|
يـا عـم سـحـاب الله يمسيك بالخـير نبي مـن المـاضي علوم وسواليف تشغلني عـن همي ولا افكر اكثير ولا أشغل النفس بغرام ومواليف |
اقتباس:
ياهلا ومرحبا بالغاليه رذاذ الله يحفظك من كل شر |
اقتباس:
جيتك يبو سيرين اسرع من الطير والحب خله وخلنا بالسواليف |
السلام عليكم ورحمه الله وبركاته هلا ومسهلا بالغالين عساكم ما تملون مني وتقولون شايب وعطيناه وجه ههههههههههههه هذي سالفه صايره ونا صغيييير ايام بيوت الطين فيه ناس جايينهم من الرياض اقربا لهم وكلهم حريم وبنات وبزور بس وكان راعي البيت رايح يم بعوله وشي البعول هي يالغالين يروح الرجال لاي منطقه في البر ويحرثها والبرمنول مهوب لحد المهم يحرثه ويبذر فيها عيش قمح يعني ويكون هذا الكلام على وقت دخول الوسم يعني وسم الامطار ولا جا المطر ينبت العيش ولا سنبل يحصدونه ويدوسونه ويذرونه ويطيبونه ويجرشونه وياكلونه هههههههههههه شوفو كم مرحله قبل الاكل المهم ها الناس ابوهم مهوب فيه والبنات والحريم ماخذين راحتهم وكانو فارشين فرش في الحوش حقهم وجالسين وتفقو يجيبون قدوره وصحون وتنك ويطقون سعه صدر بس كان في اخر الحوش بقرتين وش كبرهن المهم جابو ادوات السامري وبدو يطقون ويرقصون ولا يرقص فيهن الا ثلاث بس دوووووبيات مره مايصلحن للرقص ابد ويردحن ردح ما تحس الارض تحتك تهتز شي فوق الوصف لا وفيهن وحده تقول للثانيه تعرفين تجيبين ذا الحركه وهي تختبص برجليها من تحت بسرعه يعني هذي حركه ولا اكبر راقصه تجيبها الله يرحم الحال وبس لوتشوفون الي انا شايف حرمتو الرقص تحريم المهم وردح وطق بها التنك والقصيد بيت واحد من الشعر والشطر الثاني بعد غلط المهم مادرينا وذا الكلام في الليل في اول الليل يعني مادرينا الا الي جايه تمشي طبلونها وحده من البقر قطعت رباطها وجتنا تركض ويختبصون الحريم ويغمى على ثنتين منهم والبقره كل ما وصلتنا خافت ورجعت بسرع شي اكيد انها خافت من الرقاصات تصدقون ان الي ير قصن اكبر من البقره هههههههههههه المهم ويجي ابو الجيران ومهم يوم سمعو الصيحه وش فيكم وشفيكم يحسبون شاب فيهم ضو قالو البقره منطلقه وفيه ثنتين مغما عليهن وشوا ويجي ابو الجيران ويمسك البقره ويربطها ويصحن الي مغمى عليهن ويدلي ابو الجيران يهوش على الحريم يالي ما تستحن ياللي ماتخافن الله يوم غاب فلان عن بيته تسوون كذا يا ناقصات العقل والدين والله لوني ماتعوذت من ابليس اني اعطي كل وحده مسطه بها العصى الي في يدي يالله ادخلولياني هلحين افك رباط البقرتين الثنتين كلهن وخليهن يتهبدنكم اجل هذا ردح اوادم والكلام هذا طبعن للشايب اجل هذا ردح اوادم والله الذي لااله غيره ان الارض تهتز ون بيتي يهلهل علي تراب من ها الردحي ويتفشلن الحريم وخص الي كانن يردحن تبون اوصف لكم اجسام الحريم الثلاث الي يردحن تشوفون المصارعه اليابانيه تشوفون ذوليك الي يتصارعون ما عليهم الا صراويل وهم كبر الفيله ابد الخالق الناطق من الرقاصات الثلاث اجل وحده منهن تسوي حركات برجليها تعجز بالباقيات لوهم مار قالو نبي نسوي حلبه مصارعه وتصارعو كان اهون اما يرقصن مهوب يم سنع ابد ههههههههه |
