الكسرة و بحور الشعر .. شعراء البراري

[غانم الضومري]

جادك الغيث شاعر يستحق الاشاده
واضحن من حروفه ان شعره جزل

اشهد انه مميز فاله اعلى شهاده
يكتب احلى القصايد مايجيب الهزل

[رامز]

شرف الله قدرك وانت راع الريادة
بالعلوم الجميلة والقصيد الجزل

والشهادة من اهل العرف فخر وسعادة
قبل شعر المديح وقبل شعر الغزل

[رامز]

عاد الدفا والبرد خفت حدته
يالله بنوٍ مدلهم من الخيال

من عقب ماطالت علينا صدته
يلفي علينا كنه حيود الجبال

يحيي كبار الاودية من مدته
من اول هلال الشهر لآخر هلال

من دون لانشكي ضرره وشدته
في بلادنا مافيه شبر الا وسال

[غانم الضومري]

الله.. ولا غيره كريم.. بمدته
بكره باذن الله تشوفون الخيال

وسيلن عسى الله مايزود حدته
ﻻ عقربت هز الرعد روس الجبال

كمل ياخويي ..

[رامز]

لا ساقته ريح الجنوب وودته
ثم ارتزم .. ماردته ريح الشمال

هذا الهوى للخافق ومودته
ما هو غرام وعشق حلوات الدلال

[رامز]

الطبوع تزين في يوم الربوع
اجمل الايام هو وايا التبيع

تلتقي فيه الخداين والربوع
ريف لقلوب المواليف وربيع

[غانم الضومري]

ولّـعت في جيتك كل الشموع
ذوبت من تحتنا قالب صقيع

انتظرنا الزين أكثر من اسبوع
والخزامى زينت نبـت الربيــع

[رامز]

زادت الايام هم وزدت لوعة
وطال موال التوجد والأماني

أنتظر فجر(ن) يماطلني طلوعه
واسري بذكراي مابين المغاني

والأمل لو ما تضوِّيني شموعة
ماتت الأشواق ما بين الثواني

مار لا بد الغصن تورق فروعه
كان قال الله وتورق هالمحاني

ما نطيع الياس والنفس الجزوعة
لو رجانا ابعد من سهيل اليماني

[غانم الضومري]

كل حرفٍ تكتبه يا جاد روعه
شاعر وقام يتنقى بالمعانـــي

أسعدك الله ياجاد ..

لن أقطع حبل افكارك .. استمر على هذا العزف المنفرد الجميل

تستحق لقب شاعر بكل قوة واقتدار ..
تحيتي ..

[رامز]

صوت الصورة (1)


تحميل صور

الياس ..... لولا الياس ما ضاقت وسيعات الدروب
ولو الأمل ..... ما طارت طيور السما با رزاقها

لكننا نرجي شروق الشمس .... من بعد الغروب
ومعلقين آمالنا ..... واحلامنا ..... باشراقها

يا طير .... ساقك للقدر والرزق علام الغيوب
وكل الخلايق مالها الا ...... ما قسم خلاقها

وانا على حطة يدين الحظ والوقت اللعوب
واقف على حيلي واخيل المزنة وبراقها

وانته تروح اللقمة لحلقك على كف الهبوب
من قبل لا ترفع لها الجنحان ربك ساقها