شبكة البراري

شبكة البراري (https://www.albrari.com/vb/index.php)
-   همس القوافي للمنقول ( قصائد - شيلات - خواطر ) (https://www.albrari.com/vb/forumdisplay.php?f=109)
-   -   (¯`•._.•[(.... بقآيآ .. حرف .... )]•._.•´¯) (https://www.albrari.com/vb/showthread.php?t=63279)

بقآيآ .. حرف 2020-06-27 04:56 PM

‏الكبَد والحزن ومداول ايام الزمان
واقعٍ يسلب من الآدمي حريته

ياظروف الوقت لو كل مانـبغاه كان
يمدي الانسان يطغى على انسانيته

يبطش الدنيا ويعطي على الغيب الضمان
مـير ذي تختـص بالله و وحـدانيـته

ربي اني مسني ضر بلوى وامتحان
عارضٍ ماتعلم الناس بخصوصية

سفر الدغيلبي

بقآيآ .. حرف 2020-07-04 11:46 AM

‏فيني من الصبر ما يكسر ظهور الجمال
وفيني من العز ما يسند مقام و ظهر
أحداث الايام مقبوله على أي حال
ان أقبلت خير وان قفت قضاء وقدر

لشاعرها ....

بقآيآ .. حرف 2020-07-04 11:46 AM

‏المهم إني معيف وخاطري سامح وطايب
ما بقى عندي من أصناف الطموح إلا القناعه

لشاعرها .....

بقآيآ .. حرف 2020-07-04 11:53 AM

‏‎#ذاكره

تمر في بال الشعر بعض الاحيان
واطردك حتى من رحابة خيالي
تطري ويطري كل جاحد وخوان
"ماكل من يطري على البال غالي "

‎#أوراق_منسية

محمد عيضه

الركام 2020-07-05 09:45 AM

ودع الترحـال واقـعـد للـمـقــيـــل
صيـفنا اللاهـب بدا نجـمـه يبين

راح وقــت كـان ذعـذاعـه عـلــيـــل
وحـلـت رياح سـمــوم الـلـه يعين

النهـار يطــول ولا نلـقـى ظـلـيــل
والشــجـر متعـري وحـالـه يشين

لاحراوي غـيــم ولا وادي يسـيــل
والمـيـاه بنـقــص عـند الـزارعين

لا بحر مـوجـود ولا به نهر نـيـــل
يبست الاشــفــاه عـنـد الناظرين

كـل عـام نرقــب الجـو الجـمـيــــل
وكــل عــام تمـضـي ايامـه بحين

مـايدوم الحـال هـذا مسـتحـيــــل
وكــل وقـــت راح يـبـقـى لـه حنين

الركام

بقآيآ .. حرف 2020-07-10 04:14 PM

‏ياما انتظرتك فاتحٍ عمري اقواس
لين اجدبت روحي ولا جيت ديمة !

مبطي وصبري نافذ وقلت لك : حاس
إني معاك أشعر بضعف وهزيمة .

‎رزان

بقآيآ .. حرف 2020-07-10 04:23 PM

‏مثل مايرجع من الحرمان حمّال الغبينه
مثل مايرجع من جهاد المدن طفل القرايا

أرجع لوحدي وكل انسان جَت عيني بعينه
فيه احد مِنّا ترك في خاطر الثاني بقايا

عاطف الحربي

بقآيآ .. حرف 2020-07-10 04:48 PM

‏مارحت هايم على وجه انسدال الظلام
الا لإني بصير بكل [ ماطا قدم ]

كوّنت لي مجتمع خالي من الإنقسام
بعد الله اوجدت كل اشيائي من العدم

يغنيني الله بقطره مع هطول الغمام
عن كل ( جيّه ) يلاحقني وراها ندم !

