بالعود والصفري ودلة الفنجال..واجبك يا بنت الا صول الكريمه

[ابو هديان]

حتى وردني على تالي الليل جوال ... وانا على شاهي وبسكوت ديمه

الرقم بايخ لكن الصوت قتال ... كأنه مثل صوت المذيعه حليمه


قالت مساء الخير يا طيب الفال ... قلت ارحبي ترحيبة مستديمه


بالعود والصفري ودلة الفنجال ... واجبك يا بنت الاصول الكريمه


وردت بضحكه ! وقالت وش الحال ؟ ... قلت اشهد ان الحال عقبك سقيمه


وقالت وهي تضحك بعد مثل الاطفال ... وانا بعد كني بدونك يتيمه


من يوم قالتها تزلزلت زلزال ... من فجعتي كني مسوي جريمه


قلت ارفعي صوتك ترى ما به ارسال ... كذاب لكن المصيبه عظيمه


قالت اقول ترى هرجنا طال .... ممكن تصاحبني تراني وسيمه


واسمي الحقيقي اول حروفه الدال ... لكن يسموني البنات الزعيمه


صحيح احب الفخفخه واعشق المال ... لكن تراني طاهره مستقيمه


ما عندي مغازل ولا لعب يهال ... ما عندي الا في الشرف والحشيمه


بس الصراحه قلبي لشوفتك مال ... واصبحت وحدك جالس في صميمه


فكر بعقلك واترك القيل والقال ...واحذر تطيع اهل العقول العقيمه


وارسل علي الحين خمسمية ريال ... اشحن بها جوال اختي غنيمه


او طقم غالي فيه خاتم وسلسال .... اروح به في عرس ولا عزيمه


قلت الحقيقه ماني برجل اعمال ... ولاني بتاجر والموارد عديمه


انا الصراحه شبه عطال بطال .... وعلاقتي بالفقر جدا حميمه


والراتب الله يرحم الحال ما زال ....محدود والمصروف ربي عليمه


والدين بالآلاف والبنك شغال .... يآكل فلوسي بالربا والظليمه


والسوق طايح والغلا ضيق البال .... والموت والله صاير اكبر غنيمه


قالت تحمل بس والحمل ينشال ... خلك شديد الباس صلب العزيمه


ياخي تصرف جعلك تصير نشال ... اهم شي النوايا السليمه


لابد تفهمني على كل الاحوال ... ما دمت من اهل العقول الفهيمه


قلت اي والله فاهم اللي على البال ... لكن ترى هذه علينا قديمه


يا بنت هذا صاير اليوم موال .... للي تبي تلعب على ابن اللئيمه


يا بنت ما تدرين كم في محتال ... يلعب على الحبلين وانتي غشيمه


يا بنت كم من جاهله دمعها سال ... من عقب ما جات العواقب وخيمه


والبنت لاقتفى عرضها بيد الانذال ... والله ما يبقى لها اي قيمه


قالت تبي ولآ فخلًك على جال .... مهوب ناقصني نصايح حكيمه


عز الله انك للاسف منت رجال .... وانك قليل الذوق ما فيك شيمه


يا لعنبو اللي ما يسطرك بنعال .... حتى يعلمك الغزل يا بهيمه
مممنقول

[سراب]

ههههههههههه رااااااائعة
احسنت يابوهديان ربي يصلح احوال شباب المسلمين

[ابا حفص]

أول مرة أقرأ مثل هاذي الأبيات
واسلوب عرضها شيق وأفضل شيء فيها النصيحة في أبياتها
شكرا جزيلا لك

[ذيب آجا]

عزالله انها قصيدة.مشكور على هذا الذوق الرائع..اسجل اعجابي الشديد..

[مقطع العروق]

رووووووووووووووعة اخي الفاضل

ابيات من ذهب .. واتمنى لو اعرف من قايلها

يعطيك العافية اخي الكريم فيما نقلت