[التمثال]

بسم الله الرحمن الرحيم
السلام عليكم ورحمة الله وبركاته ..
مر على الوسم 30 يوم ولم يذكر امطار على الوسطى ماعدا الامطار التي هطلت على حائل وأمطار المنطقة الغربية
وهناك ملاحظة أحب أن أنبه عليها جيدا ,,, وطبقتها على أرض الواقع ووجدتها صحيحة ,,
أفضل الرياح في المنطقة الوسطى في فصل الشتاء هي الرياح النسرية أو الشرقية سبحان الله دائما يخيل معها السحاب (بأمر الله تعالى) ,, وهذه لاحظتها على ارض الواقع ,,, بالنسبة لمنطقة الرياض وجنوب منطقة القصيم ,,, النسري ثم النسري ثم النسري ثم الشرقي ,,,, ثم الجنوبي الشرقي في المرتبة الثالثة
واعتقد أننا لن نكون أدق من أجدادنا في معرفة الرياح حين قالوا .. ( مع النسري الخير يسري )
وعلى شهادة احد الثقات ,,, كان يقول 29 يوم الرياح جنوبية شرقية في الرياض وماجاء مطر ولاحتى رش
لكن يوم هبة الشمالية ثم خلفت وصارت نسرية بدأت اخبار الخير ,,, لنبدأ بيوم الأربعاء الذي بدأ معه وسم المنطقة الوسطى والشرقية
(منطقة الرياض وجنوب منطقة القصيم مع المنطقة الشرقية) وسنركز أكثر على أخبار المنطقة الوسطى ,,
التقرير يتضمن اخبار الامطار والمناطق التي اصابها سيل دون الخوض في التفاصيل ..

ولله الحمد فإن جميع مايتضمنه هذا التقرير من أخبار فهي أكيده ومراجعه ,,,
*************************************

يوم الأربعاء 25 شوال / 16 نوفمبر
بداية أجواء الخير والبركة ... جتني رسالة من أحد الثقات (نحسبه والله حسيبه) تفيد بهطول أمطار خفيفة على الطريق اللي بين الجبيل والدمام في الساعة 10.30 مساءا ,, وكما شوهد النفيض لأول مرة في بداية تكوينه على الرياض منتصف الليل وغطى السماء بالكامل وكانت الرياح نسرية .


يوم الخميس 26 شوال / 17 نوفمبر
يذكر رش وأمطار خفيفة بين الرياض وسدير واللي عنهم شرق قبل الظهر والخيال زوين ,, ويزين شرق . وذكروا رشوش وأمطار خفيفة على الظهران والدمام والجبيل وبرق ورش على الخبر .. بعد العشاء
بعد الساعة 8 بدأ السحاب يزين ويكثر من غرب منطقة الرياض وبدأت أخبار الخير تتوارد رشوش وأمطار خفيفة على سدير وشقراء وعشيرة
وشيفت البروق عند الساعة 11 مساءا جنوب غرب الرس كما شوهد البرق بين دقله وملهم بعد منتصف الليل .. ليست بروق حقوق .. تبرق وتخلب ثم تديم وهكذا ,, اللهم لك الحمد

يوم الجمعه 27 شوال / 18 نوفمبر
زادت أخبار الخير والبركة بديم طيبة على سدير والوشم ومابينهما ,,, والخيال زين وثقيل ومدلهم والدعوب قامت تمشي خفيف والشغايا ماشية
مشت شعبان الداهنة سميطة خفيفة ونقع جيدة في جلاجل والتويم وتمير والرياح مابرحت نسرية ذكرت أمطار خفيفة في الرس وجنوب غرب القصيم
واتجاها الى عنيزة شمال شرق رش خفيف وبعد صلاة العشاء قامت البروق تولع غرب وشمال غرب الرس وأمطار خفيفة الى متوسطة مشت الدعوب والصنوع غرب الرس .

يوم السبت 28 شوال/ 19 نوفمبر
بدأ الخير يتوسع من جنوب وغرب حيث ذكرت رشوش خفيفة في بنبان (شمال الرياض) وذكر رشات حليوة على الدوادمي ,, امطار وديم على الرس ومشت الشغايا الكبيرة على خفيف غرب الرس مشى شعيب الدليمية خفيف وكذلك الحجازية ,, سحاب اليوم افضل وازين من سحاب البارح (الجمعه) الخيال ثقيل وزين وذكر ديمة خفيفة على عنيزة وبريدة والسحاب وصل شمال غرب القصيم وامطر هناك ديمة خفيفة ومسيان شيف البرق جنوب غرب الرس وغرب بريدة ومطره خفيف , أمطار طيبة شمال غرب الدوادمي بـ 100كم ومشت العبارات .. والديم قامت تذكر في سدير والوشم ديم طيبة يالله من فضلك والشعبان قامت تمشي سمايط ,, امطار متوسطة متواصلة على الزلفي ومشى وادي مرخ سميطه .

