واحد من الشباب ( وياليتني ما سألته ) قال اذا وصلت روضة نوره خلها علي
يسراك وتعد الضلع ( خزه – اذا ماكنت غلطان-) لين تاصل الشعيب
الشباب ( مايدلون ولا يدرون وين حنا فيه واحد من الوشم والثاني من الدرعيه )
والشباب متكلين علي انا
يقولون تدل , وأضرب علي صدري وأقول اركبوا انتم ولا عليكم
وصلت انا والشباب روضة نوره مسيان ( فبل المغرب بقليل )
وأخليها علي يسراي وامشي
أضلمت الدنيا , أنا أنقلب راسي ما أعرف الشمال من الجنوب
أثري رقيت الضلع ولا دريت وأضرب شمال وأقص الضلعان
والله ان الحصي كبر كفر السياره
تكسرت ضهورنا , ما أقدر أمشي الا ببطئ
أربع ساعات يالربع وحنا نمشي , اللي معي طفشوا وأنا مليت , معد فينا حيل
قررت وقتها اني اوقف مكاني وارقد والصباح رباح
حولت من السياره ( اول تحويله لي في الكشته )
الا باغي اطير من الهواء , والله مايمدينا ناقف علي رجلتنا
مابدهاش لازم نكمل , فكرت ثم فكرت قلت ابي احط وجهي شمال وامشي
وبعد ساعه طبيت في شعيب حولت فيه وارقد انا وربعي
اصبحنا وقمت اول واحد وأزهب القهوه والفطور وأفطرنا ومشينا
في البدايه كنت اضن اني في الشوكي وعقب ممشي نص ساعه عرف اني ما أدري وين حنا فيه
الشباب يسألوني : تدري وين حنا فيه
وانا أقول الله الله , وش دعوه ما إنتم واثقين
مالهم حيله لازم يصدقون
بعد شوي لقيت راعي غنم ( سوداني )
سألته وين حنا فيه
قال : الشحمه ( وأشر لي بيده ) 80 كيلو , وطلعت ضاحك 30 كيلو
انا وقتها نويت أنزل مع ضاحك وأروح لشعيب الارطاوي
أول ما تعديت السوداني يمكن خمس دقايق لقيت راعي ددسن واسأله عن ضاحك قال أقل من كيلوا
أندهشت السوداني يقول 30 كيلوا وراعي الددسن يقول اقل من كيلوا
وامش شوي الا انا عند ضاحك
تغدينا في روضة الخشم و تقهوينا بعد المغرب في الارطاوي وبعدها عودنا الرياض
زملاي مافي كلمه ما قالوها علي
مسوي ادل وجبت العيد
أنا قلت لازم اشتري قارمن وشريته
وكشت كشته يازين الاوله عندها
أقولها ان شاء الله في الحلقه القاااااااااااادمه
وآسف علي الاطاله
الطيــــــــــــــار
------
2006-03-07, 11:19 PM
الله لايعيدها من كشته . . . . . الحلقه الاولي
العرض العادي
