عز الله الوقت ما يحتـاج
كثرت بلاويـه وصدوفـه
ما هو على فطرته منعاج
يالله دخيلك مـن عجوفـه
حلومه اللي مضت بِهـاج
راحـت بذكـراه وريوفـه
يوم الليالي قمر وسـراج
يا زيـن دلـه ومعروفـه
البـدو لا شافـوا اللعـاج
شدو علـى لايـح قنوفـه
يلقون سيله بحـر مـواج
من وسم وألا من صيوفـه
ما خاب في حروته من داج
دنيا ً تنومـس ومخلوفـه
واليوم ريح الحيا لا فـاج
دارت شماليـة شعـوفـه
متغيـر ٍ بالزمـان ابـراج
ماهو على حسبة صروفه
والناس من ضمنه وعِراج
تعيش بقلـوب منصوفـه
أشوف بعض العرب لجاج
دق السواليـف بوصوفـه
دايم علومه خضر وسماج
لو قصر العمر في شوفـه
بعض العلل ما يفيد عـلاج
تصعب على الطب وسعوفه
الشيب حكمة وقار وتـاج
هيبه وله شيمـه ونوفـه
والعمر زهرة / وحد سياج
لابـد مـا تقبـل حتوفـه
والصبح لابـد مـا ينبـاج
لو طـول الليـل بطيوفـه
قلته وأنا ما علي احـراج
قافي عقد حجـة حروفـه
شعر
صبح المطر