ماشاء الله تبارك الله
العم سحاب لوجودك ولسواليفك رونق ومذاق خاص أسال الله أن يديمك ويحفظك كل التحايا |
هههههههه الله يوسع صدرك يا عم سحاب مثل ما وسعت صدورنا الا ما قلت لنا يا عم سحاب كم من عمرك قضيته في هالفترة أقصد قبل لا تتغير حياتكم لما هي عليه اليوم يحليلهم من أول البقر معهم في البيت هههههه تحيتي وتقدبري |
اقتباس:
جمل الله حالك ورفع قدرك يالغالي شرفتني شرف الله مقامك |
اقتباس:
ابو سيرين يالغالي كل بيت منول فيه بقره هي السوبر ماركت منها الحليب ومنها اللبن ومنها الزبادي او الروب ومنها الزبد وش تبي اكثر منذا يعني يبو سيرين تبي تقول ان ماعندكم بقره في بيتكم مستحيل الا كانكم ساكنين البر البدو ماعندهم بقر ماعندهم الا بعارين وغنم والبقر عند الحضر ابو سيرين منول يقولون بيت مافيه بقره مافيه ثمره |
اقتباس:
أها لكن أنا اللي أعرفه إن النياق إذا ما تسرّح حليبها مرض ... يعني غير صحي واعتقد البقر كذلك وما كنت متصور إن البقر يتم في البيوت منول !! كنت أعتقد عند ناس معينين يعتنون فيها ويشترون الناس منهم الحليب والجبن وغيره . |
كل الشكر لك متعك الله البعافيه
|
اقتباس:
البعارين او النياق والغنم هذولا طال عمرك لازم يطرقهن الهوا يعني يسرحن ويهضلن ولا تمرض اما البقره ابد مايحتاج لا تسرح ولا تمرح قبلها مربوطه ولا هيب تخالف ابد احلب وشرب ولا جايك الا العافيه وكلش مصخره الله سبحانه لعباده انت ماتسمع الا قالو شوط بقره هههههههههههه هذي طال عمرك تصير مربوطه طول السنه ولا فكت رباطها تنطلق بسرع شي وبعد ربع ساعه تاقف هههههههههه هذا شوط البقره ماتروح بعيد |
اقتباس:
ياهلا ومرحبا بالغالي عايد قل امين الله يسعد قلبك ويجعلك من اسعد خلقه ويحقق مناتك |
ههههههه معلومة جديدة علي شوط البقرة لكن هالحين كل هذا تركتوه ؟ أقصد الزراعة وتربية البقر والا محتفظين بها حياة جميلة مع البهائم الحقيقيين ليتها تنعاد وحنا في خير مثل هالحين تحيتي ونقديري :ordh: |
اخي سحاب استمر نحن مستمتعين بما تبوح به من ارشيف مكتبتكم العامره لاهنت
على فكرة يابو سيرين لن ترجع تلك الايام الخوالي لشىء وهو كانوا اصحاب المواشي والمزارع هم من يعملوا فيها بمساعدة الاهل والجيران واقصد الجماعة اهل قريتك اما الأن عماله تاخذ ثلاثة ارباع المحصول من المزارع وبعد زعلان نهبة يبغى يكوش على كل شىء زمان اول حلو بمعطياته في حينها اما الأن فمختلف تماماً ونسـأل الله العفو والعافية .. تحيتي |
اقتباس:
لا هلحين صرنا نواعم ام الشعر الناعم معاد اقوا هههههههههههه هلحين لو اعطس جاني ملع ههههههههههههه |
اقتباس:
