ابـاخـذ الاجـازة والهـدف سجه المر باع=عـسى الله يساعد يا حمد نأوي النية
مـعـي في اكس أر آلفين ومسنع الاسناع=وعـندي عزيمة قـلــب واريا وحريه
فـحصنا على المـوتر ومايـطـلبه في ساع=وشـيـكـت بنـزينه وجهـزت مبـغـيه
ابـي لســتوى كـنه خـريـش حـداه صـداع=تويـقـاد شيـهـان فخـت كـف راعـيه
الـى انحى مع خاطي نـظيم كما المـطلاع=خـطير عــليه يطــير لـولا كراسيـه
عليه الـدريول سايق صاحي عـقـل وذراع=غــرامــه طـريـق مــاتوقـف تواليـه
أخـذنا بعـض لغـراض من شيـشة الهـزاع=وبـاقي المـقاضي تــونا فـالـنـعيريـه
وفـرقـنا مع خـط يـجي من شمـال انطاع=وشـفنا مـبادي طـارف الديرة الـحيه
نسـفنا اودمـات يـسار ويـمين حـزم سـباع=وشـفنـا مـلازم باطـن الريـش مـمليه
وظـهـرنا يـسار حمـار قـريه مـع المهـياع=هبوج وحتف وفياض وبحار حزميه
وظـهـرنا عـلى جـباه اللهـابه وذاك الـقـاع=وجـو عـشـيريـا والمعـارج شـمالـيه
نسـفـنا الـصداوي والهـدف بـدونا النجـاع=بجـوف الشعيب اللي تطارد خباريه
وشـفـنـا نـبات الـقـاع يـومي به الـذعـذاع=خـزامـى وصفـار ورقـاريق وسميه
وشفنا الزبيدي بين سود الحصى صلاع=وريح الخزامى ينعش الروح ياحيه
وشـفـنـا مـجاهـيـم تـدق الرضـم وشـباع=تــجـول بـجـو راغـبـاتـه رواعــيـه
عــراض الـمـثـاني جملة والنحور وساع=وفـجـح شـمايلها عـن الـوزر قـفريه
تـحـلوز سنام ظهورها اللي يجي له باع=طــوا ل غــواربهـا سـنـاد هـلا لـيه
لـيـا قـاسها المـربوع شـبرا ورا لـكـواع=طــوال الـرقـاب مـقـلدات بـمـقـطيه
يجي خدها شبرين كان الهـدف مـاضـاع=مـربـع هـوام بـيـن شـلـف الـيـمانـيه
ليا رايعـت لك وانت في جنبـها تـرتـاع=كـما القـايد اللـي مـزعـليـنه فـداويـه
الى مـا أقـبـلت كنها هـنوف بدون قـناع=طـويلة قـوام وشافـت اللي تبي جيه
بها من بنات الريح زوم وفـخر واطباع=تـشـانـق بـسـيـر كايـداتـه مـواطيـه
والى حـورفـو في شـدة والحلال انـزاع=لــهــي لوله ماهيب ترعى بـتـالـيه
زعـوج تـلـم الـقـاع عـوبا على القـراع=وراها الدبش بطح تحـفـت سماريه
وان حطو مزاين فالـمزاين خبرها شاع=مابين الدبـش هـضبة نظـيم لها فيه
الى شافـهـا العراف تمـشي كـما الـفراع=يـتـيه النظر فيها وتـكـثر طـواريه
يعـود وذوده في عـيـونه تـقـول اضـباع=عليهـا قـصر حتى العـلـف والمحنيه
وبـديـنا عـلى رجـم يـعـدي به المـلـتـاع=وشفنا البيوت السود فالروض مبنيه
بيوت الشرف مابين خمس وست ارباع=بـهـا لـلنـشـامـا كـيف من كيف بريه
بها للـنـشـامـا مـنـسـف وان لـفـوه جياع=عـلى كـل حـزه ماتـوقـف مـسـاعـيه
وفـيـه الـدلال مـسـاطـرات لهــن لـمـاع=ثلاثة فصول وثـالـثـتـهـن عـويـديـه
على مجـذويا فوقه الـسـمـر حـط اتـبـاع=وشـغـلا نـظـيـف حـايـفيـنه شقرديه
ومربالعشا الشايب وجات الصحون انواع=فـقـارة قـعـود وحايـلـيـن كـــرامـيـه
ودارو بـعـدهـا الـكـيف واستـتبعه نعناع=وزادو وقـود الـنـار بالـسـمـر مثـنيه
وكــمـبـودي ماكــاسـرو عـنـده الـبـيـاع=يزورون سوقه لو تصعـب مـشـاريه
وقـامو على الخـلفـات كل العيال افزاع=وكـلا عـلى وجـهـه مـلالـه حـواظـيه
عسى الله يعيد الغيث ويحسن الاوضاع=عسى كـل عـام يـنـزل الـوسـم دوريه
نشـتـت به الهـوجاس ونشتت الاوجاع=مـدام الرجـيـل تـسيـر والعين صحيه
حـياة بـدون الـبـر ما ضن فيها أطـماع=علي الحــــــرام انـهـا الحياة الشقاويه
حنين الرعد والبرق والغـيث بالاجماع=يـعـوضـك بالاسهـم والحياة الثـقـافـيه
تـقـفـو عن الـدنـيـا زحـول بـهـا بـتـاع=وعـاشـو بـلا فـلـه ومنـصب مـديـريه
ولا فيـهـم الـتـاجـر ولا فـيـهــم الزراع=ثـمـن رزقـهـم سـلـة عـريـني وجنبيه
وتمت وصلى الله على المصطفى الشفاع=شـفـيع امـته يوم الحشر والـمخـطريه
بـيـوم يـعـــود خـيـر لـلسـجّـد الـركـاع=وشراً على العـاصيـن كـسـابة السيه
الشاعر: ناصر بن حمد ابن لقرع الهاجري
2006-06-26, 05:37 AM
ابـاخـذ الاجـازة والهـدف سجه المرباع
العرض العادي