‎مشعل

الركام 2020-07-13 10:51 AM

https://www.albrari.com/vb/showthread.php?t=90591

بقآيآ .. حرف 2020-07-25 11:08 AM

العذر في بعض الأحيان ما يلقى قبول
في وسط صدر تحمل زعل لين امتلا
مشكلة غلطتك ما تقبل انصاف الحلول
والمصيبه لك معزه وتقدير وغلا

مساعد الرشيدي
رحمة الله عليه

بقآيآ .. حرف 2020-07-25 11:09 AM

‏حسبي على من قالوا الذيب ما فيه حسنه
ماهم بدارين الذيابه على ويش تعوي

وصل العطياني

بقآيآ .. حرف 2020-07-31 12:39 AM

طابت أوقاتكم بما تحبون
مبارك عليكم عيد الأضحى
تقبل الله منا ومنكم صالح الأعمال وكل عام وانتم بخير وصحه وسلامه
أبو خالد

بقآيآ .. حرف 2020-08-16 11:47 AM

ياساري الليل سلم لي على الساهرين
والله يخلف عليهم فالسهر والتعب

بقآيآ .. حرف 2020-08-16 11:54 AM

ِ
لك جمعت المشـــاعر والوفاء والغلا
وكان يعجبك جرحي ابشري بالنزيف

من عـــرفتك وانا لك احتضـــر بالولا
وازرعك فصل خامس
. وانتي فصل الخريف

دام حبك وشــــوقك والحـــنان بخلا
اشـــكرك بالقنــاعه يا فتات الرغيف
ِ
ِ
‎محمد الخضيري
ِ

بقآيآ .. حرف 2020-08-16 12:11 PM

‏مخذول .. واحلامي الحلوه نست تكتمل
على كثر ما سعت روحي .. لمرضاتها !
‎نواف التركي

بقآيآ .. حرف 2020-08-22 05:59 PM

‏ماسكتت الا وانا ادري من اكون !
و صمتي لحاله ، رماحه صايبة

خاطري مرتاح من كثر الظنون
و ما يهبّ من الرياح ، يلاعبه

أبتسم للمشهد و قلبي عيون
و من زمااان النفس منكم طايبة

ان بغيتوني أطيح ، بتتعبون
الحسد ماياكل الا صاحبه


لشاعرها ....

بقآيآ .. حرف 2020-08-22 06:06 PM

‏ماتبي تروي ضماهم ، غَطّ بيرك
من يناحيه الضما ، غصنه هزيل
لاتنقّص من مواجع شخص غيرك
كلنا همّه على متنه ثقيل

لشاعرها ....

بقآيآ .. حرف 2020-08-22 06:09 PM

‏قدّم الخير و انوَه ، مو ضروري تقول
ما تخون الفعايل لو تخون الجمُل ،
لا تصنّع ، قنِاعك - بالمواقف / يزول
و خل نكران طيبك ، وارد و مُحتَمل
القمر لو تجيبه عند من لا يطول
قال وش فيك جبته قبل لا يكتمل
المحبة من الله ، و الغلا و القبول
لا تكلّف شعورك فوق ما يحتمل


لشاعرها .....

بقآيآ .. حرف 2020-08-22 06:21 PM

‏بلّغوا عني رغم هذا الشتات
بيت من ذمّة و احساس و ضمير
أمر ربي ما كرهته بالحياة
و كل ما يقسم لي الله قلت خير


لشاعرها ....

بقآيآ .. حرف 2020-09-05 08:54 AM

‏اكبر معا الايام واشطب العلاقات
واطوي يدين الوقت وامد ساقي

ما عاد تفرق سود الايام لو جات
اسود من الي فات ؟ ماظن باقي

بقآيآ .. حرف 2020-09-05 09:05 AM

‏قلت ازرعك في رصيف الذاكرة لو رحل
صوتك .. وصار المكان انسان من دون روح
.
واحل عقدة ومن عقّد حباله يحل
قدام لا يعقده حبل الزمان الشحوح
.
جيت إبدويٍّ على العشبة نزل وارتحل
والبدو من حيث ما ينبت حياها تروح
.
انسان عابر شرب وجهك وعوده نحل
جالك بلا جرح .. واقفى ممتلي بالجروح

عبدالله سعيد

بقآيآ .. حرف 2020-09-05 09:13 AM

‏ماعلى سنانّة الحرف من حدّ السيوف
تنقطع ايدين الأحرار بأطراف ورقة

كنّي الليلة لي "أربع حناجر" يالهنوف
و أسبح فبحر (المواويل) ما أهاب غرقه

بيني وبين المحبّة من العالم صفوف
مثل مابين العفيفين / و أهل التفرِقة

من ينجّيني من الليل؟ روحي ماتشوف
الصباح يخبّي النور خايف لا اسرقه.

