ياللي ملكت القلب بشويش بشويش
ارفق بحال اللي حداه الغشاشي
ياللي عليك اعروق قلبي معاطيش
من سبتك عفت الهناء والفراشي
ياروح روحي يكفي اليوم تطنيش
إما تزيد الوصل ولا بلاشي
عذاب هجرك فنش القلب تفنيش
والضيق من بعدك تربع ابجاشي
ودي أعرف أسباب هجرك على ويش
جهلي بها يازين زاد اندهاشي
حسيبك الله كيف بنساك واعيش
حيرتني وحتار فكري وطاشي
حبك حفظته والغلا جند تفتيش
ياويل منهو ناوي له وناشي
أحب خلانش واعادي معاديش
قدرك على راسي وبلقب عاشي
فديت أنا روحش وعمرش واهاليش
ياغيمة إحساس العطى والمعاشي
قلبي كفخ به ياغلاي أشقر الريش
كنه بالاستسلام قلب النجاشي
امزون ذكراكم بصدري مراهيش
حفظتهن من جور حاسد وواشي