قادزيلااا في منفوحــة..((الجزء الثاني))..

[دعلج]

مقدمـــــــــــة...
ماتت الام قادزيلااا في شارع منفوحة امام مسجد بندر وماتت كل ذكرى طيبة معهاا ..
تم فتح بطن قادزيلااا بواسطة دانميت في سرة((أي خفس ملطوس في وسط البطن)) وتم تفجيرة واخرااج سكان منفوحة من امعائة((علماا بان الجميع قد عاشو على كبد قادزيلاا كل يوم يقطعون منهاا شوي لمدة 6 اشهر والحطب كاان قادزيلاا بالع شجرة كبيرة شااف عليهاا قميرية ((أي حمامة رصاصية توقع على الدرايش وتغث)) ووجد في بطن قادزيلااا مخيماات ومحلاات افتتحت لااستمرار الحياة في داخل البطن وذالك لقطع الامل في رجوعهم ومن اشهر المحلاات كودو وتم افتتاحة على الطحال ومحل كل شي بريالين مقابل الكلية اليسرى ... وتم اخراجهم جميعاا((ملااحظة قادزيلاا كان يشرب شرااب الحموضة قبل لايموت مسكين معذور لاعبين في كبدتة ))...

عمومــــآ من لم يقراء الجزء الأول فنصيحتي ان يقراءة قبل قرائتة للجزء الثاني وهي على هذاا الرابط..

