[عبد المجيد]

قصيدة للشاعر خالد الوقيت من محافظة الرس

الوسم قرب يالصبيحي نصيفه ** والجو خبرك والمراميـــــــث يباس

وذنوبنا غطّت بياض الصحـــيفه ** لو تنحسب ياصاحبي ماله قياس

ايارب لاتجعل خـــــــطانا نكيفه ** ياواحدٍ عدله للانــــسان نبراس

يا الله بمزنٍ هايلٍ في صــــــــفيفه** لاشافه الشايف تبـشّر بالاوناس

برقه يشوق المستخيل برفيــفه ** ورواعده ترزم مثل صوت الاجراس

اسبوع ما ياقف علـــــينا وكيفه ** يودع مساهيب الخلا كلها اوطاس

من عقبه الاوطان تصبح مريفه ** وتلبس من صنوف الحيا زين الالباس

غرضك خوّة كل نفسٍ شـــريفه ** اهل الشكاله والجـــــماله من الناس

لاجوّا في دِعْـبٍ نظيفٍ غريــفه** والورد باطـــــرافه من الريح مِيّاس

ثم اضرموا بالرمث نارٍ كثــيفه** وداروا حواليـــها على الزل جِلاّس

وصفّوا بها صفر الدلال الهديفه ** اللي مباهـــــــرها تعايط بالانفاس

فنجالها يبرد غليلك رهيـفه** عقب الغثا ويصحْصحك عقب الاعماس

وسوالفٍ في كل فنٍّ طريـــــــفه** ماهي سوالف كل غـــــاوي وهلاّس


هم ذكروني في ليال النشيـــفه ** واخذي بها من سجّة العمر مرواس

ايام ربعي للمـــطارد لهيفه ** تضرب على التأخير باخماس واسداس

تال الشهر والجيب تسمع وحيفه ** يم الحزيم ويـــم نزّاح الارماس

اديار لو هي يالصبيحي مخيفه ** لاهل الولع خابر تباسيط واوناس

ذكرى لها عيني تهامل ذريفه** والقلب يسبح في بحر كل هوجاس