الصيد واجد والزبيدي مفاقيش

[الذعذاع]

بسم الله الرحمن الرحيم
السلام عليكم ورحمة الله وبركاته

هذه قصيدة للشاعر عبدالرحمن بن سعود بن صقر العتيبي … والقصيدة تعبر عن نفسها.

قالوا علامك دايم الدوم طارش
توك صغير وش تبي بالمطاريش

قلت اعذروني من هواء البيض طافش
العله الي ماقوتها المناقيــش

لو افتحوا بالدار كل الدرايش
يضيق صدري بصكة الباب حتيش

مثل السمك في غبت البحر عايش
انا بغير البر ماظني اعيـش

وإن كان من يربى على الصيد طايش
انا حياتي كلها طيش في طيش

يومي على كسب النواميس حايش
سدي متين عن جميع التشاويش

ماني كما اللي عايش بالولايش
اخاشر الشاهين في لقمة العيش

لي قلب على نظم الابيات جايش
ينقش خوافي خاطر الفكر تنقيش

وانا الذي ولفت قرب الوحايش
وكفي غدى يزهاه كثر المخاميش

ليا انطلق "وضاح" للجول هايش
يزهو اقشوع من حواليه بالريش

طيري لا طروا الهدد والمكافش
ماهو هزيل يهاويش الخرب تهويش

ولا هو بقرناس وجذب العشايش
فرخ اقطامي باقين فيه توحيش

يغشاني من الغربي سحابن رشايش
وسميتن تروي الفياض المعاطيش

تسقي فروع السيسبي والمفارش
وتلاع لاهـه يرتدم سيلها هيش

ودي ليا نبت الزهر والحشايش
الصيد واجد والزبيدي مفاقيش

نركب على اللي مابقلبه غشايش
جمس جديد يناوش القاع تنويش

حليب شاهي والمكينه غوايش
وحنة شكا مينه تنعش الروح تنعيش

وربع ليا صكت عليه الهوايش
مابينهم بايق ولا فيه درويش

مجلاسنا روس التلاع الرهايش
بأرضن قفر عشبها تو ما نيش

ماطبها الطرش الهمل والدبايش
وفيها القطى ماجفلته الخراطيش

الشيح والقيصوم مثل العرايش
والديدحان كنه شفاة الطخاميش

ياطالب الونسه قبل النعايش
هاذي الحياة وغيرها لا مافيش

منقول

[الركام]

صح لسان الشاعر وصح ذوقك ياابو زياد
اختيار موفق
شكرا لك

[مدور الغيث]

لي قلب على نظم الابيات جايش ***ينقش خوافي خاطر الفكر تنقيش

أبيات جميلة . مشكور يا الذعذاع .
ولكن هذا البيت الا توافقني أنه مكسور في شطره الأول ؟.

[الذعذاع]

هلاااابك يالركام
صح الله قلبك أخوي
لاهنت

[راع الزلفي]

ماطبها الطرش الهمل والدبايش
وفيها القطا ماجفلته الخراطيش

لاهنت يالذعذااااع ولاهان ذوقك...
وصح لسان العتيبي على هالابيات الحلووووووووووووه..

[الذعذاع]

مدور الغيث
هلااااااابك
تصدق لقيت اكثر من بيت عليه ملاحظه ويعلم الله اني خليتها باشوف من ينقدها
لاهنت يالغاااالي
وأشكرك على مشااااركتك القيمه

[الذعذاع]

راع الزلفي

مااااالك مهوووونه يالغاااالي
ومشكوووور على الإضافه
حضووور السعد والله

[راع الزلفي]

لي هاجسن في نظم الابيات جايش
ينقش خوافي خاطر الفكر تنقيش

أتوقع كذا وشاعرها ابخص....

[الذعذاع]

جااااااايز ياراع الزلفي

وما آآآآآفت الاخبار الا رواتها
هذا بلا ابوك ياعقاب
تلقى الشاعر كاتبها صح وموزونه ويتناقلونها بالمنتديات ويعفسونها عفس

[احساس انسان]

صح لسان شاعرها وتسلم يمنى ناقلها

اهنئك على ذائقتك العذبه