هب البــــراد
هب البراد وزانت علوم الاجـــــواد
وكلٍ طرى له من طواريه طـــــاري
يا مرحبا بسهيل يا نجم الاسعـــــــاد
والوسم عقب سهيل جا له مـــواري
اقفى ربيع اول وثاني مع جمــــــــاد
وجماد الآخر مع رجب يا مشـــاري
وشعبان مع شهر الفضيله و الاعياد
وتالي شهر شوال ليل ومســـــــاري
وتباشروا بالخير صـــــــادر و وراد
والنار شبوها بليل الغـــــــــــــداري
في جنبها دله ونجرٍ وبـــــــــــــــراد
يا زين صف دلالهم والغـــــــــواري
يبون مرباعٍ ورا الضلع من غــــــاد
الله على شوف الزهر والشقـــــاري
مشهور يا مشهور سند لي اسنــــاد
عطني علوم المنتدى و البـــــــراري
عطني علوم اهل المعرفه و الارصاد
يدرون و ادري و انت يا ابـوك داري
يا ابوك هذولا هل فعول و امجــــــاد
يشرون الاصلي ما يبون التجـــــاري
ما عاد لي ف البيت يا ابوك مقعــــاد
مليت من شــــــوف الذرا و الذواري
واليا انشدوا عني شغــــــاميم الاولاد
اهل الطناخه و التفــــــق و السواري
قل راح ابو مشهور للصيــــــد طراد
هد الصقور و زان طـرد الحبـــــاري
يحرم علي النوم والشـــــــرب والزاد
الين اشوف مجرهـدات الصحـــــاري
شاعر البراري
فهد بن إبراهيم المفرج
(ابو مشهور)
2010-10-10, 08:54 AM
العرض المتطور