شفتا ابو سيرين يحسبني الا هلحين ونا اربي البقر هههههههههههه ولا الزراعه معاد اقوا على شي ابد هلحين يالله السلامه ونا جالس يوجعني ظهري بس تصدق يالغالي صار وجع الظهر له فوائد كل ماشفت العجوز فيها حارش ولا مارش على طول ظهري يوجعني ويفكني من الشر معاد بي حيل ههههههههههههههههه |
أخي سمو المشاعر نعم لكن إذا علمنا اليوم أضرار الحياة التي نحن فيها فما المانع ما نرجع مثل أول نعمل بأنفسنا ونحقق الاكتفاء الذاتي حتى وإن كان لدينا المال . في الماضي كانت قريش يلزمون أنفسهم بإرسال أطفالهم وهم في المهد إلى البادية من أجل أن يتعلموا اللغة العربية وركوب الخيل والرعي لكي يصبحوا نافعين لعلمهم أن بقائهم في مكة قد يفسدهم . رغم أنهم ليسوا مجبرين إلا أنهم التزموا بذلك . واليوم نحن نعاني من خمول وكسل وفقدان مهن كثيرة كانت تقوم بها الأسرة دون الحاجة لمساعدة أحد فيجب أن يبادر الناس لتغيير واقعهم لما هو أفضل واستغلال ما نحن فيه من خير خصوصا وأن الأيام بدأت تتغير اليوم تدريجيا وأصبحنا نشعر بإحتمال تغير الأوضاع المعيشية . تحيتي وتقديري |
تسجيل دخول فقط من أجلك ياعم سحاب
أسعدتنا بهالقصص الجميله .. الله يسعد قلبك يارب ... ومشرفنا أبوسيرين أضحك الله سنّك يومك تقول : حياه جميله مع البهايم ( الحقيقيين ) هههههه الله يسعدك يارب |
اقتباس:
يعني قصدي عندكم مزرعة بشقرا وفيها من هالبقر والنخيل بالعكس أستغرب إذا كان ما عندكم لأنها من باب الورث وتركة الأجداد يحليلك يالبقره أجل مرخصتن حليبها .. من دون تمشيه ههههههههه كل البقر رخصوا حليبهم ما عدا بقرة المراعي وشوط البقرة ههههههه ذكرني بشوط الكوره ههههههه والله يا عم سحاب معلومات قيمة لكن أعتقد لازال لديك الكثير تحيتي وتقديري |
اقتباس:
لكن والله ترى كلامي واقعي مع اختلاف الخلقة طبعاً :038:ههههه |
اقتباس:
ياهلا ومرحبا بالغاليه رذاذ شرفتيني بحظورك ورفع الله قدرك وبوسيرين يحب العياره هههههههه والمزح جعل ربي يسعد قلبه |
اقتباس:
هلا ومرحبا يبو سيرين ههههههههههههه عندي مزرعتي القديمه بس مافيها بقر وش ارث الاجداد الله يرحم الحال بقر وبيوت طين مليانه جن وشذا الارث ههههههههههههه |
هههه والله ارث لايُعلى عليه
بس بزمانهم مهو بذا الزمن الله يرحم الأباء والاجداد |
اقتباس:
هلا ومرحبا بالغالي انت صادق ارث لا يعلى عليه بس راحو اهله |
السلام عليكم ورحمه الله وبركاته هلا بالغالين الي احبهم وربي يشهد تعالو اعلمكم بسالفه كان عندي في صطح بيتي دجاج وكان معهن ديك بس صدقوني ذاك الديك فيه بلا مهوب صاحي ابد وهو من الديكه البلديه ذوليك الي لهن عرف على راسه وش كبره وذيل فيه جميع الالوان تقول قوس قزح مهوب ديك المهم كل ما رقيت احط لهن عيش ولا مويه الاه يهد علي تقول مسعور وقمت وحطيت في الشبك حقهن فتحه علشان احط معها العيش والماء حرمني من دخله عندهن مغير الا دخلت عندهن يمط رقبته وينطلق وراي يبي ينقرني نقره البلاء وصير انا وياه طردي غبرتنا واصله السماء الين اطلع وصك الباب دونه