[تناهيد]

ماقلتلك ...

وحدك غديت النور .. والباقي ظلام !!

وإن السّهر لابانت خيوط الفجر .. يبدا ينام !!

يتركني بروحي أطيّر من حنيني لك حمام !!

وأحمله شوق وسلام !!

وماقلتلك ...

إنت الوحيد اللّي اشوفه ذنب مهما إرتكبته .. ما أحس إنّه حراام !!

وماقلتلك ...

إن الحنين .. رماح

وإن الغياب .. أحباب

وإن الشعر .. مفتاح

وإن القلوب .. أبواب

وإن الهنى ماله على قلبي دروب

وإن الحزن فيني بنى

بلدان وهمومي شعوب

وإن الشعر مالي غنى

عنّه .. وعنّه ما اتوب

وإن الحنين اللي بنا

أطهر مساحات الذّنوب

وإن الشعر ... مثل الحزن قسمه ونصيب !!

وإن المنافي ... مع مرور الوقت تصبح ديرة أولاد الغريب !!

وأن الصبر ... مهما يواصلنا يجي يوم ويغيب !!

يمكن لأنّه ملّنا !

وإلاّ الصّبر مل الصّبر ...

مدري ولكن قلتلك ...

ماقلتلك !

أشيائي الحلوه قليل ...

وإنّك أحد أشيائي الحلوه القليل ...

معاك أحس إنّي سهر ليله طويل ...

ألقابه لحزني خليل ...

وأحس في صبري حطب .., وأيّام غيباتك فتيل ...

مادري متى يجتاحني هذا الملل ؟؟؟

واحرق سنين من الصبر !!

...

وماقلتلك ...

لو جيتني مرّه مطر ...

تلقاني بدوٍ تنتظر !

يستبشرون .. إن جت مقاديمك تغنّي عن حضورك يمّهم ...

من طهرهم ...

البرق .. في تعريفهم يعني حياة ...

والغيم .. صوته أغنيات ..

من غبت عنهم عايشين بهمّهم ..

تفرّقوا ... صاروا شتات ...

وأنت الوحيد اللّي تجي وتلمهم !

وماقلتلك ...

أشيا ثلاثه باقيه ماقلتلك ...

إنّك مثل حزني ... قدر !

وإنّك مثل ليلي ... سهر !

وإنّك عمر ...

والعمر ... مرّه بالعمر !

والعمر ... مرّه بالعمر !