سحاب شقراء -سواليف الاولين ايام بيوت الطين والحياه الطيبه

[عبدالهادي المفرج التميمي]

السلام عليكم
وش العلوم الطيبة ما شاء الله
اعتذر عن عدم مشاركتي معكم فيما سبق
ولي عووودة بشيء مفيد للجميع ان شاء الله
مشكوووووووورين





سلام

[أبو سيرين]

المشاركة الأصلية كتبت بواسطة عبدالهادي المفرج التميمي

السلام عليكم
وش العلوم الطيبة ما شاء الله
اعتذر عن عدم مشاركتي معكم فيما سبق
ولي عووودة بشيء مفيد للجميع ان شاء الله
مشكوووووووورين

سلام

وعليكم السلام ورحمة الله وبركاته

يا هلا أبو ناصر حياك الله

والله متشوقين نسمع قصص من الماضي والحقيقة إن عم سحاب ما قصر في هذا الموضوع ولكن نطمع في المزيد من القصص وإن شاء الله نسمع منك ما يفيدنا .

تحيتي وتقديري

[تميم بن محمد]

وعليكم السلام ورحمة الله وبركاته
حي الله الشيخ عبدالهادي
في انتظار مشاركاتك بارك الله فيك

[سحاب شقراء]

المشاركة الأصلية كتبت بواسطة عبدالهادي المفرج التميمي

السلام عليكم
وش العلوم الطيبة ما شاء الله
اعتذر عن عدم مشاركتي معكم فيما سبق
ولي عووودة بشيء مفيد للجميع ان شاء الله
مشكوووووووورين





سلام

ياهلا ومرحبا ومسهلا يبو ناصر
هذي والله الساعه المباركه الي خلتك تجينا

ترانا نحتريك عطنا من السواليف الطيبه الي مرت عليك ولا على احد ثاني

شرفتنا بحظورك شرف الله مقامك

[سحاب شقراء]

السلام عليكم ورحمه الله وبركاته

اللهم صلي وسلم على نبينا وحبيبنا محمد

الابذكرالله تطمئن القلوب -لااله الا الله وحده لا شريك له

يالله تحييهم كلهم صغيرهم وكبيرهم ذكرهم و نثاهم وليا حيا كثر وليا كثر تنثر وليا تنثر تزبر

في يوم من الايام قبل تقريبن 20 سنه وكان ليلة خميس وديت عيالي عند جدتهم ورحت انا عندي شغل ورجعت

الساعه 2 الصباح وخذتهم ورجعنا للبيت يعني مصبحين على الخميس يوم للخميس كار ماعطل
طبعا كل واحد يحاول قدر المستطاع انه عند حرمته وعياله يكون هو الاسد والعيال يقتدون ببوهم بالشجاعة

والاقدام والمرجله وركوب الخيل والعلوم الي ترفع الراس
وصلنا البيت ووقفت السياره برا علشان ابا اروح اجيب غرض من بنده للبيت
المهم .. فتحت الباب والحاشيه يمشون وراي طبعا ابوهم في المقدمه وصكوا الباب ودخلنا
يوم انتصفت في الحوش ولا ذاك القطو اللي كبر ابليس ولو ماشفت بليس
والله العظيم اني صادق

انا شفته ولا ماشفته والله العظيم انه يشمخ على الجدار حق البيت باغي ياصل السطح لانه وحش

واجيك راجع وبسرع مايمكن والعائله الكريمه وراي يصارخون بابا وقف بابا وقف اللي يصيح

واللي طاح تقول لغم وانفجر فينا وانا عاض شماغي ورافع ثوبي ولا وقفت الا وانا قاطع الشارع
هالحين مايدري وش السالفه شافوا الابو يركض ويصارخ وصابهم الرعب
الله لايلومهم بصراحه وهم وراي ستر الله ماجاء سيارات وصدمتنا واول واحد ياصل سور

البيت حق جيرانا اللي قطع الشارع انا كن المسئله سباق هههههههه ويجون ونصف عند جدار الجيران اللي مقابل بيتنا كنا صافين للصلاه اللي يصيح واللي يشاهق واللي يتعبر
ما علمتكم امهم جتها ام الركب من يوم طلعت مع الباب ولاعاد تقوا تمشي ولاتكلم وتشر لي انا يابعلها تبيني اجي دوري غيرها اجي والله مارحت لها ياجماعه

هالحين مايدرون وش السالفه وانا مغير يالله ابلع ريقي وافح يالله اقدر اتنفس وما اقدر اتكلم من الروعه والتعب
من متى ماركضت من سنين
ويتكلمون عيالي وشو ياابوي وشو وانا اشر لهم اقول اصبرو شوي خلوني ارد النفس وشفيك يابوي شايف حرامي وومي براسي بالنفي اقول لا

وشو اجل قلت وانا اشر على الحوش قطو شايف قطو كبر الثور في الحوش وصارو يناضرون بعظهم عيالي مستنكرين كل هذا علشان قطو
وقمت وفتحت باب مدخل
السياره وانا قطع الشارع بالريموت ونجلس ساعه او اكثر ماطاع يطلع وفي الاخير يجي


يمشي اقصى سرعه ويطلع ويروح جهة الحرمه وقامت تصارخ وهي جالسه ما قوت تقوم

هذي ام الركب يسمونها بس صراحه معادلي هيبه ولا عاد لي وجه
والا جيت اسولف عن منول وايام الشباب والشجاعه وانا سوينا وانا فعلنا تصدقون حول مايجون كل عيالي بصوت واحد دور غيرها يابوي هذاك اول ياالاسد لاني منول اذا خافوا من شي او من ظلماء اسوي نفسي واقول هالحين تخافون ومعكم اسد وصرت معاد اجيب طاري امور فيها شقاوه او فيها

شي من الشجاعه ابد وكل مابغيت اقول شي قالوا هذاك اول يالاسد صدق معادلي هيبه والسبه قطو

فضحني ولا فيه ابو يسوي كذا بعياله تصدقون حتى الحرمه هالحين اذا وديتها لمشوار

وضايقني احد بالسياره اذا قلت له اخرعني الله لا يعافي العدو وانا معصب تقوم الحرمه
وتشرلي بيدها تقول على هونك على هونك لا يطق فيك عرق يالقوي
ثم ودي تنشق الارض وتبلعني بصر احه معادلي بعد هذي الحادثه اي وجه مار حقي وما جاني

وبس خلصت السالفه
وفي النهايه مانقول الا

سبحان الله والحمد لله ولااله الا الله والله اكبر

عدد خلقه وزنه عرشه ورضا نفسه ومداد كلماته