الموضوع: *** قصائدي ***
عرض مشاركة واحدة
  #23  
قديم 2022-07-28, 11:26 AM
الركام الركام غير متواجد حالياً
شاعـر متمكن
 
تاريخ التسجيل: Jan 2009
الدولة: الرياض
المشاركات: 12,186
جنس العضو: ذكر
الركام is on a distinguished road
افتراضي

ياابو سعود المنخفض وش علومه
يومك تجيب العلـم وتجـود وكـاه

اشوف يوم السبت غابت نجـومـه
وراع الفلك في نشرته ضاع مسراه

يالله عسى يسقي السهل مع حزومه
عـلـه على عنـثـر ويزيد فـي مــاه

وعسى النخل سيله يقطع عقومـه
لياشفت درب السيل تقول مسناه

وابو سعود القحط زود هـمـومــه
ويناظر الرادار صبـحـه وممســاه

وعساه عقب الصبر تجلا همومـه
ويشوف درب السيل يفيض مجراه

سعد بن ثنيان الثنيان ابو فهد
————————————
ياابو فهد راح المطر مع غيـومــه
واللي توقع ماعرف كيف ممشـاه

في دبرة اللي عارف وش علومــه
الله عـليـم وعـارف وين مرســـاه

والمنخفض عنا شمال وسـومــه
ولو قالوا اهل الطقس لا لا تحراه

كم مرة صارت وضاعت حلـومـه
واكثر توقعهـم على غير مجــراه

وان كان راح الوسم وانحت نجومه
فديارنا للصـيــف اقـرب لرجــواه

واللي عيـونـه للسمـاء لا تلـومـــه
والمنتظر يصبر ولـو كان ماجـــاه

يالله بسيل يعم تذكر رســومــــه
ويفيض سد شعيب مطعم من اعلاه

وعنثر على ماقلت يسقي حزومــه
ويسقي نخيـل مبطي ماتنـحــــاه

وتعم شعبان الجزيرة وســومـــه
وفي كل دار يزين روضه ومرعـــاه

هذا الطلب منا عسى الله يدومـه
ويرضى علينا ونحمده في عطاياه

ابراهيم بن سعود الخريف

التوقيع:
رســـالة لمنهــو بدا الشعر يكــتـــب =
اليابغيت الشعــر ياتــيك طوعـــي
الـزم ثلاث وخـــل بيـــتك مرتــــــب =
الوزن والمعـنى وقافٍ سجـوعـــي
وتخـــير لقــولك بوقــتٍ مناســــــب =
واخــتار وقـتٍ فيه كل هجوعـــي
واليا اجتمع عندك معـاني فهـــذب =
وخل الفراش وخل زين الطبوعـي
وخذ القلم واكتب من الشعر واسهب =
تلقى المعاني كلها لك خضوعـــي
وغنه بلحن وارفع الصوت واطرب =
وارسل لنا ابيات شعرك تبوعــــي
وان كان ماجا لك مع الشعر مذهـب =
خــله ترى مافــيه ســـدٍ لجوعــــي
خــله ترى مافـــيه زودٍ و مكســــب =
لا شـك في بعـضه بتـلقى نفوعـــي
ابيات شعــر صاغــها لك مجـــــرب =
هـــدية مــالي وراها طــموعـــــي

الركام
رد مع اقتباس