قبله غارف عقلي حسبي الله عليه - المهم ويجي يوم من الايام واحد قريب لي عايش في امريكا له 12 سنه ما جا فيها ولا مره للسعوديه المهم وعزمه وعزم القرايب بمناسبه رجعته وكنا جالسين في وسط البيت يعني في الصاله ونسولف عن الديك الي عندي انه محسربي والرجال جالس معه غليونه ولا بس افرنجي يعنني قال لي بكل غطرسه وهو يمص غليونه ايش الديك هذا قلت رجل الدجاجه طال عمرك ممداك تنسا هههههه قال فينو يعني وينه فيه قلت في السطح ودك تشوفه قال مافيه مانع اشوفه قلت له اطلع للسطح وتلقا الشبك افتحه ودخل عليهن تفرج شوي ووسع صدرك - وطلع لحاله للسطح وغليونه في اثمه وشوي الا الي جاينا يمشي طبلونه مع الدرج ويصيح امسكوه امسكوه وهو علا سرعته ويطلع للحوش والديك وراه والله ياجماعه الخير انه منظر ولا في الاحلام يصير ويدلي يدور على الفله والدديك ماط رقبته وراه وكل ما وصل للباب حق المدخل يقول افتحولي ولا جا يدخل الا الديك واصله وينحاش ثانيه ويجي خمس لفات على الفله الين قدرنا ندخله ونصك الباب ونخلي الديك برا ههههههههههه وهو يجلس على الكنبه ويقول عطوني كاس مويه اخاف ادوخ قلت عرفته هلحين يبن اخي ولا ما عرفتا الديك قال هذا مهوب ديك هذا كلب بوليسي ههههههههه وراح ذاك اليوم كله ظحك عن السالفه انتهى |
وكنا جالسين في وسط البيت يعني في الصاله ونسولف عن الديك الي عندي انه محسربي والرجال جالس معه غليونه ولا بس افرنجي يعنني قال لي بكل غطرسه وهو يمص غليونه ايش الديك هذا قلت رجل الدجاجه طال عمرك ممداك تنسا هههههه
قال فينو يعني وينه فيه قلت في السطح ودك تشوفه قال مافيه مانع اشوفه قلت له اطلع للسطح وتلقا الشبك افتحه ودخل عليهن تفرج شوي ووسع صدرك - وطلع لحاله للسطح وغليونه في اثمه وشوي الا الي جاينا يمشي طبلونه مع الدرج ويصيح امسكوه امسكوه وهو علا سرعته ويطلع للحوش والديك وراه والله ياجماعه الخير انه منظر ولا في الاحلام يصير ويدلي يدور على الفله والدديك ماط رقبته وراه وكل ما وصل للباب حق المدخل يقول افتحولي ولا جا يدخل الا الديك واصله وينحاش ثانيه ويجي خمس لفات على الفله الين قدرنا ندخله ونصك الباب ونخلي الديك برا ههههههههههه وهو يجلس على الكنبه ويقول عطوني كاس مويه اخاف ادوخ قلت عرفته هلحين هههههههههههههههههه ههههههههه هذا الديك غيور بالحيل على حريماته خخخ اضحك الله سنك ضحكت كدت اموت من الضحك الله يسعد قلبك اخي سحاب تحيتي |
ههههههه فينو هذي مخاطر الابتعاث يردون لنا أشخاص منسلخين عن ديننا وثقافتنا ... وش يرتجون منهم !! فما بالك إذا كانت فتاة ... للأسف المال على بعض الناس نقمة وليس بنعمة ... انه الخزي والعار الابـتـعـــاث يـفـســد الخـلـق والدين // يرجـع لنا غـريب وسـنين ضايع يـدرســـونـه كـل خـبـث الـمــلاعين // واصحابه الكفار مومس وصايع وامـا لباسـه لبـسـهم حتى لـو شين // تـشـوفـهـم بـلا رجــولـه ومـايع ما هم باهل علم ن ولا هم شريفين // تجــردوا مـــن طــيـبـات الطبايع ذكرتني بابن خالتي ما رجع من 35 سنة في أمريكا كان في البداية كل فترة يطلبهم دراهم ويوم مرت 15 سنة ما رجع ما عاد أرسلوا له ولا ندري وين هو فيه . جزيت خيراً يا عم سحاب على هالسالفه ولو انها قلبت الذكريات لكن فيها فايدة تحيتي وتقديري |
