سحاب شقراء -سواليف الاولين ايام بيوت الطين والحياه الطيبه

[أبو سيرين]

يا هلا يا عم سحاب

والله الجن على كثر ما أسمع عنهم إلا إني والحمد لله ما قد شفتهم ولا حسيت فيهم ما أدري يمكن يخافون مني هههههههه

وترى شقرا وما حولها أنسب مكان للجن لأنها في وسط الصحراء وهم يسكنون الصحاري والقفار .

ومن بعد المدن والكهرباء والانارات بعدوا عن الناس وأصبحوا في المناطق البعيدة جداً

في الطايف منطقة يقال لها ( حضن ) وفيها جبل يقال له ( عِنّ ) بكسر العين وتشديد النون ... وهو معروف بتواجد شعب كامل من الجن أو مثل ما يسمونها مملكة للجن وصاحب اخوي كان عنده دورة في تلك المنطقة فسكن بالقرب من جبل عن وكان يحب الرقص وفي ليلة من الليالي سمع صوت طق طبول وطيران وفرح فرحاً شديداً يحسب أن هناك من يرقص ويغني ... فألقى نظرة وإذا هم على سفح الجبل .. فقرر أنه يطلع لهم ويرقص معهم المهم يوم طلع الجبل ووجدهم قام بالرقص معهم وكان فرح جداً ولم ينغص عليه إلا شخص بجواره يدفه بذراعه ... زي اللي يقوله روح لا ترقص معنا ... المهم تضايق منه والتفت له وقاله ( وش فيك بسم الله ) يوم قال الكلام هذا الا كل الموجود أمامه من نار وأشخاص يرقصون اختفوا تماماً !!!!!

بعد تلك الليله تدريجياً جن جنونه ونقل إلى مستشفى شهار

والله يكفينا شرهم ويعطينا خيرهم .


تحيتي وتقديري

[سحاب شقراء]

ياهلا ومرحبا يبو سيرين
انت صادق يالغالي وسالفه الرجال الي تقول قد صارت لناس واجد منهم الي يستخف ومنهم الي ياقاه ربه
ونا في نخلي اذكرفيه حياله يعني مزرعه قديمه الا جا مسيان يعني عقب العصر او توه مذن المغرب الا جيت ادخل للبلاد يعني للديره بس منول نسميها البلاد الا جيت ادخل ونا على رجلي مامعي سياره ذاك الحد او ذاك الوقت اشوف فيه اثنين متسدحين على الرمل على جال الحياله وهم مهمب بعيد اشوفهم واظحين المهم قلت ذاك اليوم ابا اروح اشوف وشم هذولا وباقي في الدنيا شوي سفر مهوب ظلما المهم وروح يمهم ويوم وصلتهم مالقيت احد وناضر الرمل ابا اشوف جره ومقعادهم ولا شفت شي الرمل متواسي ولا كن فيه احد جايه قلت بصوت مرتفع شوي الله يقاصرنا ويقاصركم بالحسان وسميت بالله وتكلت عليه ورحت امشي ونا كل شوي التفت لياه جايني احد يمشي وراي والحمد لله ماشفت من ربي شر سبحانه عدد خلقه وزنه عرشه ومن اتكل على الله كفاه لااله الا هو ونا بعض المرات الا صار جاينا مطر ولا شفت السحاب على روس الشعبان اقعد في نخلي اتحرا للشعيب يجي ويدخل في النخل ونتم خابرين مهنا كهرب يصير معي سراج وحاط على راسي خيشه ياحقه الرز ولا السكر ادخل زاويه في زاويه وتصير مثل القحفيه ولا مثل ثياب المغاربه ويد فيها السراج ويد فيها المسحات كني عاد ابا ارد السيل بمسحاتي
وذكر كم مره اشوف في الحياله او المزرعه الي اقولكم عليها اشوف فيه واحد معه كشاف او بجلي كلهن واحد
وشوفه يكشف او يولع بالكشاف ويطفيه يولع ويطفيه وكان معي ذاك اليوم واحد من ربعي قال ابااروح اشوف وشو ذالي يكشف علينا وراح يمه على رجليه ويدور ويدور اثر مالقا شي وجايمي وهويقول هذولي عيال الجن يتميلحون علينا ويقول مالقيت حتا اثر جره الله يقاصرنا ويقاصرهم بالاحسان ومنول نقول للي جنبنا قصرانا مانقول جيرانا نستخدم كلمه قصارنا اكثر من كلمه جيرانا منول

[عايد]

اخي سحاب كل ماتقدمه فيه نصيحه جعل ماتقدمه في ميزان حسناتك
(وبالوالادين أحسانا)
تقبل استاذي مروري مع احترامي لشخصك الكريم

[سحاب شقراء]

المشاركة الأصلية كتبت بواسطة عايد

اخي سحاب كل ماتقدمه فيه نصيحه جعل ماتقدمه في ميزان حسناتك
(وبالوالادين أحسانا)
تقبل استاذي مروري مع احترامي لشخصك الكريم

