شبكة البراري - قصيدة الشاعر فيصل السواط العتيبي بعد خروجه من ( شاعر المليون

بسم الله الرحمن الرحيم

]

قصيدة الشاعر فيصل السواط العتيبي

بعد خروجه من برنامج ( شاعر المليون )

يا لاهب الجمرة على الغليـون +++ ماعـاد عينـي تقبـل الدخـان

خل الوجع وسط الحشا مكنون +++ واسوق فنجاله مـن الرسـلان

ويميل من نخل الحسا عرجون +++ يطعم حلا تمره نظيـف لسـان

يميّز اهل ( التين والزيتـون ) +++ التيـن والزيتـون والـرمـان

ولا الحسود يعصر الليمـون +++ على حشاه ويعـزم الشيطـان

والوقت لا صاحي ولا مجنـون +++ والتجربه تثبـت لـك البرهـان

والناس لو يـدرون مايـدرون +++ والبحر فيه القرش والمرجـان

والله يخلّي (شاعـر المليـون) +++ ورّانـي الاصحـاب والعـدوان

صارت عيوني عن ثمان عيون +++ واحقّ ما يخفى ورى الجـدران

عن البضاعه قيمـة العربـون +++ وعن الكتـاب يكفّـي العنـوان

واثر اختلاف الشكل والمضمون +++ مثل اختلاف الطعـم فالريحـان

كم من جبل شامخ طلع كرتون +++ وكم من رجل فارغ طلع مليـان

وكم من قريب ابعد من الجابون +++ وكم من بعيد اقرب من الشريان

ما فـرّق الأميـن والمأمـون +++ مع انهم يااهل العقول أخـوان

الا لظا الغيره وحـرب الهـون +++ وراسٍ رماه الـزود فالنقصـان

عزاي وقفة سيفـي المسنـون +++ اهـل الحميّـا ربعـي العتبـان

واليا بـدا فالماقـف الدنـدون +++ وش حاجتي في طقّة الورعـان

شاعر ولي بين السحاب لحـون +++ يسجع بها القمري وهو طربان

مااقول مثل الشيخ ابن لعبـون +++ ولاْ احسن امن الرمز ابن جدلان

لكنّ كـلٍ فـي جمـاه سنـون +++ وكلٍ على بحـر الفكـر ربّـان

ماضرّ ابن حمديس ابن زيدون +++ ولاْ الغى ولد سينا ولـد حيّـان

يكفي شهاده من صليب الشون +++ مستور ابن تركي رفيع الشـان

لحيه تفرّق بيـن لـون ولـون +++ ماهيب لحية صاحبـي غسّـان

والحمـد لله رب هـذا الكـون +++ والشاهد الله مانـي بخسـران

اطلقت من سجن الشقا مسجون +++ وزرعت بقلوب العرب بستـان

وفرشت فالقمرا سُفر وصحون +++ على شرف حلم وطموحٍ كـان

مارحت ادوّر كيس ابن طحنون +++ ولاّ علاقـه مـعْ بـنْ نهيّـان

والآدمـي دون الكرامـه دون +++ مايرفعـه حاكـم ولا سلطـان

وش قيمة الإنسان يوم يهـون +++ ووش قيمة الشاعر بدون انسان

هاذي حكاية شاعـر المليـون +++ من جمـرة الغليـون للدخـان

منقول ..