نور جدة
انا قلت كذا لان فرصتها ضعيفه المواقع حاطه كذا
لاكن فوريكا يتوقع رشوش خفيفه على جدة
كيف الوضع عندكم الحين

حيالله اهلنا بجده ام الرخا والشده ابشرك امطار غزيره الان على كافة منطقة حايل وعقبال لكم يالغالين نبشروننا بالامطار عليكم

عشقٍ جمع ما بين قاعٍ وغيمة
سيّل على صدر الثرى دمع الأمزان

الله الله يابدر عبدالمحسن

و الله أخوي الوضع عندنا حلو مرة مافي حر و الغيوم موجودة بس متفرقة و الرياح تقريبا شمالية شرقية
ارجوا انك ما تفهمني غلط و تاخذ كلامي بحساسية بس النقاش موجود دائما
اختك نور جدة

قصيدة الشاعر رشيد بن مساعد القباني السهلي
وهي قصيده استغاثه بعد توقف سقوط الأمطار لفترة طويله عن البلاد



عسى الله يبدل ساعة العسر باليسر === وعسى ترجع الديرة لنا عقب الأمحالي
منّك نرتجي الأفراج ياوالي الأمر === أنت اللي تزيل الهم والكرب ياوالي
ياموحي دبيب النمل مع صخرة الحج === يامحيي هميدٍ خامدٍ ناشفٍ بالي
ويامنزلٍ الروح في ليلة القدر === يارب الملا يامبدل الحال باحوالي
ياوالي القدر ياجابر العظم لأنكسر === يامحصي خشاش الارض من دقّ وجلالي
خلقت آدم من طين ومكونه بشر === وذريته من نطفتاً عاشوا أجيالي
أنت اللي منحت اعبادك السمع والبصر === وأنت اللي تمد العبد باعيال واموالي
أنت الأكرم اللي مدّتك تفلج الصدر === عطاياك ياإلاهي كثيرات وجزالي
يارب الفلق يا مسيّر الشمس والقمر === عبدك يرتجيك ولا تخيب له آمالي
إنا في رجا رحمتك ياكاشف الضرر === أنت اللي تروف بنا بلاشك وجدالي
أنا طالبك نوّ من القبلة يحدر === سحابة عروض وبارقه يشعل اشعالي
تقصّف مقاديمه تقل جملٍ يهدر === يعزّل ربابه والطّفَل فيه يجتالي
والاجاء علىالعارض نثر صادق المطر === إسبوع نهار وليل والوبل همّالي
تعوم البطاحي مثل موجٍ من البحر === وهو قد ملا في نجد وديان وهجالي
حقوقٍ يكض الأوديه وإن دمر عَمر === من الشام الى نجران يضرب به أمثالي
هنّيٍ مريّ ينفع البدو والحضر === تردّ المياه ويكثر الخير من تالي
يصيرالسهل والضلع عقب المحل خضر === ثلاثين يوم العشب لإفنوده إقذالي
تتالا الجفاف وذنبنا وقفّ القطر === وفي مجتمعنا ماكل إرباء ومحتالي
وظاهرةً خبيثة شرّها بان وأنتشر === يبيع الفتى دينه بسحتٍ من المالي
ومنع الزكاة أشد وأدهى بلا وامرّ === ثالث ركن في الأسلام وشلون يغتالي
الأرضة بنت في الأرض واستاجع الشجر === وفروع النخل لا شفتها ينعمس بالي
عساني من اللي لا بلي بالقِدر صبر === وعسانا لنا في الآخرة حسن الأعمالي
عسانا لنا حضٍ يجنّب بنا صقر === يجنّب بنا نارٍ تلظّى لها صالي
حطبها الحجر والناس وبعيدة القعر === ولاهوب فال اللي وردها لنا فالي
ترمّي شرارٍ كنّه إجمالة صِفر === ويخلد بها من كانت إذنوبه إثقالي
أنا اعوذبك يارب من كربة القبر === ثبتني على دينك لامن قمتنا سالي
ياعالم سرايرنا لك الحمد والشكر === عسانا من اللي يتبع القول بافعالي
وصلاة وسلامٍ عدّ من حج واعتمر === وتوجّه لمكه داخلٍ ذيك الأميالي
علىالمصطفى المبعـوث في ساعة الحشر = == ويشفيع أمته في موقفٍ فيه الأهوالي


اتمنى من احد الأخوان تنسيق القصيدة

اهل حايل والقصيم والشرقيه والرياض وين الصور بشرونا شكلكم مفهيين في الامطار وناسيين التصوير الله يرزقكم يارب السيل الي يكحل عيونكم يارب

ونبي نشووف تقارير دسمه الليله

اللهم اجعلها امطار خير و رحمة بدون هدم ولا غرق