شبكة البراري

شبكة البراري (https://www.albrari.com/vb/index.php)
-   واحة شعراء البراري ( قصائد، خواطر، نثر) (https://www.albrari.com/vb/forumdisplay.php?f=129)
-   -   *** قصائدي *** (https://www.albrari.com/vb/showthread.php?t=91258)

الركام 2022-06-28 10:23 AM

*** قصائدي ***
 
رســـالة لمنهــو بدا الشعر يكــتـــب
اليابغيت الشعــر ياتــيك طوعـــي

الـزم ثلاث وخـــل بيـــتك مرتــــــب
الوزن والمعـنى وقافٍ سجـوعـــي

وتخـــير لقــولك بوقــتٍ مناســــــب
واخــتار وقـتٍ فيه كل هجوعـــي

واليا اجتمع عندك معـاني فهـــذب
وخل الفراش وخل زين الطبوعـي

وخذ القلم واكتب من الشعر واسهب
تلقى المعاني كلها لك خضوعـــي

وغنه بلحن وارفع الصوت واطرب
وارسل لنا ابيات شعرك تبوعــــي

وان كان ماجا لك مع الشعر مذهـب
خــله ترى مافــيه ســـدٍ لجوعــــي

خــله ترى مافـــيه زودٍ و مكســــب
لا شـك في بعـضه بتـلقى نفوعـــي

ابيات شعــر صاغــها لك مجـــــرب
هـــدية مــالي وراها طــموعـــــي

ابراهيم بن سعود الخريف

الركام 2022-06-28 10:29 AM

ذاعت اخبار المطر من كل صوب
وكـــل دار غــيـــر داري ســايله

حكمة الله مانزل فـهـو محسـوب
ياعـسى مـاهي ذنــوب حـايـلــــه

رحمتك يارب واغـفـر لي واتـوب
مـالمــع بــرق وانـا مـاخـايلــه

كـلمـا هبـت عـليـنـا من هبــوب
جـالنـاخـاطـر بسـحـــب هـايلـه

في الخيال السحب كجبال نصوب
صبهـا من السحـب ماهي مايلـه

وان نـظـرت لحـالنا نـوب ونـوب
مالـقـيـت اللي رسـمت وقـايـلـه

ننتظره الصبح وفي وقت الغروب
ونحـتريه الليل وعند الـقـايلــه

ارضنا جفت وتشكي من نضـوب
والنخـل يبـسـت على مسايـلـــه

رحـمـتـك ياغـافـر كـل الـذنــوب
في سحــاب نرتـوي باوايــلــــه

رحمتك يارب في سحب تجــوب
دارنا الحـلــوة تجـي دلايــلــــه

حبها مانيب انا فيه مغـصـــوب
وحـدهـا مافــيـه احــد طـايـلـــه

ابراهيم بن سعود الخريف

الركام 2022-06-28 10:30 AM

‏‎
دكــة الشيبان جلسة كـل شايب
مير مابالـموت يعطـيـنا مجــالي

كل وقت نودع اصحـاب وحبايب
من رحل ميت ومنهو حي غــالي

كلكم في البعد سبـبـتوا سبايب
يشهد الله عقبكم مانيب سـالي

ان بغيت الحي دربك به صعايب
وان بغـيـت تقابل المـيت محالي

الفراق يعـد من احدى المصـايـب
منه تاخذ لونها ســـود الليالي

كم عرفنا من صديق ومن قرايب
وكم ديار عقبهم صارت خـوالي

تالي الدنيا تعــود للـخـرايـب
وكـل مخلوق مـرده لـلـزوالي

مابهـا لذه ولا بالعـيش طـايب
ومابها حالي وتاليهـا ارتحالي

سعد منهو قبل موته كان تايب
مستعد وحـاضر عند السؤالي

ابراهيم بن سعود الخريف

الركام 2022-06-28 10:31 AM

ابيات اهداء الى ابو عبدالله
ابراهيم بن محمد الخريف

سـلامي عـدد ما سار هـذا الــزمـان ودار
وعـدد مامشى الرحال في وجهـة بلاده

على اللي بذكر الهضب لسمه يجي تذكار
خـبـيـر بـطـرقـــه بين مـحــدار وســنــاده

وش اخـبـار رجـلـك علـهـا تقـبل المـشــوار
ترا مـنـت طـايعـهـا ولا النـفــس معـتــاده

تحـب الـخـلا والـبـر ولك عـادة الـتسـفـار
عـلاجـك على مـاكــنــت لاتـتـرك الـعـاده

ولــو كـثـرت الارياء فــسافــر ولا تحتــار
ومن صد عن رغبة هوى النـفـس مافاده

مدام ان سفراتك بها البـحـث والتـفكـار
فـلا فـيـه غــير الــخـيـر تلـقـاه وزيــاده

