جزاك الله كل خير اخى الكريم وجعلك من عباده الصالحين
ساورد هذا الموضوع المنقول واعذروني على القصور
من واقع تجارب شخصيه ومن معارف شاميين من اهل الشام اتمنى ان يستفيد منها بعض القراء
بالنسبه للسكن فيختلف اذا انت تحب البرد مره فعليك بالزبداني بس افخم فله واطلق فله بتاخذها دورين بمسبحها ماراح تتعدى 2000 ليره سوري يعني 138 ريال سعودي لاني متعود اخذها بهالاسعار وباوقات احلى واروع قبل بداية اجازة الصيف باسبوع او اسبوعين طبعا ماتعامل مع اصحاب مكاتب ابدا لان التعامل معهم متعب جدا ووجع راس
السكن في الشام نصيحة اخويه اسكن في مزه الجبل واترك عنك باقي مناطق الشام خاصة مايسمى البرزه لانها موطن النصب والنصابين مزة الجبل تمتاز بعدة اشياء اولا نظافة الشقق من داخل واهتمام اصحابها بشققهم لاتنظر لشكل العماره من الخارج بل خش لها من جوى وراح تلقى العجب . وايضا الامن فيها عجيب بسبب ان الاستخبارات هي من تحمي المنطقه ففي الصباح الباكر تستطيع ان ترى اكثر من رجل امن في شارع واحد بحيث ترصد حركة الداخل والخارج من المنطقه
توجد عمائر اسكان كبيره بمزه الجبل لا انصحك ولا انصح اي مسافر ان يذهب لها نهائيا.
اذا قدرت ان تستاجر الشقه بدون شغاله فهو افضل لان وجودهم مثل عدمهم وثانيا ائمن لك ولاغراضك
تاكد ان صاحب الشقه سوف يدخل الى شقتك للتفتيش في اوقات يكون متاكد انك لست فيها.
في احد السفرات تراهنت انا وصديقي على ان راعي الشقه يخش الشقه ماصدقني قبل ان اخرج وضعت قطعة نشاف صغيره في طرف الباب لاترى الا طرفها وخرجنا وقبل ان نخش نظرنا الى القطعه ووجدناها طايحه وكاد صاحبي ان يعمل مشكله بس قلت له لا خلاص هو فتش الشقه وماحصل فلوس فالافضل نسكت لان حاليا هو تاكد ان مافي الشقه اي شي يؤخذ.
ايجار الشقق تاكد من وقت الخروج وليس كما يكتبون سبعة ايام فهم يكتبون سبعة ايام وهي ست ليالي فقط تاكد من الحسبة المظبوطه.
بالنسبه للاسعار ومايسمى بالنصب فنحن من جنى على انفسنا توجد نسبه غير بسيطه من المسافرين لايعرفون بالاسعار ولا يسالون قبل ان يذهبوا وفي نفس الوقت مايكاسرون فتلقى السوريين يستقلونهم اكبر استقلال وسارد لكم بعض الذين صادفتهم
كنت انتظر في عيادة طبيبة اسنان وكان بجانبي سعودي كبير بالسن ومعه سائقه جنسيته فلسطينيه التفت لي الرجال وجلس يتكلم معي عن الشام وانه اول مره يجيها للعلاج بتوصيه من احد زملائه فاثنيت عليه اختيار هالطبيبه وسالني عن السكن فقلت له وكان موسم عيد انا ساكنين ب2500 ليره في اليوم مع الشغاله
انصدم قال وين هالاسعار من خشيت سوريا وارخص شي لقيته 6000 ليره ؟؟؟؟؟؟؟؟؟ قلت له ليه بتسكن بقصر الرئيس . فخبرته انه منصوب عليه والسائق يقولي والله اني منزله السعر من 60000 ليره الى 56000 ليره لمدة اسبوع . نظرت للرجال وعطيته موجز كامل عن الاسعار من يخش سوريا لين يطلع حتى سعر الماي خبرته ماخليت شي ينقصه من معلومات .
من هنا نعرف لماذا نرى مبالغه في السعر فالسوري اذا طولت معه يقول ان شاء الله يجيني شخص غشيم بالاسعار
اسعار التكاسي باليوم : داخل الشام اذا غير موسم 800 ليره تقريبا في اليوم والبنزين عليك بالطبع لاتملى الخزان ابدا ابدا له وفي وقت المواسم 1000 ليره باليوم.
واذا رحت محل لاينزل معك السائق ابدا ولا تاخذ بااي نصيحه منه لان اغلب اصحاب المحلات الفاشله يتعاملون معه حتى المطاعم وياخذ عليهم عموله ( كومسيون باللهجه السوريه ) واذا خشيت اي محل حتى لو كان محل باسعار ثابته راعي المحل راح يرفع عليك السعر اشوي لان هالسوري معك وراح يرجع لنفس المحل وياخذ نسبته بالقوة لان هالشي عرف متعارف عليه عندهم.
انا شخصيا افضل اجي بسيارتي او استاجر سياره بالشام. سعر ايجار السياره طبعا يختلف على حسب نوع السياره لاكن سوف اعطيكم اسعار سيارتين مختلفتين وباسعار مناسبه
كورلا موديل السنه وكاملة المواصفات 1500 ليره باليوم كيا اوبتيما كاملة المواصفات 2000 ليره باليوم
طبعا قبل ان تستاجر سياره شيكها بالكامل خاصة الزيت لان النظام بسوريا لو خرب القير او اي خراب انت مسؤل عنه حتى لو خبطت المكينه . وتاكد قبل ان تسافر ان تذهب الى اقرب مكتب وتدفع مية ريال ليترجم الرخصه لك حتى تستطيع ان تؤجر اي سياره مؤمنه بسوريا وانت مرتاح.
اذا كنت اول مره تسافر وتخاف ان ينصب عليك فالامر بسيط اعرف سعر العمله قبل كل شي وسعر صرفها ولاتصرف الا من محلات كبيره لتجنب الوقوع في عملات مزوره.
عند التعامل عط نفسك ثقه وكانك متكبر وواثق وفاهم . عندما يعطيك السعر بالف ليره فنزله الى سبعين وخمسين ليره كسره قبل ان يكسرك وخلك مثبت على اول سعر وراح تشوفه ينزل اشوي اشوي لين ياصل للسعر.
اذا كنت لاتعرف الاسعار فالامر بسيط سعر الشي الذي اشتريته حول قيمته من ليره سوري الى قيمة عملة دولتك فان كان اكثر او متساوي مع قيمة عملتك فلاتشتريه ان كان ارخص بنسبة خمسين بالمية فتوكل على الله ففي كلا الحالتين انت ربحان حتى لو نصب عليك بمبلغ بسيط.
لهواة الصيد والمقناص : قرية اسمها القريتين نصيحه اخويه لاتفوتها فكل عدة الصيد هناك متوفره
في النهاية اتق الله في سفرك وان شاء الله ربي بيوفقك بالسفره .
اجعل سفرك للاطلاع والتمشيه ولاتجعله ضائعا بين سهر الليل ونوم النهار كاملا .
2007-06-29, 02:14 PM
قبل أن تذهب إلى سوريا معلومات تهمك
العرض العادي