يوم الأحد 29 شوال/ 20 نوفمبر
الحمد لله الخير في زود وهواها ,, نسري الى شرقي ,, وقامت اخبار السيول على سدير من المجمعة الى تمير شرقا ذهبت الى تمير لنرى السيول وماشاء الله خير من رب العالمين ديم طبية بالحيل والمزارع امتلت والشعبان ماشية واهمها الارطاوي وكان ممشاه سميطة يوم وصلناه العصر وجميع الشعبان قامت تمشي من خفيف الى وسط والسدود قامت تمتلي ولله الحمد ولكنها مفتوحة ,, والمزارع امتلت .. أمطار غزيرة ومتوسطة جنوب الرس وسالت جميع شعبانها الجنوبية ورشوش خفيفة جنوب حائل ومزون على عنيزة والسحاب اثقل وازين اليوم ,,,

يوم الأثنين 30 شوال/21 نوفمبر
اليوم ولله الحمد والمنه الخير في زيادة ويتوسع جنوب ,,, الرياض الساعة 3 فجرا قومتنا سحابة ترعد ومطرها خفيف مشت منها الشوارع وصبت منها المرازيم وتواصلت الأمطار من بعد الساعة السابعة صباحا أمطار غزيرة حتى قبل الظهر مشى شعيب اوبير ووادي لبن وشعيب الواشله يضرب ضرب .. سحاب الرياض تركز جنوب غرب على الوادي واحياء السويدي وكلما تتجه شمال يخف ,, السحاب خف على سدير والوشم واللي عنهم غرب
وتقل كنه يجنب ,,, بعد المغرب اشتعلت البروق على احياء شمال الرياض وامطار متوسطة وغزيرة وهواها شرقي الى نسريعقب استقر الجو شوي وهدأ الوضع نسبيا ,,,


يوم الثلاثاء 1 ذو القعدة/22 نوفمبر
السماء صحو والسحاب خف ,,, وقاموا اهل الرس على سحاب طيب وحروة مطر وجاءت اخبار الخير بامطار تنقع بالارض جنوب غرب الرس
وامطار غرب الدوادمي بـ90 كم وفيه مناقع يمين ويسار صباح الثلاثاء والخيال بدأ يركب ويزين وهواها شرقي الى نسري
السحاب قام يتوسع من شمال وجنوب وذكر أمطار متوسطة مع بروق ورعود على الدلم والخرج قبل الظهر والسحاب قام يطلع نصوب ,,
قامت تجي اخبار ديم خفيفة على شمال غرب القصيم وديم أقوى غرب الرس والشغايا الصغيرة تمشي ويذكرون ان السحاب مدلهم وزين
بدا المطر على اجزاء من سدير والوشم على شكل ديم خفيف وقامت الشوارع تمشي والمرازيم تصب اللهم لك الحمد ..
قامت الرعود تسمع على الصفرات بين الرياض وثادق والعيينة شمال الرياض ومطره متوسط (ديم) ورغبة بروق ورعود وأمطار متوسطة الى غزيرة ,, ديم خفيفة على بريدة وعنيزة والبدايع
مسيان قام السحاب يقوى ويتجبر وقام يبرق ومطره قوي وقام يسيل على شمال العيينه الصنوع والدعوب محوله وجنوب دخنه سيل طيب وامطار غزيرة جنوب النبهانية مشت منها الدعوب والشعيبات وامطار على جنوب شقراء جهة ام سليم ووادي الشمس ممشاه طيب ,,, برق غرب الرس الساعة 10 مساءا
سيلت قرية العاقر(سحابة برد) غرب الرس هواها نسري الى شرقي ,, اشتعلت البروق في قبلة القصيم وأمطار متوسطة وغزيرة ومشي دعوب وصنوع وشعيبات . والبروق وصلت بريدة وعنيزة ووسط القصيم ومطره وبل طيب على عنيزة وبريدة ,, وذكر ان وقع المطر في شمال غرب القصيم هو الأفضل من عام 1425 .. حسب رواية احد الاخوان

