كان فيه اثنين يتمان
كبروا اليتمان ولهم خالة ارمله وعندها بنت في مثل سنهم
واحد من اليتمان مطوع امام مسجد والثاني هواوي وراعي ولع وصيد
ودايم يمر خالته وكنها بعيده عنهم شوي يشوف وش اللي ناقصها ويداريها
المهم المطوع نوا يروح للحج وقال لاخوه يأم المسجد في غيابه
حاول اخوه انه ما يأم المسجد بس ماقدر
قال انا بكره مواعد ركب بيمروني يصلون معنا الفجر وبروح معهم
ان جونا وصلوا معنا قلت لهم انك وكيلي على المسجد لين ارجع
يوم صلوا الفجر الا الركايب بروك عند باب المسجد
صلى يوم سلم قال ياجماعه انا رايح للحج بايحوني
وتراني وكلت اخوي فلان امام للمسجد بعدي
خالتهم فقدت الولد اللي يجيها هي والبنت
راحت العجوز تنشد عنه فالديره من عين اليتمان قالو فلان حج وفلان يصلي بالمسجد
رجعت علمت بنتها البنت ماصدقت قالت بروح اشوف بنفسي
راحت ووقفت عند باب المسجد يوم اقام المسجد قال للناس استووا
التفت بيقول اعتدلوا الا يشوفها واقفه على الباب ويوم شافته حط عينه في عينها
وهي تفرع تبي عشان يشوفها ويعرفها
هو شافها ونسي نفسه قال :
تعدلـوا يـا اهـل القلـوب المواليـف
صيروا ورا القراي خمسة صفوفي
احلـف بـرب حيـزم الغـرس باليـف
مرجع بصـر يعقـوب بعـد الكفوفـي
انـك منـاي بلابسـات المشانـيـف
والكـاذب الله ياعسـى مايشوفـي
الله اكبر
بعد ماسلم
نشده واحد من عيال عمه وهم فالمسجد
قال يافلان
بعد الاقامه وقدام تكبر قلت لنا حديث عده علينا
رد عليه الامام
قال هذا حديث اسناده ضعيف جدا جدا جدا ولاني بعايده
وسلامتكم