علاج الـبشـر فيه اختلاف وفـيه اســرار
فبعض البشر يلـقاه في فراش ووسـاده

وعـلاجـك ترا مابين سـهـل وبين اوعــار
فـكـل على ماعـــود الــنـفــس تعــتـاده

مثـل طـير حر قـرنـسه للـهـدد صـقـــار
ومثل طير حر جنـب الـشــبك ماصاده

ترا هالحياة ازمان مخـتـلـفـة الاطــوار
ومـافـيه حـال يـدوم وكــل لـمـيـعـــاده

عساك السعادة والسـلامة من الاخطار
ولافـيه احــد مـحـصـــل كـــل مــــاراده

وعسى الله يجنب كـل مسلم عذاب الـنـار
وخـلود بجــنه سعد من طـاب مـقـعــاده

وصـلوا على المـخـتـار مانبتـت الازهار
وعـدد مايـبـس زرع يراقـبـه حـصـــاده

ابراهيم بن سعود الخريف

الركام 2022-06-28 10:33 AM

ودع الترحـال واقـعـد للـمـقــيـــل
صيـفنا اللاهـب بدا نجـمـه يبين

راح وقــت كـان ذعـذاعـه عـلــيـــل
وحـلـت رياح سـمــوم الـلـه يعين

النهـار يطــول ولا نلـقـى ظـلـيــل
والشــجـر متعـري وحـالـه يشين

لاحراوي غـيــم ولا وادي يسـيــل
والمـيـاه بنـقــص عـند الـزارعين

لا بحر مـوجـود ولا به نهر نـيـــل
يبست الاشــفــاه عـنـد الناظرين

كـل عـام نرقــب الجـو الجـمـيــــل
وكــل عــام تمـضـي ايامـه بحين

مـايدوم الحـال هـذا مسـتحـيــــل
وكــل وقـــت راح يـبـقـى لـه حنين

لا تامـل في الـحــيــاة الا قـلــيــل
ماحـد يبــقـى على مـر الـســنين

من تصاريف الزمن خذ لك دلــيـل
ان مـن فـــيهـــا تراهــــم راحــلـين

ولا تـقـول الوقــت هذا مـايمـيـــل
خـذ تجـاريـب الـزمـن مـن الاولين

كـل يوم يمر يدني من الرحـيــــل
راحــت الاعـمـــار وحـنـا غـافـلين

النـهــار اليا انتهى يعـقـبـه ليــل
والـزمــن دوار وافـــهــــم ياذهــين

عـشـقـنـا للـدار مـانرضى بـديــــل
لو قسى ذا الوقـت وعـيى مايلـين

يالـلـه انك تسقي الدار المـحـيـــل
وتـقلـب ايام العسـر دايــــم بلـين

ويالـلـه انك تفرج الهـم الثـقـيـــل
وترحـم اللي عايش فيهــا حـزين

ابراهيم بن سعود الخريف

الركام 2022-06-28 10:34 AM

عسى الـبـروق مـوثـقـــه
نخــاف تبـطي ماتعــــود

قـلــتـه وانا كـلي ثــقـــــه
بالـلـه خـلاق الـوجـــود

يرسـل سحــاب مـبرقــــه
يم الصحاري والنـفــــود

فيهـا سحـاب مـطـبـقــــه
مـتلـونـه حـمـر وســـــود

ويرسـل رياح تـسـبـقــــه
ومـعــه رياح لـه تـقـــــود

وعـقبـه تعـــود مورقـــــــه
والارض تـزهـر بالــــورود

الـبـرق كـم نـتــشــفـقـــــه
يابو محـمـد به شهــــــود

اعــــوام تاتي مـغـدقـــــــه
وسنين قحـط قـد تســـــود

سـبــحـــــان رب فــرقــــــــه
ناس بـنـقــــص وناس زود

في مـغـربـه او مــشرقــــــه
مافـــيــه حـال قـد يســـــود

الـلـه عــلـيــــم وخـالــقــــــه
وهو الحكــــيم بما يجــــود

ادعـوه في غـيـاب شـفـقــــه
وعند الشروق وفي السجود

ابراهيم بن سعود الخريف

الركام 2022-06-28 11:01 AM

لياحام فـكرك في السنين القديمه
واليا شـكى قلـبـك وبين حنيـنــه

وصارت حياتك دون طـعـم وقيمه
ومـلـيــت حاضــرك وتولاك شينه

وبـين عليـك الكـبر وقـل العزيـمـه
وقل النـظـر قـريـب وتـقـول وينــه

ورجلك بدت تقصر ولا هي سليمه
وشكيت سمعك كن في الاذن طينه

وبديت تشكي امراض جسم اليمه