يوم الأربعاء 2 ذو القعدة/ 23 نوفمبر
اصبحنا على أخبار الخير والمطر المتوسط الى غزير على بريدة عنيزة والبدايع والرس والزلفي وعلى المجمعة وتمير وعموم سدير مغيمة ومديمة وعلى شقراء واللي عنهم شمال والمستوي مطر ديم بدون سيل واللي عن اشقير جنوب سيل والشعبان ماشية وسط .. والخيال اليوم ثقيل ويرعد ولله الحمد علوم الشعبان يحبه قلبك ,,, اغلب الشعبان ماشيه وبالذات اللي عن الرس جنوب وغرب ممشاها طيب وبعض شعبان سدير والوشم تمشي خفيف الى وسط
بعد الظهر هدأ الوضع والخيال فهد وراح شرق ... الشمس غابت في صحو على القصيم ,,, بعد العشاء ركب السحاب مرة اخرى على شمال الرس وجا منه رش شمال الرس وجا علم برق شمال غرب بريدة وشمال غرب القصيم مطر طيب على المذنب الساعة 8 عقب العشاء وجا خبر سيل على عيون الجواء الهوا شرقي عدال عاود الخيال يخف ويقل تدريجيا بعد الساعة التاسعة .. خيل السحاب فوق الجوف وقام تجي منه سوقات طيبة وبروق عنهم شمال

يوم الخميس 3 ذو القعدة/24 نوفمبر
اشتد الخيال صباح اليوم على عرعر وقام يسيل وبروقه ماتفصل ورعده مايوقف وبعد الفجر صار يديم وجت علوم رعود وامطار متوسطة وخفيفة على القيصومة والحفر جاه رش بسيط ... عقبها خف الخيال وصار خفيف ويذكر منه رشوش خفيفة عدا سحابة وحدة فيها برق ورعد ومطرها طيب جت على الودي اللي يصب في الشوكي .. الخيال بعد الظهر بدأ يكثر ويتحسن وبعد العصر ثقل وزان الخيال وقام يرش على جنوب سدير .. جت علوم امطار صبت منها المرازيم على العيينة وهواها جنوب شرقي وحطوا تحت الهواء ألف خط ... السحاب طلع نصوب وقام يبرق ذكروا برق على عفيف ومطره غزير وبرق قبلة الرس وبرق يشاف شمال غرب شقراء و برق شمال الدوادمي وامطار خفيفة عليها .. رش خفيف (سواد شوارع) على القويعية

يوم الجمعه 4 ذو القعدة/25 نوفمبر
السحاب ركب فوق الرياض وترشرش خفيف والدلم رش خفيييف سواد شوارع وكذلك الحريق اسودت الشوارع وتنقيع خفيف والحوطة رش حليو وصبت المرازيم مع الفجر في العيينة .. ترعد فوق الظهران صباح الجمعه الساعة 8 ومطره طيب وكذلك الجبيل والدمام والاحساء والقطيف,,, خف الخيال كثيرا واصحت السماء .. هواها جنوب الى الهيف قليلا وفي القصيم نسري .. بعد صلاة الجمعة قامت النصوب ترتفع وتزين على عفيف وجنوب غرب وجنوب الرس ,, أمطار متوسطة على جنوب شرق ضرية حدرت الدعوب وسالت الصنوع .. مجيلة طيبة شمال الرياض وسالت الدعوب شرق الدوادمي
سحابة مسدية مع المغرب شفتها شمال الرياض ومزونها باينه من غرب .. اشتعلت البروق وقامت السحاب قام يخيل والهوا صار نسري وقامت تجي علوم من شمال الدودامي سحابة نزلت الدعوب ومشت العبارت بعد المغرب وسحابة شمال الرياض جهة صلبوخ والقرينه حدرت منها الدعوب ,, امطار غزيرة وبروق ورعود العمارية شمال غرب الرياض أمطار الآن علىحريملاء ومفرق ملهم وشمال ساسكو على الخط السريعوفي إتصال من أحد الثقات البروق تشاهد غرب العيينة وشمال منها بعدالمغرب من هذا اليوم امطار غزيرة على طريق القصيمقبل الرياض بخمسين كيلو بعد المغرب وبعد العشاء اتصل علي اخوي وقال أمطار غزيرة وبروق قوية في حي الشهداء(غرناطة) شمال الرياض ,, جت هالعلوم اللي توسع الصدر وقررت الخروج انا وواحد علشان نخيل البروق وكانت البروق شمال وشمال غرب وغرب الرياض بروق بطيئة جدا ,, ثم خذينا لنا ساعة وقامت البروق تشتعل وصارت حية (بروق حقوق)
ويجيلك في الدقيقة حول 15 برق ومطرها طيب بين مرات و ام سليم شعيب الغزيز ممشاه طيب ... بروق غرب الحريق وشمال غربها أمطار وبرد على دوار حفر العتش برق يشاهد غرب وشمال غرب الأفلاج برق يشاهد غرب القويعية الساعة 9 مساءا ومطره طيب بالحيل ,, برق شرق تمير ,, بروق طيبة في قبلة ثادق يخيلونه على عبيثران ,, حريملاء الساعة 11 بروق ورعود ومطر طيب جدا ومعه برد (يتميز السحاب بكثرة الطها تحته) ملهم القرينه سدوس بروق قوية الساعة 11.30 مساءا برق حي قبلة المجمعة ومطرة متوسط برق غرب الرياض الساعة 12 ليلا ورش خفيف ..
علوم الشعبان تسر ,, جميع شعبان حريملاء تضرب وتدخل السد ,,, شعبان سدير الجنوبية تمشي ممشا طيب اللهم لك الحمد سال وادي الخليف والمظلم والوعرة سيل جيد جنوب اشيقر وكان معه برد .. شعيب الحيسية ممشاة وسط مع العلم انه لأول مرة يسيل منذ بداية الوسم

