هذا شاعر بعد ماجرب الدنيا وصل الى هذه القناعه اعجبتني الابيات ونقلتها لكم الشاعر محمد الجذع وجزاه الله خيرا
يا مطورين الذات بحثاً عن الذات
أنا بعد طورت ذاتي بذاتي
لأنني غيرت روتين الأوقات
ولها السبب قدرت أغير حياتي
ماعاد أفكر بالسنين القديمات
ولا شيل هم سنيني المقبلاتي
اللي مضا ماهوب راجع بعد ما فات
والجاي يمكن قبله الموت ياتي
يعني أعيش اليوم واليوم ساعات
واللي يبي الراحه يسوي سواتي
العمر رحله والليالي محطات
والموت رمحه مثل رمح الزناتي
أثري منول عايش في متاهات
ومقزرٍ عمري على ذكرياتي
لكن بلا تعقيد واحزان وآهات
قررت الملم ما بقا من شتاتي
وعملت في نفسي شوية إصلاحات
واصلاحي لنفسي على نحو آتي :
بنيت في الصدر مساجد وروضات
والتهجد ضروري يوم غيرك يباتي
واحفظ من فضل الولي عدة آيات
وارم غبار الحزن والأغنياتي
وانا سويت فلتر للهواجيس بالذات
والحزن داخل سلة المهملاتي
ورتبت بالترتيب بعض الملفات
وحطيت بالرف القريب أمنياتي
وركزت في وقتي على الأولويات
والأول الأهم عندي صلاتي
واثنين بالاثنين بر ومرضات
بأبوي وأمي سلوتي مع غناتي
والثالث الإحسان مع المساوات
لعيالي الغالين ويا بناتي
والرابع أمشي ما حسبت*المسافات
لأن السفر ألقابه أجمل صفاتي
وخمسه حرمت الذات بعض الملذات
والإتزان أصبح سمه من سماتي
والحمد لله عايش في سهالات
متريحٍ بالي ولا عاد أحاتي
يعني كذا ماني بحاجه لدورات
في عقلي الباطن أو ايحاء ذاتي
أنا فقط محتاج رب السموات
يغفر لي ذنوبي بساعة وفاتي
الشاعر/ محمد الجذع
2015-08-30, 01:06 PM
رائعة من روائع الشعر والشعراء ... يا مطورين الذات بحثاً عن الذات *** أنا بعد طورت ذاتي بذاتي ...... مما راق لي ... أخوكم المحب / الوااا(بالله)اااثق
العرض الشجري