سحاب شقراء -سواليف الاولين ايام بيوت الطين والحياه الطيبه

[الركام]

تعيش يالشيخ الامام
في كل فن لك طروق

والشكر لك والاحترام
ماشيف لمع للبروق

من رافقك ماله ملام
يلقى علوم وزين ذوق

واقول يوم الطير حام
يرقى على متنك بشوق

وش قال لك من الكلام
وش قلت له من الطروق

[سحاب شقراء]

ههههههههههه ماقالي شي ولا قلت له شي
انا خابر منتاب مشيها سالفه الطير

[سحاب شقراء]

السلام عليكم ورحمه الله وبركاته
على طاري الطير يالغالي الركام ذكرت سالفه حاصله لي ونا توني بزر يمكن تسع سنين وحولها
كان عندنا بيت طين كبير وذكر عدد درجات الدرجه 44 زلفه ونا راقي في الطايه او السطح اذكر ونا جاي احول شفت على الفتاش الفتحه الي يطلع معها الدخان نسميها في شقراء الفتاش او النبر وهل الزلفي يسمونها السماوه
المهم شفت على الفتاش رجال صغييير ونا شفته ولا ماشفته وجيك منطلق مع الدرجه وتدربا الين وصلت المجبب من الروعه ولا هذا ابوي جالس يتقهوا وقوله رجال صغيير رجال صغيير قاعد على النبر ويجيك ابو ياملا الفردوس يركض يقول تعال ورني ذا الرجال وركض معه يوم جينا ولا هذا هو ماراح ويوم شافه ابوي قال هذا رجالك قلت ايه شفه قال هذي الله يصلحك بومه مهيب رجال الله يصلحك ونا وش دراني عن البومه ان هذا شكلها
اذكر الا نمنا في الطايه ايام الصيف نشوف طير ويقولون هذا طير العشاء ولا ادري وشو بعد طير العشاء

وسلامه قلبك يالركام الغالي

[سحاب شقراء]

يالله تحييهم
توي كاتب سواليف ساعه ونا اكتب والله يخلف يوم جيت اثبتها قال ماسجلتا الدخول ونا مسجل وطارت الطيور برزاقها الي جاي احسن انشاء الله تعالى

[سحاب شقراء]

بسم الله الرحمن الرحيم
الا بذكر الله تطمئن القلوب- لا اله الا الله وحده لا شريك له

يالله تحييهم وليا حيا كثر ولا كثر تنثر من زود حبي لكم جميع
ادري اني ابطيت عليكم جعلكم ماتفقدون غالي ولا رخيص وش زوده الله يحفظكم ويجعلكم من اسعد خلقه كبيركم وصغيركم ذكركم ونثاكم امين يارب العالمين

انتم ماتدرون وش الي جرالي
رحت يم
اماره الرياض كلكم تعرفونها وش السوق الي قبال الاماره هو اسواق المعيقليه
انتبهو وعلمو ربعكم لا احد يروح للمعيقليه في الليل حتا شوارعها الي حولها ونتبهو للمواقف الي تحت جعلكم ماتشوفون شر
فيه اثيوبيين او عيال عمهم مدري بس نفس البويه
انتبهو اكثر شي لراعي الدباب يجون اثنين ولا وصلوك يخمط مخباتك الي في الصدر بالي فيها
تدرون ان مخبات الصدر نسميها مخبات الساعه منول يحطون فيها الساعه
المهم والله يعين على المهم
رحت يم اسواق المعيقليه وموقف بعيد وجيت امشي ونا هلحين قريب من المعيقليه وهواجيس رايحه وهواجيس جايه بالحالي رايح وقبل اقطع الشارع ودخل المعيقليه ويجوني اثنين على دباب ويقرب مني ونا ياغافل لك الله
وبلمح البصر ولا كل المخبات معهم راحت قريشاتك ياسح سح هذا اسم الدلع سحسح
ومن قو سحب المخبات طحت على بطني كل هذا كوم والروعه كوم
ويجون الناس سالم سالم ويوم كثرو الناس ونا على طيحتي وتسببت بزحمه السيارات لان عصاقيلي وسط الشارع
ولا فيه واحد من بعيديقول هو حي ولا ميت
وجلس على حيلي وقول وين انا فيه وشجايبني فيذا
انتم خابرين الروعه
خل ادعي عليهم يالله اني ادعوك جعل مايقبل احد فلوسي
وجعلهم للفقر الي اضوق من خرم الابره

