المجلس
عبدالله بن غالب الحربي
المجلس اللي فيه فنجال دله
وفيه البخور وباد عين المثايل
وفيه السوالف وارده بالادله
عن الرجال أهل الوفا والصمايل
والله مامله ثم والله مامله
كله حصيله من كبار الحصايل
مركاه عزولايجي فيه خله
ومسانده من تسنده ماتمايل
والعز في كامل معانيه كله
بين المجالس منزله بالاوايل
احرص عليه وموقعي فيه أدله
مافيه عن صدره محيد وبدايل
مجلس مثالي من لقاه وحصله
يحرص عليه وفيه خير وعقايل
وبعكس هذا فيه للكبد عله
المجلس اللي بس قيل وقايل
وش عاد لوزبرق للاعيان زله
به ريحه العطبه ونار الفتايل
واللي يعرف العلم يعرف محله
للمرجله عنده رسوم ودلايل
به طيب به نخوه ويأبى المذله
حر وميقاعه على كل طايل
والجود رأسي وسط قلبه جبله
مرساه مرسى ضلع حاتم بحايل