شبكة البراري - يامكثرين الهرج لااسمـع ولااجيـب

السلآآآم عليكم

اسعد الله أوقاتكم بكل خير

هذي قصيدة من أجمل وأجزل القصائد لي مرت علي هالايام

للشاعر/لافي حمود الغيداني
.
.
يامكثرين الهرج لااسمـع ولااجيـب
00000تريحوا من فضلكم واسمحـوا لـي

تريحـوا لاتلحـقـون المشاهـيـب
00000على الردى ماني شفـوق عجولـي

بالعقل والصبر ادب النفـس تاديـب
0000000والا لهـا مـده تصـول وتجولـي

خلج ترازم فـي سيـاج المحاديـب
000000مافيهـن اللـي بالعقـال معقـولـي

اشد وطية زور مـن شمـخ النيـب
00000اليا ضاع مفعو ل الحيل والحلولـي

انا لاقلـت ارتـب القـول ترتيـب
000000حتى يجي كـي علـى فـك قولـي

اليا ارسلت لافكار القريحه مناديـب
00000000ترايعن من عقـب ماهـن جفولـي

لكن مالـي مـن وراهـا مكاسيـب
00000000لو كان عشاق القشـر صفقـوا لـي

مامستفيـد الا العـدو والاجانـيـب
000000000ولاني مطيـع مقرقعيـن الطبولـي

خليتهـا تعطـي فجـوج مجاديـب
0000000000جربا تجود فـي رسنهـا مهبولـي

والله لااجنب دام لـي درب تجنيـب
0000000000من شرهة حشام الرفاقـه خجولـي

لـو انهـا بيـن النحـر والتلابيـب
00000000000من الحيا وجهي مهـوب مغسولـي

طبـع لنـا نشـب عليـه ونشيـب
00000000000000وطبيـعـةٍ لعلـهـا مـاتـزولـي

على الجماعـه للجماعـه مواجيـب
0000000الا جهلوا قـدر الرفيـق الهتولـي

ماني على ربعي قريـب محاضيـب
0000ادنـاة مايخلينـي اسـرج خيولـي

ان جات من طيب شقاها على الطيب
0000000لو انها اعوج مـن رقبـة الذلولـي

وان جات من مسكين منطق واساليب
00000000حطيتهـا بيـن الثـرى والنعـولـي

لاحركت شعـره ولاطلعـت شيـب
00000000ولاضيقت صدري ولاطـق جولـي

وان كان في صبري على ميلهم عيب
000000العيب تفتيـش الصـرر والحثولـي

لاقمت تذكر في رفيقـك عذاريـب
000000000وتبيـن عيوبـه لذولـي وذولــي

صبرك على ربعك علاج وتطابيـب
00000يقصـر حبـال السالفـه لاتطولـي

حتى مايلقا فـي طرفهـا مقاضيـب
00000كـراه خيـر وللمشاكـل ميـولـي

واليا بليـت بتايـه شـره وصعيـب
000يقول انا العراف وانـت الجهولـي

قـل الله الله ياحصـان الاطالـيـب
000يالفاهـم العالـم عطيـب الفعولـي

هذا الكلام اللي مافي صحته ريـب
00لانيـب لاحولـك ولانتـاب حولـي

حصان وبن حصان طيب مجاذيـب
000وبالمعرفه رجـل محلـي ودولـي

خله يروح يخطي الدرب ويصيـب
000يقول مابالنـاس عرضـي وطولـي

والفرق ماهـو باللحـى والاشانيـب
000لفرق بيـن النـاس فـرق العقولـي

كم واحد تحسن به الظـن ويخيـب
0000السـن يضحـك والفـواد معلولـي

واللي غدت به كلمـة مالهـا غيـب
000ماهو من اطيب ربعي اللي غود لي

يالله عساها صيحة فـي قفـا ذيـب
0000وقلـع النيـا بينـي وبينـه يحولـي

الرجل مايغصب على الطيب تغصيب
00000اليا صار ماهو دل ضمـن الدلولـي

ومن عادة اللي طيبه يحضر ويغيـب
00000000000لاطالـت الرفقـة زهـوق ملولـي

واليا بلنـك غبـر الايـام بصحيـب
00000في مستوى طيبه صعـود ونزولـي

اعرف ترى الدنيا دروس وتجاريـب
000000والكامـل الله والنـقـا للرسـولـي

لاتصير مشـذاب يقـص العراقيـب
0000خلـه وراع الاولـه وش يقـولـي

اخذت حكمه مـن كـلام اللواعيـب
00000000للطيـب نـاس وللعـذارى فحولـي

وسلامتكم