بوادر ظهور الفقع بمحافظة الدوادمي تبشر بالخير لهذا اليوم 16-12-1429 من اخوكم مطارد البروق

[مطارد البروق]

السلام عليكم ورحمة الله وبركاتة
مساكم الله بالخير جميع ياخواني الاعضاء والضيوف وبارك الله فيكم اينما كنتم جميعا ,,
اليوم قمت برحلة استكشافية لمنابت الفقع القريبة جدا من محافظة الدوادمي وماء شاء الله الربيع يسر العين ويبهج الخاطر مع العلم ان الباذر الى الان وهو يخرج من الارض سبحان الله والارض الى الان والثرى قريب جدا جد تقريبا 5 سم تحت الارض ,, والرقروق منتشر جدا في اماكن منابت الفقع والعرجون بكثرة جداجدا والله لو تبي تملا صندوق صابون في اقل من ساعة لان العرجون عندنا بالدودامي ماعلية اقبال والعرض اكثر من الطلب ,, بس ارض الدوادمي يبيلها وقت علشان تشوف الربيع على اصولة المهم خرجت بعد العصر تقريبا الساعة الرابعة وخرجت لكم باهذة الفقعتين وهي كبر ابو ليمون ابو ازهيرة او اصغر بقليل بس يبيلة تقريبا اسبوعين وتلقونة كبر اليوسف فندي بس لاتستعجلون علية ياهل الدوادمي انا والله مالقط اكثر من هالثنتين ولو بغيت كان جبت لكم كيلو فقع في ظرف ساعة ونصف بس اصبروا علية اسبوعين وبتشوفون اللي يسركم لاتستعجلون علية انا حبيت ابشركم ياهل الدوادمي ببوادر الفقع في محافظة الدوادمي واماكنة كثير جدا وقريبة بعد ,,, وسلامتكم اليكم ثلاث صور لفقع هذا اليوم السبت الموافق 16-12- 1429 واعذرونة على التصوير لانة من جوال ,,
الصورة الاولى

الصورة الثانية

الصورة الاخيرة
الفقع مع ابنيتي الله يحرصها وان شاء الله تتطلع اخير من ابوها في مطاردة البروق مولع جدا في المطر والبر والربيع الله يصلحها


وتقبلوا مني اجمل وافضل تحية وتقدير من اخوكم ومحبكم دائما ابونواف