آه من طول انتظاري صار كل الوقت ضدي
اعترف واقول ماني قادر وخصمي زماني
آه من كل الـجـروح اتزيد وانا اقــول حدي
عارف واقـول ابا جــرب ولو تصــفي ثواني
ماهـقـيت ان الزمــان اللي تحـداني يهـدي
كيـف واني عارف ان الوقـت هذا قـد نواني
عارف ان اللي بقى من العـمر ملزوم يعدي
واتشـــوق للسنين المـقبـله والنــقــص باني
نحـتري يوم جــديد وعــارفين لاجديدي
مير بنهون على النفس وبنعطيها الاماني
قلت بعض وكاتم اللي ساكن بالصدر عندي
مـاحـد يعشـق حياة وعـارف ان العـمر فاني
وانت يالـمـخـدوع في دنياك مـلزوم تـهـدي
اعتبر بالمـاضي اللي صــوره لك من يعـاني
من تصـورها على الواقـع بـيقـنـع بالـنفـادي
ويعـلم ان العـمر مهـما طال مـابه عـمر ثاني
يازمان كــل منـا صــار يشـــكي ولا يفـيـدي
غـارقيـن في بحـــور لابـها ســـفن ومــــواني
ياعسى الله يجعل النا في تواليها السدادي
ونختمها بخير الاعــمــال ونوفق بالجناني
والختم صلوا على محمد رسول خير هادي
الشفيع اللي يشــفـع يوم تهنـانا التـهاني
ابراهيم بن سعود الخريف
|