[سراب]

الهجر ما يبري قلوب المحبين ** الهجر سمــ ن للقلوب الرهيفة
و انته جفاك أيجرح القلب يا زين ** مالك و مال أدموع عينٍ ذريفه
محبتك تجري بوسط الشرايين ** قلبي وليفك يوم قلبك وليفه
ارخص على شانك جميع القريبين ** لأنك شبيه الروح لأنك وصيفه
ما تغيب عن قلبي و لو تشرد العين ** عن صورتك يا نبض قلبي وريفه
ما تدري إني صرت ضمن القتيلين ** العشق سلّ اليوم رمحه وسيفه
تجفى و تنسى ما لحبك قوانين ** مالك هوى فأهل القلوب النظيفة
مالك مع أهل العشق مذهب و لا دين ** ترخص محبك .. لجل ناسٍ ضعيفة
تسمع كلام مفرقين الوليفين ** تسمع كلام أهل العقول الخفيفة
اللي تولّف دون حق و براهين ** كم فرقوا بين الوليف أوليفه
يا ما على شانك نظمت الدواوين ** سجلت فيك أحلى الحروف العفيفة
يا ما على شانك عبرت الميادين** كله على شانك و لا فيه خيفة
واليوم ماني تابعن كل مقفين ** سج الركاب .. النفس صارت معيفة
بعدي معزّه عن ركابٍ بعيدين ** ما نتبع اللي ما نوى بالنكيفه
قطعت ما بيني و بينك و هالحين ** اطو الذي ضمت حروف الصحيفة
الصيف يقفى يانعات البساتين ** عقب الربيع اللي سوات القطيفة
ما تنْجبر روحٍ على روح يا زين ** و القلب يلقى من يواسي نزيفه

قمة في الابداع والاحساس المرهف
قصيدة تعانق المشاعر
سلم ذوقك اخي ساهر