السلام عليكم ورحمة الله وبركاته
حي الله راعي شقراء و اسعد الله اوقاتك بكل خير عندي لك من سوالف الاولين اللي يشيب لها الراس و هي سوالف حقيقية و قصص لا تصدق بس متى الوقت اللي يسمح لي اجلس هنا معك و اسردها لك اخوك يحب المطر وفيه حالة قادمة بعد كم يوم و بالي مشغول معها ولكن كل مافضيت و حصل فرصة بجيك هنا و اقص لك منها او راسلني على الخاص و ابشر بسعدك و مسموح لك تنقل ما يجوز لك منها هنا بحكم انت راعي المحل و حنا ضيوفك طال عمرك:w12::w12: |
نارك اليوم طافية يا راعي شقراء
سلامات |
اقتباس:
هههههههههههههههه خله اجل يقول وشو الديك شرفتني يالغالي شرف الله مقامك [/align] |
اقتباس:
ياهلا والله ومرحبا انت والله صادق يامصلهم بعض الي يسافرون يجي فيهم موقه وتعالي ولا عاد تجوز لهم عيشتنا فيه قريب لي سافر للدراسه ولا عاد رجع له هلحين 40 سنه او اكثر وشفته من 7 سنوات كان جاي علشان عمه متوفي ويوم شفته في العزا قال انا مدري وشلون تعرفون تسوقون السيارات في شوارعكم قلت له ابد نركب عند الدركسون ونشغل السياره ونمشي تصدق جلس 3 ايام وسافر لامريكا وتصدق بعد ان امه عجوز وبوه شايب وكلهم حيين ويطلبونه يجلس عندهم وعيا وهذي الجيه الثانيه له بس من اربعين سنه الله لا يفتنا الا بطاعته وسمعت ان عنده صديقه وعايش هو وياها في مزرعه في امريكا كفوه يبن حلال تروح حياته وعمره هبائن منثورا لا ومن شين الطبع يقولي وراك ماتزورني في امريكا ودي بك تجي عندي قلت له ولا رغبت مثلك وش يبي يرجعني ههههههههههههه |
اقتباس:
ياهلا ويامرحبا بالغالي المحل محلك وعين فراش وعين لحاف وهذي الساعه المباركه سولف علينا جعل الي خلفك للفردوس |
اقتباس:
من صليت العشاء ونا على ضوي الا هلحين هههههههههه انا عارف قصدك بس امزح معك ونا ذا اليومين من دخول المربعانيه ونا منيب طيب بس كني احسن ياربي لك الحمد والشكر |
اقتباس:
والله يا عم سحاب ليتك ذكرته بالله سبحانه وتعالى وبعذابه في الآخرة لأن مثل هؤلاء قلوبهم ميتة ويمكن إذا أنذرته من عذاب الله يصحوا قلبه لا تستحي منه حتى لو كان لابس بدله وفيه على قولتك موقه وتعالي الرسول صلى الله عليه وسلم عندما بعث أول ما بدأ بإنذار عشيرته بالوعيد الشديد وتذكيرهم بعذاب الله لأن القلوب إذا كانت ميتة تحتاج إلى قوة .... وقع الكلام الشديد فيه قوة وقد تصحوا القلوب الميتة بسببه . مثل ما قال الشاعر : والله إن الشر للشر أحيانا علاج والبشر وانا اخوك أنفسهم تختلف ... قد لا يتحمل عندما يرى الحياة الغربية فيغتر بها ويضعف قلبه لرؤيتها وهذا النوع من البشر ضعيف جداً ولا يلتزم بمبادئه وقناعاته مثل ما يقولون امعه :ordh: |
