أشوف عيون كل الناس تسألني عن اللي صار
ولو ما تنطق الألسن ترى النظرات فضّاحه
تبي تعرف حكايتنا بما فيها من الأسرار ؟!
تبي تعرف شقانا بعد ما ضنّت لنا الراحة
تبي تعرف من الصادق وتبغى تعرف الغدّار
تبي تعرف من اللي من خويّه ينقل جراحه ؟!
تبي تعرف من اللي كان من شان الهوى صبّار
يشوف الظلم من خلّه بمسراحه ومرواحه
وتبغى تعرف اللي في طريق التضحية ما سار
ونفسه للأنانية .. وحب الذات .. مرتاحه
من اللي لاجل محبوبه تحدى الحظ والاقدار
من اللي لاجل يسعد لاخر يعاني من اتراحه
من اللي في طريق المكر والحيله قطع مشوار
من اللي كان منّا منخدع في حب ذبّاحه
من اللي كان منّأ يتقن التمثيل في الأدوار
من اللي كان ما يسمح لخلّه كلمة مْزاجه
من الصادق باحاسيسه ومن قلّد على التجار
من اللي حط خله راس مال ٍ له مع ارباحه
من اللي جامل الثاني كثير ويقبل الأعذار
من اللي في ظهر من يامنه قد وجّه سْلاحه
من اللي لاجل يرضي نفس الاخر يتعب الافكار
ومن بالعكس في تنكيد الاخر تكْمل افراحه
ومن حبه بوسط القلب لا يبلى ولا ينهار
ومن حبه كما غصن ٍ يميل ان هبّت ارياحه
من اللي حط الاخر في النهاية بين غار ونار
وضيّع ما بقى من ود حيث الكيل طفّاحه
من اللي كان ينصح من .. ومن ما يسمع الاشوار
من اللي بالليالي الحالكه فرّط بمصباحه
أخيراً صلب موضوع الحكاية من هو البوّار
وقلبه ما عرف من صادق الحب اصغر رماحه
تكلم واشرح الموضوع .. لا تترك عليه غبار
ترى العالم لتفصيل الخبر بالحيل شبّاحه
من الزلفي
2013-09-22, 03:18 PM
أشوف عيون كل الناس
العرض العادي
