لا تضيق صدري بصدتك.. وانت معزوم
في عيونن..صارت أوسع من البيت الكبير
مرحبا.. ترحيبة البدو بالسيل العروم
اقلط وريح ركابك.. ترى الدنيا بخير
والله إني لشبعك.. حب وأخبار وعلوم
واحتفل في جيتك.. وانحر لوصلك بعير
لا تغلبني معك..كل صبح وكل يوم
تدري إن العشق.. فيني ليا الأمر الأخير
يا مخلي مهجتي.. قاع ووصالك غيوم
لد فيني.. وروي القاع بالماي الغزير
لا تخليني كذا.. بين معطى ومحروم
ونت تدري جيتك.. تعني الشي الكثير
ما ورى فرقاك.. غير الهبايب والسموم
ولا ورى لاماك.. غير الخزامى والعبير
لا تلوم.. الخافق اللي يحبك لا تلوم
وانت ما يعذرك.. طيشك ولا العمر الصغير
تايهن لرضاك.. بين المغادر والقدوم
كل رحلة من عيونك.. لها قلبي سفير
لا يضيع الحب.. في خافقك وانت مخدوم
والله إني مضمن إن عشت.. ويش اللي يصير
يمكنني.. أعشق إنسان غيرك لي رحوم
ويمكنني أكرهك.. بعد ما ذقت المرير
الشاعر / نايف زويد