يوم السبت 5 ذو القعدة/26 نوفمبر
مع الصباح الباكر وبعد الفجر ديمة على الشرقية ,, الساعة الخامسة صباحا بروق ورعود والمرازيم تصب في الدوادمي ,, رعد شمال بريدة ومطره رش قوي ,, ديمة خفيفة شمال غرب القصيم ,, امطار غزيرة ورعود وبروق على شقراء والشعبان سايلة وسحابة مقبلة عليهم معها صواعق ,, شعيب صلبوخ يمشي ,, امطار غزيرة جنوب سدير ,,, الخيال طيب بالحيل وقوي ومظلم ,,, هواها جنوب شرقي ,, السحاب قبل الظهر اشتد وقام يتجزع (جزع) نصوب زي الجبال سبحان الله مطر غزير جدا وبرد شمال الأرطاوية ,, وسالت عموم الأودية اللي بين الارطاوية والمجمعة من قوة المطر,,, الزلفي سمعوا الرعد وجاهم مطر طيب صبت المرازيم وبعد الظهر مطر قوي ومعه برد ,, جراب جاهم مطر غزير ومعه برد ,, الجمش سايل سيل طيب جميع شعبانه ماشيه ,, الدمام والظهران والأحساء والجبيل مطر وبروق ورعود ,, مطر بروق ورعود مع برد على الشبيكية غرب القصيم ,, هواها جنوب شرقي قوي ,, مطر قوي وبرد على القرارة وطفخة جنوب غرب الرس ,, بعد العصر مطر في الرس برق ورعد على الغاط ومطر متوسط مع بروق ورعود على البدايع ومطر طيب على عنيزة بداية رش خفيف على بريدة وصوت الرعد يسمع المذنب مطر طيب معه بروق ورعود ,, امطار غزيرة وزخات من البرد على العيينة ,, حريملاء مطر غزير وبروق وصواعق ,, ملهم أمطار غزيرة جدا وبرد ,, أمطار غزيرة وبروق ورعود وقليل من البرد على المجمعه وشعبانها الجنوبية سالت ,, سحابة برد قوية ضربت اشيقر ,, حوطة سدير امطار غزيرة ورعود وبروق ,, بعد المغرب تمير امطار خير وبركة متواصلة ولله الحمد ,, ثادق امطار غزيرة مصحوبة بحبات البرد وامطار غزيرة وبرد على رغبة ,, روضة سدير امطار شديدة بعد الساعة السادسة مع بروق ورعود ,, شقراء الساعة سبع ألا مطر غزييييير جدا وبروق ورعود جمعوا المغرب والعشاء وكذلك ثرمداء امطار غزيرة وبروق ورعود ,, النعيرية مطر قوي وجمعوا المغرب والعشاء من قو المطر ,, امطار على الدمام والظهران ,, بعد العشاء سحاب يرعد فوق حي الصحافة شمال الرياض والثمامة مطر قوي ومعة قليل من البرد,, بروق ورعود على غرب الرياض ومعه مطر قوي بس ماطول ثم ديمت على وسط وشمال الرياض ,, استمرت الامطار الخفيفة على مناطق متفرقة من الوسطى ,, علوم الشعبان تسر الخاطر ولن استطيع ان احصرها في هذا التقرير لكثرتها ,, فاللهم لك الحمد ..
يوم السبت بالفعل كان يوما حافلا بالأمطار لغزيرة في الغالب ..

يتبع ................................