♡♢ هواجيس ~~ شطر ♢♡

[شطر]

طريق الردى لو طآل ممشآه مسدود
ورآعيه غآدي موسمآة(ن) خدوده
ركب رآسه الشيطآن ماجاب له فود
يدندن عليه ونقزه عن حدوده

[شطر]

نصوغ البيوت وكنهآ ملح بآرود
سريع اشتعآله يوم تضرب زنوده
لهآ قوة تطلق على الصيد عبرود
يفج النحر والكآيده مآتكوده

[شطر]

ياليل ياليل ياليل الهجوس الطويل
فيك المشاعر غريبه صعب تحليلها
من دون قمراك ونجومك ترى مستحيل
الناس في ليلتك تلقى تعاليلها

[شطر]

الا ياصباح (ن) بان نوره ويا محلاه
عقب مانفض ليل المعاناه واخفاها
عسى شمسك اللي وايقت من جهة ملفاه
تدفي ضلوع (ن) أبيض الثلج يكساها

[بقآيآ .. حرف]

السلام عليكم ورحمة الله وبركاته
أهنيك مشرفنا شطر على رقة الشعر وعذوبته وجزالته
دمت دائماً مبدع
تستاهل التميز وقليلة في حقك
كل التحايا

[شطر]

وعليكم السلام ورحمة الله وبركاته
ياهلا ومرحبا ولاعليك زود يالنشمي
شرفني مرورك لاخلا ولاعدم

[شطر]

يسعد صباحك صباح الخير
إيه أنت ياعاطر السيره
بيني وبينك مسافه مير
مع حبنا تقرب الديره

[شطر]

الارض خضراء واكتست زين الالبآس
والجيب جاهز للسفر والعسآسه
نبا نسج بخآيع(ن) يقعد الرآس
مع خوة(ن) تضفي علينآ الونآسه

[شطر]

يهل القلم حبره على خالي الأوراق
ويطوي ديار(ن) ممحله راكز(ن) ساقه
حسب مايناسب كل ذوق من الاذواق
يسوقه وليه في ذرى القاف واشنآقه

[شطر]

سلم الفتى يرفاه عن كل منقود
لاصار يمشي مامشت به جدوده
والتايه اللي خوته مابها فود
يلقى من اشباهه مقرد تقوده