فارس

بقآيآ .. حرف 2020-09-05 09:15 AM

‏يالبعيد اللي قبل فترة قريبي
اعتذر لك عن قسى قلبي وظرفه

النصيب اللي جمعنا مو نصيبي
ذا نصيبك وانت شف لك فيه صرفه

كان لك وجهين، واحدهم حبيبي
ووجهك الثاني اعرفك ما اعرفه

لا اختلفت بعين قلبي وش تبي بي؟
ما اشوفك غير دمع وحان ذرفه.

فارس فايح

بقآيآ .. حرف 2020-09-05 09:19 AM

‏وين درب الخيرة اللي نسمعه ولا يشاف
اسئلة في نفسي لنفسي ونفسي هايمة

راعي العمرين لو يقسم سنينه للضعاف
تكفي اللي عايش احلامه بعمرٍ نايمه

عن دوام الحال واحكام القدر واللي يخاف
من رضى بمقدّر ومكتوب محدٍ لايمه

إن بكيتوا ماورى سيل الدموع الا الجفاف
وإن ضحكتوا ضحكة الأحباب ماهي دايمة

فارس فايح

الركام 2020-09-16 05:06 PM

مـايدوم الحـال هـذا مسـتحـيــــل
وكــل وقـــت راح يـبـقـى لـه حنين
////////
الـغيـاب الـيـوم هو اكـبر دلـيـل
ان مهمـاصـار تمحـيـه السنين

بقآيآ .. حرف 2020-09-19 02:11 PM

اقتباس:

المشاركة الأصلية كتبت بواسطة الركام (المشاركة 1053548144)
مـايدوم الحـال هـذا مسـتحـيــــل
وكــل وقـــت راح يـبـقـى لـه حنين
////////
الـغيـاب الـيـوم هو اكـبر دلـيـل
ان مهمـاصـار تمحـيـه السنين


صح لسانك أبو سعود


( المحبه وطارت في مهب الرياح )

بقآيآ .. حرف 2020-09-19 02:22 PM

‏‎#قصيدة

حولك اكثر من ظلال وحولك اكثر من هدايه
كيف احدّد قبلتك في الروح اذا مالله هداني !

عاد كم تمتد يدّ من الرفاده و السقايه ..
في حرم روحك وانا ماحب احاصرْك وما اداني

عبدالرحمن الشملاني

بقآيآ .. حرف 2020-09-19 02:24 PM

‏لو ذبحت الحلم قبل يعيش .. و يغادر ضفافه..
ما سرق له عمر من عمري.. و قرّبلي حتوفي .!

من كثر ما أبطت دروبك ..
تلمح بوجه المسافه
لو تجيني:
خوف تنساني ..
و خوف بجدّ توفي !

نايف الادهم

بقآيآ .. حرف 2020-09-19 02:27 PM

‏المَرتين .. المُرتين بحياتي
لو يرجعن بالعمر كله بذلته :

مرّة
خذلني من (قصد)في غلاتي
ومرّة
بليّا (قصد) غالي خذلته !


عوض الظامي

بقآيآ .. حرف 2020-09-26 12:57 PM

‏كلّ ما عكّر رديّ الحيل بعض احيان جوّه
شال طاروق القصيد .. وصب ف عروقه غمامة

عوّضه : كثر النجوم الساريه قل المخوّه
كثّر الله : خير فرقاهم .. قليلين الكرامة

ليلهم : لوّه وليته ..صبحهم : ليته ولوه
كنّ هقواته : سراة .. وكنّ هقوتهم : تهامة .. !

