شبكة البراري - اقبل علينا السحاب وزين تفريعه . الحلوة والسيل

https://www.alhotah2day.com/contents/...2e9445c98a.jpg

اقبل علينا السحاب وزين تفريعه
تفريع عمهوجة بالحسن مليانه

قام يتحمحم كما شيخ نوى نيعه
ينزل قهر في ربيع بين عدوانه

الله أكبر ودمدم في مطاليعه
يروي ظما ديرة بالسيل فرحانه

أظلم حدب كن برقه في ملاميعه
أنوار دوريّة بالطرد بلشانه

نفش الرباب يتلاعب تحت تربيعه
يلعب كما طفلة بالعيد طربانه

اثبت وجوده على مطعم وتوقيعه
وختّم جوازه وفيّز فوق شعبانه

واضفا على الفارعه واعلن مراميعه
وشاف الرحل شايب ترجيه حيّانه

فلّل رواقه وبطّح في مذاريعه
وقام يتعبّر ودغّ السيل وديانه

كتفه على عنثر وعلباه في ريعه
واطراف رجليه في رنيه لها رطانه

وفياض فيّاخ لجّت عقب ترويعه
خبط المطر ثار في عجه ودخّانه

والقاع للسيل ما جنبيه بتطيعه
يشرب صفا ثم ينسف يم جيلانه

ما كل دار لها بالسيل توليعه
ولا كل دار مليحة به وخرمانه

ولا كل دار تعلّي جاه وتذيعه
وما كل دار يود السيل ريضانه

الحلوه اللي لها بالسيل تشريعه
يزها بها ثم هي به دوم ولهانه

هي ديرة اللي لهم بالكيف تطبيعه
وان جا الخطر هم بواريده ونيرانه

الشاعر :
عبدالله بن علي الخريف