تراك بـاد فـي سـنـيـن حـزيـــنــــه

عشها على ماجات لو هي ظليمه
ولو شفت فيها ميل ولوهي غبينه

الوقت لو يصفي يجي فـيه غيمه
والمـوت لو طـولـت ياتي بحـيـنــه

رجـواك في ماض تراهـا عـديمــه
وسـجات فـكرك ماترجع سنينـــه

مابـه حـياة دايـم مـسـتـقـيــمــــه
ومابه كـمال الا ونـقـصه قريـنـــه

شيمتك عن دنياك خصـله كريمـه
ودنياك سـخـرهـا للاخرى عـوينه

لا تنخدع غـرقـان وتـقـول ديمـه
هذي الحياة وسرعهــا عارفـينــه

وصلاة ربي عد ماقـفــت مقيـمـــه
واعداد مايقسى الزمن عقـب لينه

ابراهيم بن سعود الخريف

الركام 2022-06-28 11:03 AM

ليه بستان الشعر من دون ورده
كيف غاب اللي جماله من جماله

ياهـل البستان هو عـطــره ونده
لين غاب الورد ينقص من كماله

الزهـور تزيد في العــزم وتـشده
تلـهـم الشـعـار وتزيد الجـــزاله

مـانـبـي يزعــل ولا نبـغـى نرده
اتركــوه ومـابدالـه فـي مجــالـه

عـارف مابين هـزل وبيـن جـده
اتركـوه يقـول شي قـد طـرا لـه

دمعته من العـين تجرح رق خده
دمعته من العين مانقوى احتماله

ياهــل الـبستـان ردوا لـه مــوده
ياهـل البـستـان سوو بي جمـاله

من يسوي خير مـن هـو له يرده
ما احــد مـثلـه ولا نبـغـى بدالـه

قـبـل مـا كــل يـبـــيّح كــل سـده
وقبل ماتصـفق يمـينه في شماله

ابراهيم بن سعود الخريف

الركام 2022-06-28 11:06 AM

لا واعـذاب اللي شكى قلـت الـنـوم
راح الـبراد ولابقى الا المكـيّف


راحت حراوي شوفت البرق وغيوم
و لا بقى الا شوفـته للـمصيّف


وراح النسـيم وحـلت رياح وسمـوم
ولا احد سلم سمين والا نحيّف


طول علينا الوقت وزداد بهموم
نرقب طـلوع سهـيل لوهو يصيّف


واللي معه دنيا فلا هوب محروم
يسافر ولا يبقى سوى ذا الضعيّف


بعض العرب مهوب يقدر على السوم
حتى المكيف صار عنده كليّف


وان كان زاد الحـر و وافـق بعـد صـوم
فاصبر على حره بجسم رهيّف


والصـيف له حل و له وقـت معـلـوم
يزيد عـن اربع شـهـور ونـيّف


لا واهـني الـطــير ليمـن بغـى يحـوم
يقـوله اللي اخـر اسـمه خريّف


ابراهيم بن سعود الخريف

الركام 2022-06-28 11:18 AM

يالـيت المـدارس ماتعـطـل ولا سـاعة
غدا نومنا غـفـوات مـن كـثر هالصيحات

سهرهم على باطل ولاهوب في طاعة
وفي كل شارع صار تسمع لهم صرخات

واليامن غـفـينا قامـت الناس مرتاعة
على صوت صرخات الكفر مع حدى اللفات

وهـذا يفـحط باع نفـسـه كـما بضـاعة
ولا يردعـه شـوفه لمن قبله مـن الامـوات

ولاينـفع لهم نصح ولا هـم بمنـصاعة
على كيفهم يمـشون يقضـون هالحظات

نـهــاره رقــاد تـو مــازان مــرباعــه
ولا لـه صلاة مضيع كـل هالاوقــــات

شياطين انس ابليس صاروا من اتباعه
ترى الـزلـة الـشينة يجـي بـعـدهــا زلات

ترى سنـيـنـكم تبرق وهي زود خـداعة
وكفـر الـنعــم ايورد الـحـــزن والاهـــات

وياكـل من يشـكي وبه الـنفـس ملتاعة
عـليــكــم بدعــوة ربكـم بآخــر الـساعات

عسى الله يغير طبع من شانت اطباعة
وعسى الله يرحمنا مـن الهم والافـــات

وصلوا على من خـصه الله بشـفـاعة
رسـول الـهـدى انزل عليه الـولي آيات

ابراهيم بن سعود الخريف


الساعة الآن 08:36 AM

Powered by vBulletin .
جميع الحقوق محفوظة © لشبكة ومنتديات البراري 2010