خويي بالبر عالة لايجمع حصى ولا يحذف حصى

[ابو البر]

وش السوات اذا صار خويك بالبر
او اخوياك ما يشاركون في نجاح طلعت بر
من ناحية المشاركه في امور الطلعه .

سؤال يا جماعه وترا وسعة الصدر على خوي ما يشارك ممكن تكون مره او مرتين او ثلاث
ولاكن انك تطلع انت وياه وكنك طالع توسع صدره وتطبخ له وهو جالس كنه حصاه .

شي مستحيل
وبعدين لايمكن انك تفقد صداقة صاحبك بسبب مثل هاذا السبب .

لاتقولون الآجابه سهله .

ابدا ماهي سهله .

عطونا راي.

[ام الدانه]

التعاون بالبر والرحلات شيء جميل ويصفي النفوس

[ابو البر]

المشاركة الأصلية كتبت بواسطة ام الدانه

التعاون بالبر والرحلات شيء جميل ويصفي النفوس

شكرا لمشاركتك يا أم الدانه
بس انا كتبت الموضوع لآن فيه ناس يا بنت الحلال اخر شي يعرفهبالبر هوالآنصاف .

رغم ان علاقتي به طول الآيام والسنين اشوفها كويسه وعاديه
بس بالبر ينقلب جحلطي هههههه ما أدري ليه .

اكرر شكري .

[ابو ديمة]

أصلا حلاة الرحلة بالتعاون بكل شي
انت حاول إنك تشركة بالعمل مثل انك تطلب منه أنه يقطع البصل إلين تخلص من تقطيع اللحم أو إنه يصلح القهوة إلين تذبح الذيبحة ومن ها الامور وأنا اخوك
وإذا بغيت تطلع في المرة الجاية سجلني خوي وأبشر بسعدك

[ابو البر]

المشاركة الأصلية كتبت بواسطة ابو ديمة

أصلا حلاة الرحلة بالتعاون بكل شي

انت حاول إنك تشركة بالعمل مثل انك تطلب منه أنه يقطع البصل إلين تخلص من تقطيع اللحم أو إنه يصلح القهوة إلين تذبح الذيبحة ومن ها الامور وأنا اخوك

وإذا بغيت تطلع في المرة الجاية سجلني خوي وأبشر بسعدك

يا ليتها يا بو ديمه على التقطيع والطبخ
اللي يضايقني اكثر انه غير منظم
يعني بقولك مثال

بقايا الآكل قشر الفواكه او الشراب البلاستيك يرميه ويقول هاذا بر
وحنا نبي نجمعه في اكياس .
يقوم قبلنا الصبح ولا يصحينا للصلاة لآن نوم بعضنا ثقيل .

لآنه ينام بدري يجبرنا نسوي العشاء بدري وحنا نبي نسهر الى عشر واحدعش.

بعضنا ما يشرب قهوه ويحب الآعشاب فهو يسوي الدله اول يوم ولا يغسلها الين حنا نكمل مشوار تجهيزها له اليوم الثاني .
فيه ثغرات با أجابتي ولاكن ودي اخلي الموضوع شكوا من حالات نمر فيها جميعا .

[برق الشتاء]

الله يهيدك أخوي
ليش انت مصعب الأمر
بكل بساطة أتركه وأمشي عنه <<< أفضل حل عندي
ولا ليش احنا طالعين البر
دام بيقعد زيه زي الحصا

[ندى الورد]

الله يعينك أبو البر على ما بلاك فعلاً بلوى
أنا أشوف أنا كل واحد فيه يوم من ناحيه الطبخ وتنظيف الأواني والباقين يتوزعون
تنظيف المكان والصيد اذا فيه مقناص في رآى هذا انسب حل عشان ما يطبخ وأنتم تغلسون
أما عن الصلاه فما يجوز له يصلى وأنتم نائمين واين الجماعه الله يهديه

[محمد السهلي]

وش لك به في البر

ماانت ملزوم فيه تأخذه معك كل ماطلعت ( واذا سئلك ليه ماعلمتني قل يااخي انت ماانتب شقردي وشلبي في البر) يعني (عطه اياها كااااش ) بعدها اما عرف لنفسه وصار معك خوي ينشد به الظهر ولادور له ناس غيرك يطق كبودهم ههههههههه

[ام العنود]

مشكور اخوي ابو البر على الموضوع الرائع وانا رأئي انه في ناس ماتعرف تشتغل
في البر ليسى اعتماد على الاخرين ولكن هي طبيعتهم بس حلو لما يكون الواحد متعاون مع خوياه
واكتفي بهذا الحديث للرسول صلي الله عليه وسلم
كان فى سفر وأمر أصحابه بإصلاح شاة فقال رجل:يا رسول الله علىَّ ذبحها ، وقال آخر
:علىَّ سلخها .وقال آخر:علىَّ طبخها . فقال رسول الله - صلى الله عليه وسلم -
:"وعلىَّ جمع الحطب" ، فقالوا:يا رسول الله نكفيك العمل ، فقال:
"علمت أنكم تكفوننى، ولكن أكره أن أتميز عليكم ،
وإن الله سبحانه وتعالى يكره من عبده أن يراه متميزاً
بين أصحابه".

[عبدالرحمن التميمي]

وش أبي بصداقته ما دام أنه مافيه نفع
وعلى رأي القائل لابغيت تعرف الرجل طيب أو ردي سافر أنت ويّاه