السلام عليكم ورحمة الله وبركاته
من أوراقي القديمة آمل أن تحوز رضاكم
لا ياقلم لا عاد تكتب ولا حرف
ملت عيوني من حروف القوافي
العمر خلص وانتهى وانصرف صرف
وما فات أظنه يا قلم منك كافي
آخر طلب سطرين في داخل الظرف
أن نفترق يا زين والستر ضافي
وفيت يومي فالهوى عاشق صِرف
و الحب بحر مال شطه مرافي
واليوم مثل اللي مهيف على جرف
و من يامن التيار والانجرافي
خلاص كانك تدعي الفهم والعرف
ما هيب دايم كل يوم عوافي
بصبر ولو عيني ذرف دمعها ذرف
أنا على الفرقا كتبت اعترافي
ما عاد ني جايك ولو يسمح الظرف
أبي العذر يا بو الثمان الرهافي
أسرفت في حزني بعد غيبتك سرف
وقررت أسوي في المسير انعطافي
بعد الجفا ما عاد لي يمهم شف
من عز نفسه ياخذ الحق وافي
لا ياقلم لا عاد تكتب ولا حرف
وفيت معي وما مضى منك كافي
؛؛؛
؛
أخوكم::محمد غازي الروقي
مغآمر