https://www.albrari.com/vb/showthread.php?t=1928


الجزء الثاني للقصــة :-
رؤس الاقلاام :-
1- طرخ طرخ ..((اصوات بيبان الددسن ركبناا انا وابو سارة))
2- وش الدبرة((أي وش الحل))...((سؤال طرح نفسة))
3- الرجنـة...((شي مايفقس البيض الا بهاا))
4- بوية صفراء....((استخدمت لتهريب قادزيلاا))
5- الريحة...((سبب وصولة للبيت))
القصـــة:-
ركبناا السياارة انا وابو سارة الخول وعيوني تغورق ((أي ممتلئة بالدموع)) والدنياا سود في عيني واتذكر عيون قادزيلااا وروحة تطلع ووصيتة لي انتبة لبيضتي يا دعلووج.. والعالم لازالو يخرجون من بطنة وانا اصيح ودموعي واصلة حيزة صروال السنة والتفت على ابوسارة والقاة قاعد يحورف في المسجل ما اهتم وقاعد يطلع شريط ناشب في مسجل الددسن من شريتة والمخة بكف واقعد اقول يااخي ماعندك دم ياخي ماتذكر ها المخلوقة وشلون كانت طيبة؟؟ ياخي حس جعلك تموت مثلهاا.. واقعد اذكرة بايامناا معهاا اول ولعبناا في السطح معهاا ويوم ينسى الولاعة في الددسن وجاء بيروح يجيبهاا بيتتن وقالت قادزيلاا لاتنزل خلك اناا اشبهاا لك بس حطهاا في اثمك وماعليك ((حط ابوسارة التتنة وتغرت علية قادزيلاا تغرة نارية بزعمهاا قدحة بتولع لة الزقارة رقد عقبهاا ابو سارة شهر في المستشفى باسبااب الحروق)) والله ويتهيض ويصيح معي ((حس اخيرا)) قال طيب دعلووجي وش الحل؟؟ وشرايك؟؟ قلت يابو سارة اناا مابي احد يدري بالبيضة الي في غرفت السطح عشان مايخذونهاا الشرطة ويكسرونهاا وهي امانة من قادزيلااا لازم نشيلهاا ونوديهاا لملحقك الليلة وبدون مايدرون.. قاال قداااام...وشلناهاا وفي ديناا وعلى بيت ابو سارة ونحطهاا في الملحق..قلت عاد الحين يابو سارة البيضة ما تفقس الا اذا رجنا عليهاا ولازم نتساعد انا لي نصف يوم وانت نصف قااال قداام وناخذ اجازات وخذ رجنة على البيضة ((شكلي كني برصي((أي ضاطور)) على لمبة حديقة مدورة بيضاء صغير ومنسدح عليهاا)) وتمر الايام وبعد 25 يوم كان الدور على ابو ساارة استغربت دق علي جووال وقاال تعال بسرعة ابيك لاتصيف ضروري ضروري وجيت من عتيقة امشي بالثاني 200((لاتدققون)) وادخل وقلت خير قال تعال تكف ارجن شوي اناا حصران ابروح للحمام((وانتم بكرامة)) واخااف تمرج((أي تخرب))البيضة وبالفعل ذبيت عمري على البيضة
اثر الملعون ابو ساارة سمع طقطقة جواء البيضة وخلااني اجلس بيشوف وش بيسوي فيني قادزيلاا اذا فقس ((كالعادة نذل)) والله واتمدد على البيضة ومع البراد غفيت((أي نمت)) وفقست البيضة!!!! وحسيت كني راكب على بعير وفتحت عيوني واشوف كهف غريب ((صرت اطل في خنفرتة)) وخمني وصرخ بصوت غريب مشابة بكلمة اوآآآآآ مع حدة بالصوت ((كان وقتهاا صغير ومايطلع من اثمة ناار يطلع شرار اعدم وجهي كني مبوبز قدام مكينة لحام)) وفتح عيونة على دعلووج وتوقع اني امة!! ((وهذي خطة ابو سارة الخبيث))
والله ومعد اقدر ابعد عنة واذ رحت قعد يصارخ وخفناا ننفضح بالحارة ويوم نام في حظني غديت كني قملة في راس اقرع جنبة واسحب عمري واروح للبيت واخذ ملاابسي وقلت لمي ابروح ازين ضروسي في سورياا((كالعادة حجة الدشير)) واجيك مكيم بددسني قبل لايقوم ولدي ((عشت الجو داري)) المهم ونقوم اناا وابو ساارة نطحن في بساكيت ابو ميزان ونعبي في براميل ونصب علية موية((بزعمناا سيريلاااك)) وكل واحد معة كريك ((اداة تستخدم لتقليب السمنت عند الخلطة)) وندلي نغرف من البراميل ونكب في اثم قادزيلااا ونقوم ونخفس في الجدار خفس مقاس لي الوايت وكل يوم نجيب وايت وندخل لية مع الخفس وفي اثم قادزيلااا عشان يشرب ((بزران الحارة دلو يطقون الباب بصراويل سباحة يحسبون ابو سارة حط مسبح في بيتهم)) والله ووايت رايح ووايت جاي ومااش انقطع من السوق بسكوت ابو ميزان من كثر مانشترية وخلصت فلوسناا وكلنا عارفين اذا جاع ممكن يطلع اعصاار ناري يعدم منفوحة كلهاا ..ويطلع ابو ساارة ويدور على البيوت ويجمع خبز يابس ونخلط معة سكر لاتتغير علية الطعمة ويزعل ((خبز ماوكل وحط في خياش للبهايم)) ويجيبة واناا اربصة في البراميل ونكب في اثمة وكل يوم يكبر الين ماصار ضويق علية الملحق وتحجر فية وماطلع من الباب الا خشتة ((صار كنة في بيضة مابعد فقست ومكتمل)) والله وتورطناا وقلناا وشلون نبي نطلع ها العلة بننفضح وبيشوفونة الناس وطفرناا وتوهقناا وتاليتهاا بيقلبناا بروستد اذا جاع والله ونفرش بساط قدام الملحق ونقعد نفكر اناا وابو سارة قلت شف اناا الي علي سويتة واديت الامانة بس ابغاء ابري ذمتي تكف واودية للمكان الي لقيت امة فية وهي بيضة قال وشلوون؟؟ وشلوون نبي نطلعة ونودية كبير وبننفضح؟؟ قلت خلني افكر.... قلت بس لقيتهاا قال وشلوون؟؟؟ قلت اطمر جب اربعين سطل بوية صفراء وبوية سوداء قال ليش؟؟ قلت طس جبهاا ومالك شغل وراح ابو سارة وجاب البوية وقعدناا نقض انا وايااة الجدار لين ماطلعناا قادزيلاا واسدحة في السيب وارقاء على خدة المس في خدة واحكحك فية لين ماانام ونقوم ونستلم جسمة بالبوية من راسة لرجلينة ضربناة بوية صفراء وبعدين لبسناا بوت ((كنادر مغسلة سيارات)) وغطسناا رجلي في البوية السوداء وقمناء نطامر على جسمة كلة وطلع لونة اصفر ومنقط با اسود ((بزعمناا قلبناه زرافة)) ونحملة في قلااابي والخط السريع لسدير مكان ميلااد الام وابو سارة ماسك الطارة ونوصل نقطة التفتيش قال وشذاا الي معكم؟؟؟ قلت زرافة بنوديهاا لحديقة حيوان جديدة في سدير قااال ورى شكلهاا يختلف عن الزرفات؟؟ قلت ابد فيهاا حدبة ومعد طالت رقبتهاا وامهاا ماتت ورضعناهااا من فيلة ((والله ومشت على العسكري)) والله ونلبق القلاابي وندخل البر رجلية واذ جااع دورناا شبك غنم حق بدو وخلينة ياكل غنمهم الين ماوصلناا مكاان امة ونجلس نتغامز اناا وابو سارة ((طبعا كنت جايب الددسن استعدد للنحشة وملبقة جنب الشجرة)) ويوم اضلمت العين ونام قادزيلااا والله ونشغل الددسن ونمشي من عند وجهه الساعة 8 ووصلناا عند ركبتة الساعة 12 ونواصل لين ماوصلناا الرياض واحط ابو سارة في بيتهم وادخل على اهلي واسلم واحط راسي واناام من التعب والارهااق.... ويوم اذن العصر وتقومني امي للغداء ونجتمع كلبوناا في البراحة((أي الصالة حقت الاولين وتصير مفتوحة من فوق بمنور لدخلو النور معة)) وشوي ويهتز التبسي((أي صحن)) وترتج الاغراض الي في البيت والقدور الي في المطبخ تطيح وتقوى الهزة اقوى فاقوى وتفتح امي خشتهاا ((كنهاا صاع رز)) اشووف لوزهاا وصرخت وقالت القياامة القياامة.. قلت روقيناا يابنت الناس وش قيامتة؟؟؟ قولي على الاقل زلزال ((بزعمي خففتهاا))والله والرجة تقوى وتقوى وطااح الجبص الي بالبيت وتشلخت الجدران وفجــئة اختفى النور من البيت ((اثرة قادزيلاا مدخل خشتة مع فتحت المنور مريح ريحت امة الا هو اناا وجاي ركض من سدير)) واعدم عمارة المملكة وكورت الفيصلية لقوهاا في الخرج صفقهاا بذنبة وهو يركض المهم ويقعد يصيح ودموعة تنزل عليناا ((مثل الخزان اذا نسيت الدينمو شغال)) وتلتفت امي وتدير وجهي بكف وقالت هذاا الي ميت يالهيس الاربد؟؟؟((لم اجد لهاا تفسير في معجم ابن دعلووج)) واقعد افهم في امي السالفة شوي والقاء التبسي مار جنب سري ((تم تعريفة مسبقآ)) اثر قادزيلااا قاعد يصيح ودموعة غرقت البيت ووصلت الموية للسر ونجمع البزران اناا وامي ونركض للسطح لانغرق واطلع على الخزاان واقابل ابني قادزيلااا واقف امامة كا النفرة في بطن دب واتلفت يمين ويساار وما اشووف الا سفاتي والشرطة والحرس والدفااع المدني وجميع الامن بالمملكة محظر في منفوحة وسبع طائرات مروحية مجهزة با القنابل واناا اصيح وهو يصيح وكاان يقول لي بعيونة لية لية لية تتركني؟؟ وتوني ابقول لهم لاتطلقوون الناار واذا بصووت الطلقاات تتعالى والقنابل تنزل على علباات قادزيلاا ((كنك تسمع صووت برد على مضلة)) وعيوني في عيونة ولم يصرخ بغير امووووووواة ((يعني باللغة القادزيلية امي)) وسقط وهو مغطااء بالدمااء وسوادت عينة مافارقت عيني وتوفي وهو يناظريني نظرة ودااااااااااااااع

