مع إشراقات الفجر الجديد

[أم فهد]

عهدي بها من قبل تلبس عبايــــــه ... وأنا بعد قبل البس شماغ وعقــــال!!

طفلين نتهجّى حروف البدايـــــــه ... الله يا محلا سواليف الاطفــــــــال!!

كانت لنا في كل شارع حــــــكايه... وكنّا نقول علوم ماهيب تنقـــــــــال!!

وكنت اتقاسم مامعاها معايـــــــــه...من(عسكريم) التوت للعلك ابوريال!!

وكانت بعكسي شاطره بالقــــرايه...تقرأ جزء عمّ وطـــــه والانفـــــال!!

وأنا لك الله من مواري غبايـــــــه... مدري ابو نقطه هو الـــذال او دال!!

وكانت لأبويه تشتكي من شــــقايه ...وتعلّمه كيف اربط الباب بحـــبال !!

ياما على ظهري كسر من عصايه...يقول لي:خلّك وأنا ابوك رجّـــــال!!

وامي تقول: إدع لولدك بالـــهدايه...خوفي تصيبه كثرة الضرب بهبـال!!

لاشفتها مع اول الدرب جايـــــــه...مدري أنا اللي ملت ولاّ الوطا مال!!

احسّ قلبي يرتجف في حشـــــايه...ماكنّه الاّ الضيف لاهزّ فنجـــــــال!!

ياما عن"السّحلي" تخبّت ورايـــه...لاخوفوها فيه ثم شافت ظـــــــلال !!

تقول:خلّك ياحبيبي معايـــــــــــه...واسّتأنس العب عندها دور الابطال!!

وآغار حتّى من عيون اصدقايـــه...لاطالعوها قلت: تكفون ياعيـــــال !!