ياهلا وغلا ومرحبا ياعايد
شرفتني بحظورك جعل ربي يشرف مقامك دنيا ودين

[الركام]

الله يا أيام مضت لو تعودين

نفسي تبيها والليال تعصاها

قارنتها باالوقت الأول وذالحين

وحنت لها روحٍ تزايد عناها

رسمتها من عام خمس وثمانين

راحت سنين وخاطري ماسلاها

الله على بيتٍ لنا خابرة طين

في حارةٍ مادنس الغدر ماها

الله على ذيك الغرف واللياوين

محلا برودتها ومحلا دفاها

ياجا المطر نرقى على السطح عجلين

نفتح مرازيم الغرف ونتباها

شعر فرحان العنزي


https://m.youtube.com/watch?v=iMAsFaXcc3U

[سحاب شقراء]

الله الله يالركام الغالي هوصادق تولم جاك الرد الي على قد الحال هههههههههه


قالو تحب الدار الي من الطين

قلت ايه ماتدرون وشو غلاها

هذي ترا تسوا بعيني الملايين

مضا العمربي عايشن في ذراها

وليمن ذكرت الي مضالي من سنين

كني غريرن حارمينه حلاها

الله وكبر كيف صارت ميادين

مثل السحاب الي شمالن محاها

الله وكبر يوم شقراء بساتين

كان المطرماينفقد في سماها

واليوم صارالبوم ينعق بصوتين

مهوب واحد لا رحم الله نماها

سحاب شقراء

[سحاب شقراء]

السلام عليكم ورحمه الله وبركاته

يالله تحييهم وليا حيا كثروليا كثر تنثر وليا تنثر تزبر بعد وش اسوي بكم بعد


منول يقولن العجيزات يسقم العيد بلاحنا
وهذا مثل يقولنه منول ويسقم يعني شي مهوب لازم

ومثل ذا الوقت يصيرن العجيزات مولمات شرط العيدمن القريض وحلاو البرميت وحلاو العسل وحلاو الساعات وحلاو مدري وش اسمه يخلطونه مع القريض وبسكوت ابو ميزان وعلك الطابع ذاك الي يجي فيه ورقه عليها رسمه ونلحسها ثمن نطبعها على يدينا وتطلع صوره على اليد
وزق العطار ههههههههههه يقصدون به السبال يسمونه منول زق العطار ولا نعرفه الا بهذا الاسم وسئلو العجيزات والعويد عنه ويبي يعرفونه بسم زق العطار

خل اعلمكم بعد ترانا منول نسمي الحبحر البارد نسميه الخكري علشانه بارد
ونقول لراعي الخظره كم ذا الخكري عليه ويعلمنا بسعره ويقول صندوق الخكري الكبير بكذا وصندوق الخكري الصغير بكذا شي عادي اسمه عندنا

ومنول اغلب البيوت عندهم شرط العيد يفرحون البزور ويحببونهم في شهر رمضان ويصيرون يحترونه كل سنه متا يجي بس
والي مازالو متمسكين بهذي العاده الطيبه هم اهل القراين في الوقف وغسله جعل ربي يسعدهم ويمتعهم متاع الصالحين
تشوف شوارعهم تمتلي بالبزور وكلن معه كيسه مليانه بالحلاو وهم مبسوطين وفرحانين
وصار لهل القراين شهره كبيره بسبب تمسكهم بذا العاده الطيبه
وفي شقراء بعد بعض الاحياء يصير عندهم تشرط او عيديه الله يجزاهم بالخير ويسعد قلوبهم بس ايام بيوت الطين كانو في شقراء اكثر من هلحين

ولاجا يوم التشرط منول في شقراءايام بيوت الطين تشوف البزارين مجموعات من عيال وبنات يمشون في السكيك ويتشرطون ويطقون البيبان ويقولون عطونا عيديتنا عطونا عيديتنا جعل ربي يعيده عليكم ومبسوطين
ثمن يطلع عليهم جذاعين كل واحد منهم كنه حصان بليس
ثمن الا شافو البزور ومعهم الكيس مليانات حلاو قالو قمرق قمرق ويلحقون البزارين وياخذون الي معهم ويدحوسونهم في التراب وتعال شف ذا الصغيرين كلن يصيح طول بطنه يعني بقوا صوت الله لا يلومهم وذا الي جايهم شوي يكفي روعتهم
جعله فيذا الجذاعين شهب العصاقيل ليت والله من يمسكهم ويمصع اذانهم
تراهم هلحين ابوان يعني صارو شياب بس مايذكرون سواياهم الشنيعه منول

اعرف منهم ناس واجد الي يقمرقون منول بس منيب معلم عليهم ونا الحمد لله ماعمري سويت قمرق ولا لحقت البزارين ولا اخذت منهم شي ابد ابد