ملاحظة:- أي واحد يلقاء شي طايح يخلية ولايتبيثر ويتلقف مثلي ...

دعلوووج تم سجنة في الحاير ويستقبل الزيارة كل خميس...
تحياااتي للجميع....

[الشيخ]

تسلم يادعلج ولو أني ماني فاهم شئ


جزاك الله خير على تسجيلك في هذا المنتدى

فأهلاً بك في البراري وبين أخوانك


شيخ المنتدي

[منصور المناع]

هههههههههههههههههههههههههههههههههههههههههههههههههه

ههههههههههههههههههههههههههههههههه

تقطعت مصاريني من الضحك

وجعه توجع بليس ترددت على الحمام اكثر من مره حتى اهلي شكو فيني قالو وش جاه الولد

أحلى شي المثل الخطير

(( أي واحد يلقاء شي طايح يخلية ولايتبيثر ويتلقف مثلي ))

مشكور على الموضوع الشيق اني خابر نصه فقش

تحياتي لكم

[عبدالهادي المفرج التميمي]

ووووووووووووووووووووووووه يا دعلوووووووووج المدعلج

دعلجتنا الين تدعلجت سنوننا

والحين وش بيرجعنا ثانيه لا نتدعلج

مشكوووووووووووووووووور





سلام

[مبارك]

امنا بالله وش هالقصه اللي تروع
سلمك الله

[طير بر]

الا تعال وش قادزيلا ؟؟؟؟

وش خليت وش ما قلت

خخخخخخخخخخخخخخخخخ

[المطيري]

وش سالفتك اخوي دعلج

والله طلعت الصمرقع في روسنا

وين البندول

ربي يسلمك وننتظر جديدك

[سحاب الصيف]

ههههههه

ههههههههههههه

ههههههههههههههههههه

حلو قادزيلا في منفوحة

وعقبال سلسلة القصة



اخوك
خالد السكران

[صياد الضبي]

على الاقل نفتك منه ستت ايام في السبوع

ونرتاح من هالدعلج

تشكر اخوي على سعة صدرك وقصصك الحلوة

[الشقــــاوي]

والله القصه اللي كلها نصب واحتيال
وين ما صارت قادزيلا منفوحة هذي في سوق التكارنه في جده