أرجوك يا مهجتي بالله قلي
ليه الغياب اللي بلا عذر وأسباب ؟
الشوق أسرف بي و أربك خيالي
أربك دموعٍ حايرة بين الأهداب
طيفه مع الأشواق زاد أشتعالي
أوقد حنينٍ داخل القلب قد ذاب
صدك يا روح الريم فوق أحتمالي
يا أول قصيدة عشق يا عزّ الأحباب
شوف الحنين اللي خذلني ليالي
تدوي رياحه تكفخ بهاك الابواب
وين العطايا اللي مناها وصالي
وين الشعور وحلفك بذيك الأرقاب ؟
حتى خيالك شح يا راس مالي
حتى صحيت بيوم على واقع أغراب
بس الليالي وش تخفي الليالي
هذا صوابك بالحشا ما بعد طاب
أشقى أنا بهجرك ويبقى سؤالي
ليه الغياب اللي بلا عذر و أسباب؟