وقبل امس في تويترشايب ويصورنه بناته يقول رحت للمعيقليه وسرقوني مخبات الصدر راحت كلها نفس طريقه سرقتي بس فلوسه واجد يقول صرفت 5 الاف وشريت غرضين بس والباقي خذوه
وفيه يماني يقولي هم اثيوبيين
ويقول اخطر شي لو تاقف في المواقف الي تحت السوق بعظها مظلم ويجونك بالسواطير وياخذون الي معك

وعلم واحد من ربعي قالي انا سرقوني في شارع الخزان وشوا يوم لحقتهم انطلو بطاقاتي يقول هن اكبرهمي وبطاقه الاحوال معهن
العجيب مارحنا نشكي للشرطه انا ورفيقي مدري عن الشايب كانه شاكي
خل اعلمكم اي شكوا اذامافيه شهود او تصوير كمره مراقبه لا تتعب نفسك اقوا حكم عليه يحلفونه فقط
ويطلق سراحه هذا شي جربته انا

اقول لو علمتكم بشي صاير لي تكفون لا يدري احد
وهو حلم حلمته وحترت فيه
حلمت اني في سكه بيوت الطين وشوف بليس جاي يمشي وعليه نعال في رجله اليسرا والثانيه ماعليها شي يمشي حافي ونا وقفت على جنب وناظره وهو مهوب طويل بس عريض المنكبين
وهو يمشي مطمن راسه وفيه من الهم ماالله به عليم
وشوف بيوت الطين اهلها وبزارينهم يطلون يشوفون ابليس
راسه كبير وجسمه عريض ويديه تاصل ركبته وهو يمشي
ونا واقف ويمر من عندي وهو يناظر الارض بس وجهه ماشفته مطمن راسه وعلى ممشاه
وش ظنكم يالغالين فيذا الحلم والي يعرف تفسيره يعلمني زين ولا شين مايهمني بس اعرف وشوذا الحلم ونا اعتبره رئيا لاني اذكره كنه قدامي هلحين

نرجع للاولين الله يسكنهم الفردوس اجمعين الي نعرف والي مانعرفه هذا حقهم علينا
مرت سنين على نجد ماشافو القطر يعني المطر
ويقولي جدي ياملا الفردوس انها خمس سنين متا تاليه يعني ورا بعض ونتم خابرين حاجه الناس للمطر كلش على الله وثم المطر وصارت العنز وعيالها اثنين بخمسه ريال ولا احد يشري
وفي السنه السادسه جاهم الامطار وفرحو اهل النخيل وهل الغنم وفيه ناس واجد يبعلون يعني ياخذون صاعين قمح ويروحون للبر ويعزقون الارض يعني يحرثونها ثمن يبذرون العيش الي معهم ويرجعون لديرتهم الله سبحانه هوالي يسقيه بالمطر ولا تحرو حصاده يروحون الرجال والحريم وبزورهم يحصدون القمح البر
ويبارك الله في زروعهم وبو صاع يحصل عشره
بس الي افكر فيه تمر الغنم والبعارين ويردونهم اهلها وهم في بر ولا حولك احد بس الذمه ومخافه الله سبحانه بين عيونهم وبس تراي قصرت
وااخر دعوانا ان الحمد لله رب العالمين
وسبحان الله وبحمده سبحان الله العظيم عدد خلقه وزنه عرشه ومداد كلماته
الله يحفظكم من كل شر وياقاكم

[الركام]

الحمدلله على سلامتك
والحمدلله على رجوعك
وفي انتظار جديدك
🌹🌹🌹

[سحاب شقراء]

