نوع البشر فالطيب مثل السحابه

[الذعذاع]

بسم الله الرحمن الرحيم
السلام عليكم ورحمة الله وبركاته

الله من قلب سطى فيه هاجوس
زاد العنا به يوم حالي سطابه
مكن صوابه دون دقات وجروس
واحتل دار مبطي ما هقابه
وأنا أدري إن الوقت تجريب ودروس
ونوع البشر فالطيب مثل السحابه
أحدن تمرك غيمته كنها شموس
وأحدن غمامه مير ما حدن درابه
أحدن سحابه رش هتان بطعوس
وأحدن تمري رشته في ترابه
أحدن مناقيعه مثل محكر رسوس
وأحدن يقشوع أرضها والشعابه
أحدن مثل مزن به السيل محسوس
وأحدن يضك الاوديه غزر ما به
هذا وانا ماني على الناس جاسوس
لكن فعول الناس ماهي تشابه
قلته ولا ودي على قولي فلوس
ولا اعد نفسي فاهمن بالكتابه
أوجزت موضوعي والاكثار منكوس
كثر الكلام يعيب من هو حكابه
وصلاة ربي ما ضرب قمع نادوس
وإعداد صيدن حايم في هضابه
على محمد سيرته خير محروس
نبينا المختار ربي هدابه


وسلامتكم
الذعذاع