الا مره اذكرها وصارت حاسمه الشر معاد سويتها الاوله والاخيره
اذكر قالي واحد منذا الشياطين وش رايك ياسحاب نقمرق البزارين الي يتشرطون وقلت وشو يعني نقمرق قالي الا شفناهم ومعهم كيس مليانات حلاونقول قمرق ثمن نلحقهم وناخذها منهم ويبدا ابليس يوسوس لي قل طيب قل طيب ثمن قلت بصرك ورحنا نمشي منعند مسجد شيحان ونحن متجهين غرب وبعد المسجد بيت ثمن تجي سكه على اليمين الي تروح يم المجباب ولفينا مع السكه ونشوف ذوليك البزارين ومعهم بنتين جذيعات ومعهم كيس مليانات حلاو ثمن قلنا بصوت مرتفع قمرق قمرق ونلحقهم وينحاشون والي يصيح والي يطيح ونحاسو ضعيفين ونا لحقت البنت الكبيره هي الي معها حلاو وااااجد وكيس مليانات وهي الي تنحاش ياسبقها ذيك البنت ونا اركض معها على عماها مابين عيوني الا الحلاو ابا اخذه
وتدخل في بيتهم كان الباب خشب ومفتوح ودخل معها على سرعتي ومادريت الا يوم طمرت ذيك الحرمه وهي الي تصك الباب وتاقف عنده وقالت للباقيات امسكوه وهن ماصدقن على الله يصير فيه مطارد ويقومن ثنتين يلحقني بين السواري وفيه وحد منهن دوووبيه وجالسه ماتقوا تقوم ويوم مريت من عندها وهي الي تمسكني مع عصقولي وتحطني تحت رجلها وتقعد تقبص فيني وتلشط مقعدتي وتقبص وتلشط وقبصتها مثل الزراديه توجع ونا افرفش تحت رجلها وش اسوي مقوا اتحرك
وتحصل الكارثه ونا في امس الحاجه لهذي الكارثه ومادريت الا بنتهم الي انا لاحقها تجي وتسحبني منهم وهي تشاهق وتصيح تقول خلوه خلوه لا تطقونه وتمسكني مع يدي
وقوم مع بنتهم وتروحبي للحوش حقهم وتعطيني حلاو ونا اكل وشاهق وتعطيني زود وحط في مخباتي ونا اشاهق بعد ثمن جابت مصاقيل وقعدنا نلعب الصقله انا وبنتهم وصرت كل يوم ونا في حوشهم نلعب الين كبرت بنتهم وصارو يعيونا نلعب مع بعض وقالو لها خلاص صرتي كبيره وقولي له الا شفتيه لاعاد يجي يسحب رجليه عند بابنا ولا طلع عليه ابوك وسطره بكف وبس بعد هذا التهديد حصلت مواقف بس منيب معلمكم لو تطيرون وزرره وزرره تبخق عين العدو اعلمكم وش الي صار علشان تقعدون تضحكون علي منيب معلمكم ابد ابد

وكملت ودملت وركبت حميرها وشنقلت

الله يوسع صدورنا ويشتت همومنا ويختم لنا بالجنه ووالدينا وذرياتنا وجميع حبايبنا
وترا الدنيا خيبه للي هيله هذا كلام العويد والعجيزات منول ونا اقوله هلحين بعد خيبه للي هيله
وكان ودكم تدعون لي تراي تعيبان
وسبحان الله والحمد لله ولااله الا الله والله اكبر
عدد خلقه وزنه عرشه ورضا نفسه ومداد كلماته

[سحاب شقراء]

عيدكم مبارك جعل ربي يعيده اعوامن عديده بصحه ورغد واامن ومان
وكل عام ووطننا وقادتنا وشعبنا المظياف وأمننا بخير وعز وتمكين بحول الله وقوته
وقول لهل الشروالحقد والتفجيرات


مسكين يالي تبـتغي الشرفينا
ابشرك زدنا المحبه ميه عام

حنا جسدوالروح راعي السنينا
ابو فهدبالحزم والعزم ضرغام

حكامنا روح وجسد ماحيينا
ياكود تطلع شمسنا غرب قدام

ولاقامت الساعه رضاالله علينا
ونتم على درب الشياطين خدام

سحاب شقراء

[بقآيآ .. حرف]

كل عام والجميع بصحة وسلامة
تقبل الله منا ومنكم صالح الأعمال
اللهم أدم علينا نعمة الآمن والأيمان وأحفظ بلادنا وبلاد المسلمين من كل مكروه
صح لسانك شاعرنا الغالي
كل التحايا

[سحاب شقراء]

المشاركة الأصلية كتبت بواسطة بقآيآ .. حرف

كل عام والجميع بصحة وسلامة
تقبل الله منا ومنكم صالح الأعمال
اللهم أدم علينا نعمة الآمن والأيمان وأحفظ بلادنا وبلاد المسلمين من كل مكروه
صح لسانك شاعرنا الغالي
كل التحايا

امين الله يديم علينا الامن والامان والصحه في الابدان يالله ادمهن ولا تحرمنا منهن

مايعرفهن الا الي فاقدهن

شرفتني يالغالي شرف الله قدرك ومقدارك