- مساعد الرشيدي

بقآيآ .. حرف 2020-10-02 01:45 PM

زرت المكان اللي قضينا به سنين
ولا شفت غير الصمت وذكرى هوايا
دار الزمان وفرق الوقت غالين
ما باقي الا ذكريات وهدايا
ياحيف والله كيف صرنا غريبين
وحيد انا والليل يجبر عزايا
كنا ولايف مع بعضنا سعيدين
فينا المثل يضرب بصدق النوايا
يا وقتي الجابر بربك على وين
يكفي شتات العمر يكفي اسايا

بقآيآ .. حرف 2020-10-02 01:52 PM

‏‎
لاتكره الدنيا على شان مخلوق
خان العهود وحط بالقلب حرقا
قله تراك من المعاليق معتوق
خله يروح ومثل شرواه فرقا

عبدالله رشاش

بقآيآ .. حرف 2020-10-10 02:15 PM

‏مشيت من كان عمر الجرح زلة لسان
وصلت لـ اخر مدى خوفي وتغريبتي

لو بغفر اللي مضى كأني رضيت الهوان
لا يعتذر لي احد وآسف على طيبتي

الذكريات كثرت حسيت مالي مكان
كيف اهجر الذاكره واغيب عن خيبتي ؟

تعبت اواري شحوبي وانكساري عشان
ما تاخذ الدمعه اللي نازله هيبتي

خالد الكيادي

بقآيآ .. حرف 2020-10-10 02:39 PM




الجديد ان جابك الطاري لعنتك
مسلم واذاه شيطان رجيم

بقآيآ ... حرف

بقآيآ .. حرف 2020-10-17 06:06 PM

ياللي كحلتي رمش عينك من الليل
الليل ما يظلم علامك ضلمتين
الليل لاهل الحب دمعه ومنديل
صدرا يهيض به جميع المحبين
لاتتركين اللي طوته الغرابيل
خوذي لتعذيبك من القلب ثلثين
بس ارجعي لاتقطعين المواصيل
باقي بي عروقا املهن تردين
ماعاد بي حيلً يشيلً من الويل
همي وغربالي بدا يوم تقفين
مازلت مشعل لك بقلبي قناديل
لا تهدمي حبً بنيته من سنين

بقآيآ .. حرف 2020-10-24 09:16 AM

لا توجد يا محمد على ذيك الرسوم
ليه تفتح بابي اللي قفلته يا بعدي
والله إني كل ما جيت ابنسى لي علوم
ابتدا ليل طويل علي وسرمدي

بقآيآ .. حرف 2020-11-05 01:27 PM

‏.
🍂
.
مالي ومال العالم المجنون والفكر الغبي
عالم من اصناف ومن اشكال الأنانية هجين

عن كل شيٍ فيه انا محتاج لي خلوة نبي
تطلق سراح الروح من وحشية الطين السجين

عاطف الحربي

بقآيآ .. حرف 2020-11-05 01:30 PM

‏ياابن الرمال السُمر لو للعطش صوت
تفجّرت صرخات اهَلنا سحابه

و امتدّ ليلٍ فَرّ من قبضة الموت ..
ياما سهرناه و قرينا كتابه

عاطف الحربي

بقآيآ .. حرف 2020-11-05 01:36 PM

‏يا نجمةٍ تحت شفتها دفنها الظلام
خجلت من الضي فيها وانطفى لونها

واينع رطبها وسال الشوق برد وسلام
لين اثقلت كَرْبة النخلة وعرجونها

وتبسمت لين سوت للعروق انقسام
وتقسمت فالعروق وباح مكنونها

وابرق تحت شالها الداكن رفيف الغمام
لين امطرت قلب عاشقها ومجنونها

عبدالله سعيد

الركام 2020-11-06 09:12 AM

ياابو خالد جب جديدك ومنقولك
كـل ذواق تجــول بـبـسـتـانـك
ينـتـظر لك دايـم ويتحرى لـك
ينتظر في مجلسك صب فنجانك
🌹🌺🌹


الساعة الآن 03:28 AM

Powered by vBulletin .
جميع الحقوق محفوظة © لشبكة ومنتديات البراري 2010