متى سموم القيض عنا تقفي؟؟

[رعد الصحاري]

أنا على المقناص قلبي يرفي *** فترة ونرجع يم اهلنا مناكيف

بديار لفروق الحباري تلفي *** جنوب من حزم الجلاميد وطريف

الطير هو غاية غرامي وشفي *** أقدره تقدير الأجواد للضيف

من كبر قدره شايله فوق كفي *** وأرعاه تسع شهور بالقيض والصيف

وادهنه لا شفت ريشه مصفي *** على الدعو واخفف النسر تخفيف

نقله يشرفني وشوفه يكفي *** عن شوف ناس ما تعرف المعاريف

لا شفت لي نوّن بروقه ترفي *** نويت أجهز موتري للتكاليف

القيض كله جالس ومتعفي *** برد المكيف نشف الدم تنشيف

متى سموم القيض عنا تقفي *** وسهيل قبل عمّد الفجر قد شيف

والنار يصلح شبها للتدفي *** والبربد نوجس من نسيمه هفاهيف

قمنا لعزبتنا نشيل ونضفي *** ونكمل الناقص ونملا المطاريف

اللي نشيل من اللوازم مكفي *** مكتفين العفش بالحبل تكتيف

يمكن اليا جينا البقالة نوفي *** حاجات نشريها كمالة مصاريف

والصبح من حزم ابرقيه مقفي *** صوب المعظم والهضاب المقاييف

بديار جعل اشجارها ما تجفي *** تعلها غر المزون المراديف

في رفقة اللي نارهم ما تطفي *** على الشرف والجود ربعن مواليف

مجلاس طلقين الشوارب بصفي *** على الدلال الي بهن صخّن الكيف

خويهم ما اوجس كلامن يحفي *** غير المزوح الطيبة والسواليف

عقال وزن عقولهم ما يخفي *** ولا هم على الفاضي خفاف وملاقيف



نقلا00