[عبدالهادي المفرج التميمي]

السلام عليكم ورحمة الله وبركاته
عندي من زمان فكرة عمل مقطورة ( قلص ) ويكون به جميع متطلبات الرحلات
وياخذ اسم البراري
انا عندي رسومات سويتها من حوالي سنه
ولكن للاسف لم تخرج الى النووور
والسبب ما لقيت عامل ورشة يفهم وش ابي بالضبط
ودي بفزعتكم كل ما شفتوا اي قلص في سيارة تصورونه لي
واذا احد عنده صور قديمة عطونيها
واذا تعرفوون ورشة راعيها رااايق لي
ابشتغلها عنده وله دعاية مجانية
وترى ورش الزلفي يمدحووووونها
على العموم انتظر افكاركم ومقتراحاتكم لعمل هذا القلص
وبيكون قنبلة الموسم لهواااة البر
مميزات في التصميم حقي :
قز ودبة غاز
2 تانكي ماء حجم 100 لتر للواحد
2 جالون بنزين
دكة للجلوس مقاسها 3 × 2،40
طربال للظل 3 × 5
شناط للعدة
استبنتين وحدة للقلص والثانية للسيارة
فرن صغير
جميع الادوات للبر من مسحاة وفأس ومرزبه
مكان للخيمة
مكان للفرش ( فرش النوم )
مكان للحطب
ثلاجة صغيرة على البطارية
مكان للنوم في الظروف الخاصة لعدد ثلاث اشخاص
امكانية عمل الاكل داخل القلص ومحل شبة نار ( وجار )
هذا اللي انا تذكرته في التصميم وباقي اشياء صغيرة لا تكاد تكون مهمة جدا
يالله فزعتكم يالربع في عمل مقطورة ( قلص ) البراري
يعني حقين الخرائط اطيب منا في عمل خارطة البراري
والا حقين الطقس في جوال البراري
انتظر توجيهااتكم
مشكوووووووووورين







سلام