تفاصيـــل رحلتــــي الى ديرتـــي (( بالصـــــــــــور )) في اجــازة عيد الاضحــــى

[بنـت الجنـوب]

السلام عليكم ورحمة الله وبركاته

في البدايه ابيكم تعيشون معي الحدث اول بأول لاني من زماااااااان ما رحت ديرتي

يمكن صار لي عنها اكثر من عشر سنين .. ولأننا تعودنا على حياة المدن وبهرجتها

انشغلنا عن ديرتنا الحبيبه اللي من خلال سردي لتفاصيل اجازتي سوف تعرفون موقعها

واتمنى منكم زيارتها في القريب العاجل

في البدايه كانت رحلتنا عن طريق مطار الملك خالد في الرياض الى مطر العقيق

في الباحه لانه اقرب مطار لنا مع انه نفس مسافة مطار ابها تقريبا ولكن الباحه اقرب

بكم كيلو طبعا اختكم في الله اللي هي انا تحمست كثير اني اشوف ديرت اهلي واجدادي

اللي هي ديرتي وعلى طول اخذت اجازه من دوامي

كان موعد رحلتنا في 8 نوفمير الساعه 8 صباحا والحمدلله المره هذي الخطوط كانت

عند كلمتها واقلعنا في الوقت المحدد وصلنا مطار الباحه الساعه 9 ونص

وطبعا وانا انزل من الطياره قلبي يدق بقوه لاني ما ادري ليش حسيت للأنتماء لهذي

البقعه من بلدي الغالي

طبعا ما اخفيكم انه طريق المطار الى المدينه نفسها 60 كيلو وجدا طريق سيئ

ويخوف .. طبعا كان الجو صافي جدا وعلى طول قلنا بنروح للعقبه لانه ما فيه وقت

اننا نتاخر لانه الشوق غلبنا

ديرتي طبعا في تهامة الباحه

مشينا العقبه وجدا كانت الحمدلله سلسه وما كان فيه شاحنات اللي بصراحه ما اطيقها

وكانت العقبه شبه فاضيه لانه احنا جينا في وقت لسى ما بدت اجازة المدارس وكان

يوم اثنين يعني بوسط الاسبوع

انتهينا من العقبه وأول ما قابلنا محافظة المخواه اللي بجد انصدمت في التطور اللي

وصلت له صارت تقريبا كأنها مدينه متكامله من حيث الخدمات والمرفقات الصحيه

والاسواق والمجمعات السكنيه

بعدها بكم كيلو قابلنا ديار كثيره صعبه اني اذكرها لاني بصراحه نسيتها مع اني كنت

فاتحه الكاميرا واصور اي شي اقابله

من ضمن الديار اللي قابلناها (( نمره )) هذولي عاد جيرانا وبعدها قابلنا (( المعقص ))

ديرة بني منتشر

وبعدها زادت نبضات قلبي وصار الشوق يسبقنا بالذات لما شفت هاللوحه (( اليكم الصور ))




اول ما قريت (( شمـــــــــــــران )) فز قلبي وعلى طول طرا على بالي بيت شعر وقلته

شمران يا دار السعد والشهامه ... ديرة هل الجود والطيب والنخوه

شمران يا عزوتي والكرامه .... يا ريحة الاجداد من نفحة القهوه

انا مو شاعره متمكنه بس اول ما جا في بالي قلته للوالد في السياره قال لو انك ولد

خليتك في حفلات المحاوره لبى قلب ابوي

وبعدها نفس ما صار لي مع المخواه صار لي مع شمران لانها بجد تطورت بشكل

غير طبيعي وانصدمت بالخدمات بس بكون صادقه معاكم ناقصها اهتمام بسيط

من وزارة الصحه



طبعا نفس الشي الجو فاجئني كانت السما صافيه وما فيها غيوم ابد وكان الوقت لسى صباح

يعني حدود الساعه 11 الصباح

وطبعا هنا مدخل الديره وطبعا ديرتنا تحتوي على عدة قرى ولكل قبيله قريه معينه



والشارع ما شاء الله سيدين وبينهم رصيف زي ما انتو شايفين

وهذا منتزه قبل لا ندخل ديرتنا بكم كيلو يعني ما ادري بصراحه تابع لأي قريه




عاد هالمكان يا زينه وقت المطر والغيم واحيانا ينزل عليه ضباب من الحجاز وقت الشتاء

اول ما دخلنا بيتنا عاد لقينا انواع الحشرات بعضها اعرفها وبعضها والله ما ادري وش

اسمها (( ولاني خوافه ما امداني اصورها )) ومن ضمنها طلع لنا اثنين ثعابين

لانه البيت مهجور من زمان

وسبحان الله بعد اذان الظهر الا السحب جت وبشكل رائع جدا والوان

يعني سحب رماديه وبيضاء



طبعا في خلال تفاصيل رحلتي ما قدرت اصور المطر ابد لاني بصراحه اخاف من البرق

واللي زار الجنوب يعرف برق الجنوب اشلون تحس انه ينور الدنيا كلها حتى لو انه

في عز الظهر وخلال 13 يوم نزل علينا مطر في حدود 8 ايام بعضها خفيف وبعضها

قوي (( وحتى المطر الخفيف يجي معه برق ورعد بشكل مخيف ))




وفيه شي بعد ما حبيته وخفت منه وقت المطر (( التمديدات الكهربائيه طالعه من فوق

يعني مو مثل المدن من تحت الارض ))




بصراحه منظر السحاب هنا شكل خيال وربي عمري ما شفت مثله

حتى لما تكون سحابه وحده تحس انها قريبه من الارض وتكبر بشكل سريع

وهنا صورت الديره بعد ما نزل رش خفيف من السحب اللي فوق




وتغدينا تحت هالسدره بس في يوم ثاني مو نفس يوم وصولنا لاننا في البدايه انشغلنا

بالبيت وتنظيفه

وبصراحه هالشجره حبيتها من كل قلبي لانه هذاك اليوم كان الوقت كله مزح وضحك

وسوالف واللي معي بالرحله (( انا وامي وابوي )) فقط



طبعا في يوم من الايام شدني منظر سحابه

وحاولت اصورها بطريقه احترافيه بكاميرتي الجديده (( طبعا السحابه تطورت وكبرت

في غضون خمس دقايق ))

بوريكم الصوره على ثلاث مراحل

المرحله الاولى




المرحله الثانيه




المرحله الثالثه





ولاحظوا في الجبل صورت لكم ظل السحابه (( سبحان الله ))

كان منظر على الطبيعه قمه في الجمال




هذا الجزء الاول من رحلتي لاني بصراحه تعبت وانا ارفع الصور واصغرها

نصف ساعه واكمل لكم بأذن الله الجزء الثاني