هلا ومرحبا ومسهلا فيك يالركام الماطر
الله يسلم قلبك الطاهر من كل شر
وبشر بالسواليف القديمه الي توسع الصدر
وسالفه المعيقليه ابي الناس ينتبهون منذا الحمير
وقبل امس سارقين الرجال بنفس الطريقه ومصور ثوبه راحت المخبات ونص الثوب انشرح نصين
الله يعوضه خير

[سحاب شقراء]

بسم الله
الا بذكرالله تطمئن القلوب -لا اله الا هو الحي القيوم

يالله تحييهم وليا حيا كثروليا كثر تنثر لكبيركم وصغيركم وذكركم ونثاكم
خل اعلمكم برمضان منول ايام بيوت الطين
الصغار يفرحون بليل رمضان علشان يسهرون الين الساعه تسع باليل وبعظهم مايقاوم النوم يرقد قبل
يالمسلمين انتم مثلنا ماتاكلون المكرونه الا برمضان ولها طقوسها بعد مثل ماناكلها الا في صحون نسميهن صحن بلم وهي مصنوعه من ماده نسميها الصين وهي تجي مستطيله الشكل وسريعه الكسربعد وهذا هو البلم
والظاهر لو ماعندنا بلم ماناكل المكرونه
وفي رمظان فقط ناكل المحلبيه والتوت ونحبهن كلنا كبيرنا وصغيرنا
وش فيها لو اهلنا يعطونا مكرونه في جماد ثاني ولا في بدايه السنه كنه حرام
اذكر اهلي ونا جذع قالو لي رح اشتر لنا كيس رز
اول مره يوصوني اشتري وذكر كان فيه ازمه للرز ولا فيه الا رز ابن رصيص
شريت كيس وطبخت منه امي ياملا الفردوس
وتناديني تقول هذا وشو قلت رز مافي السوق الا هو قالت باتله ازيده بالماء ولا سر فيه حبته منتفخه وطعمه غير مهوب زين
ذكرت شي خل اعلمكم
اول ماجانا جبن كرفت شي حجمه كبير وسعره بريال ونص
وحجم وسط بريال والصغير بريال الا ربع
منول عندي بسطه ناوي التجاره ومن البظاعه علبه عليها صور الفنانين اختر منهم وخفس على الصوره وحظك ونصيبك والصور لطلال مداح وسميره توفيق وهيام يونس ذيك الي يالله تفتح عيونها
وخسرت البسطه كلها لان ماعندي حسن تصرف كل ما ابيع شي اشتري حلاو الساعات الي يتهتمن ما اقاومهن ومع الايام اندثرت التجاره والسبب حلاو ساعات
اذكر العجيزات جمع عجوزقبلهن في السكيك يسيرن على بعض
وفيهن حبهن للخبر
تجي تمشي من عندي وهي مطلعه عين ومغطيه عين وتقولي مننت وليده وقول مدري منيب معلمك
خلاص اصبحنا اعداء هلحين وتبدا تهددني الا علمني من انت وليده ونا رافض اعلم عناد
ون طاولتني الا علمني يبدا الكر والفر بينا هي تكب علي تراب ونا اجيها من ورا ووطي على عباتها ثمن حول ماتشنقل على ورا
وتبدا بالصلح قصرت ظعيفه تبي الفكه ونا لا يمكن اقبل الصلح الين تدخل بيتها اسكنهم الله الفردوس وميمتي وبيي وخيي وجدي ونا ونتم امين
وكملت ودملت وركبت حميرها وشنقلت يعني طاحت على وراها هذي شنقلت يالتوالي كلش ماتعرفونه ونا كني من اصحاب الكهف اشرح كلامي

وفي وداعه الرحمن الله يحفظكم وعيالكم من كل شر

وسبحان الله وبحمده سبحان الله العظيم -عدد خلقه وزنه عرشه ومداد كلماته ورضى نفسه

[الركام]

مر السحاب ولا بدا منه رشة
المنتدى يبي سواليف الاجداد

سوالف اهل الطين والسقف عشة
نبي سوالف عبرة لكل الاحفاد

[الركام]

سحاب شقراء لك غياب وطول
الناس تسأل وين ماضي منول