لمشكلة يا سحاب شقراء الدي اس ال عندي خايب و سوالفي طويلة و اخشى يقطع الاتصال ولا اقدر اكملها
لكن ابشر بحاول اوصلها لك غالي و الطلب رخيص[/size] |
هذي طال عمرك سالفة للوالد الله يطول بعمره و عمرك يقول جاي من الخرج للرياض يدور شغل تخبر الاشغال منول في الرياض و الدمام و جدة و اليومية بريال يقول يوم وصلنا الحاير يوم خبط الكنور جايين من الخرج يقول يوم تعطل واصلنا انا و خويي رجليه مشي الى وصلنا نخيل الجفال في الرياض على طريق الملك فهد شمال سوق عتيقة للخضار يقول نصينا بيت رجال مافيه الا حصير غيره مافيه شي يعني مجاعة بمعنى الكلمة يقول رفيقي ما يشوف زين
قال تكفى يبو محمد بموت من الجوع. صار لهم يومين ما ذاقوا عيشة يقول الوقت قبل المغرب يعني بتغيب الشمس و يطلع الوالد عند الباب اليه يسمع اصوات ناس تنادي يقول و ابرز شوي اليهم ناس يشتغلون في محل ماهو بعيد يقول و اروح لهم يتبع |
[/size]
صاروا ناس متجمعين عند طباخ شاب قدوره لزواج للملك سعود و عازم امير البحرين الشيخ عيسى يقول العالم متجمعين على الطباخ مثل النمل و لازم فكرة عشان يقدر يفرض نفسه عليهم يقول و امسك هاك الجريدة (عسيب نخلة) و يضرب الارض عند رجول المتجمعين وهو يردد ارجعوا وراكم خلونا نعرف نشتغل .الجميع صدق انه من اهل العرس او ولد وزير الملك او شي حتى الطباخ صدق مثلهم يقول شوي يوم قالوا قلطوا العشاء و يقوم الطباخ و يجفى من الرز و غيره يحط المفاطيح و يقلطون على السماط عند الملك و الشيخ عيسى يقول يوم قلطوا الناس يوم مالقيت لي مكان اجلس معهم و اجيك راجع بعصاي للطباخ يقول ما همني الا رفيقي الجايع ادور له اما كرشة او تسبدة ناسينها يقول و افتش في القدور الى هاك المفطح في ذاك القدر اطيب مفطح جاء وقت الفراسة عشان يلخم الطباخ قال له انا اسمع من اول انك تسرق ولا صدقت لكن الحين صدقوا اللي قالوا لي يوم طاح الطباخ على ركبه من الخوف وهو يحلف في بزرانه انه رافعه للملك و ضيفة بس مع الزحمة و العجلة نساه يقول ويحطه لي في كيس اسمنت و انسفه على كتفي و اجيك مروح لرفيقي يقول يوم دخلت عليه و تلمسه ما صدق انه مفطح ذبيحه يحسبه اما ضبعه او تكرم حمار يوم علمه بالسالفه كنه اقتنع و صدقه.لأن مو معقولة ذبيحة الملك تروح لافقر اثنين هاك اليوم يقول دقينا في المفطح و الباقي رقيت للنخلة و ربطته في قلبها و خليته ما ياصله لا قطو ولا شي و بنفس الوقت تبريد عشان ما يخرب و من بكرة ينزلة و يلقط شوي خضرة باذنجان و قرع و طماط و بصل و يكلون عيشتهم |
ماش ما حولي احد
اسولف لحالي نكمل بعدين |
كثرة فصل النت ما عرفت اكمل السالفة
مبتورة بس اعذرني بعضها مكرر |
مهيب هي يا راعي شقراء تروح ولا تعلمني
|
| الساعة الآن 02:06 PM |
Powered by vBulletin .
جميع الحقوق محفوظة © لشبكة ومنتديات البراري 2010