على الجزيره صادق الوسم تضفيه
يالله ياللي صادق المزن تنشيه
تسقي ديار(ن) يابسه من ضماها
وإنك تجيب الصادق(ن) من مناشيه
والارض عقب الموت تبعث حياها
وعلى الجزيره صادق الوسم تضفيه
يخيط نوه فوق كامل سماها
اسبوع كامل والمخايل تساقيه
وعنها الهبايب جنب الله نحاها
والعشب طالع والمطر ناقع(ن) فيه
والارض زانت من خضار(ن) كساها
ياخذ شهر ويعود سيله يساقيه
والارض من نبته تزايد حلاها
وراع الحلال الطعم ماعاد يشريه
شهرين ماينشف عن الارض ماها
هذا كرم من واحد(ن) دوم نرجيه
اللي عبيده لا طلبته عطاها
مسند مازن الميزاني
|