غالي والطلب رخيص يالركام
يازين كذا تعلموني وش تبوني اسولف عليكم وبشرو بالخير وتغانموني قبل اودع منيب باتل عندكم
فيه مزرعه في شقراء معروفه اسمها الحميضيه
وفيها قليب طال عمرك من عمر الدنيا ايام الصدر والناس ياخذون منها الماء وخص الحريم يجن طال عمرك ومعهن قدوره ويصير معها وقات هذي طال عمرك تحطها الحرمه فوق راسها مثل العقال بس هي يسمونها الوقات وهي من القماش او من الشيله يلفونها علشان توقي عن الراس الا شالت القدروفيه ماء تصدق ان الحريم كني اشوفهن هلحين تمرك والقدر مليان بالماء وهي شايلته على راسها وهي مامسكته بيديها
علشان الوقات مركده القدر على الراس
وتسولف مع رفيقتها وتشر بيديها وتلتفت يمين ويسار ولا يطيح القدر مبطيت مذكر عجوز في شقراء وقولها الله وكبر يم فلان تذكرين يومنك تروين من الحميضيه وتشيلين القدر مليان بالماء وهلحين مايردك الا سريسرا يعني سويسرا بس هي الي تقول الا نشدتها وينك فيه يم فلان الصيف الي راح قالت في سريسرا مع وليدي مسفرني يم البراد
المهم نسيت السالفه ههههههه
المهم قليب الحميضيه جعل اهلها للفردوس وكل مسلم
حاطين نص الشعيب يصب في القليب والنص الثاني يسقي النخل
الا يومنا هذا
ومنول طال عمرك الا جانا السيل وصب في القليب تمتلي القليب ويخافون على الطوي الحصا لياه يطيح ثمن تنهد القليب يروحون ينادون شايب جعله للفردوس وذا الكلام ايام الصدر
ولا نادو الشايب قالو له يبو فلان قليب الحميضيه تبي تفيض يجي معهم وياخذ كسره جمش الطين اليابس اسمه جمش
ويقرا عليها من كتاب الله ايات ثم ينطلها في وسط القليب وشوي وتشوف الماء نازل سبحانك ربي
وترا سالفه الشايب انا ماحظرتها بس معلمني بها شايب جعله للجنه متوفي من سنين
ولا ادري هو من القرائه ولا تنفتح المجاري الي فسفل القليب ثمن يروح الماء العلم عند الله سبحانه
ولا قط قالو الناس الا شارب من الحميضيه وهذا مثل يظرب منول في شقراء لان ماها حلو بالحيل
وطبعن قلبان شقراء كلهن يلتقن مع بعض سبحانك ربي
ويزيد الجم في القلبان كلهن الا جانا السيل وصب في قليب الحميضيه ونت خابر منول مافي شقراء سد الا سد عزيز ابن ربيع جعله للجنه الي في الحسيان تحت الجبل الشمالي ولا حطه الا السنين التوالي بعد وهو من التراب مهوب مسلح
وفيه بعد قليب بين بيوت الطين يصب فيها السيل الا جانا يعني سيل السكيك والبيوت مهوب شعيب بس والله مايحظرني شي عنها ولا عن اسمها نسيتها ماورا مني بعد الي اذكر بعض الامور انت خابر المحال يدرج والحسابه تحسب يالله حسن الخاتمه
والله اني اذكر ونا في نخلي في شقراء اشغل المكينه البلاكستون الهنديه تعرفها اكيد
المهم والله يعينا على المهم اشغل المكينه من الساعه 7 الصبح انت خابر اروس يعني اسقي النخيل الين مسيان يعني حول المغرب ولا طفيتها طال عمرك الاي اسمع صوت وشيش وصوت الماء يهدر في القليب وذا الكلام والشمس غايبه وباقي شفقها احمر في القبله
وذكر يوم سمعت الصوت وويق في القليب ولا فيه شان يعني مجرا للماء يصب وسط القليب الين ياصله الماء ويغطيه سبحانك ربي لا اله الا انت
والقليب يجي في اسفلها توسعه من الجوانب تحت الطوي نسميها السلال
والمجرا الي يصب في القليب نسميه شان
وصلى الله على نبينا محمد
وهذي سالفه السيل والقليب يالركام الغالي
الله يسمعنا خير عن ابو سيرين الله يكفينا شر الدنيا
وفي الختام احسن شي نقوله سبحان الله والحمد لله ولااله الا الله والله اكبر عدد خلقه وزنه عرشه ومداد كلماته ورضى نفسه
2016-11-29, 02:06 PM
العرض المتطور
